މާލޭގެ ކުނީގެ މައްސަލަ އަށް ހައްލެއް ހޯދައި، ސާފުތާހިރުކަން ކަށަވަރުކުރުމަށް ދަ ޑިމޮކްރެޓްސް އިން ގޮވާލައިފިއެވެ.

މާލޭގެ ކުނި މެނޭޖް ކުރުން ބޮއްސުންލާފައިވާ ކަމަށް ބުނެ، ދަ ޑިމޮކްރެޓްސް އިން ވަނީ އެކަމާމެދު ކަންބޮޑުވުން ފާޅުކޮށް، މާލެ ސާފުތާހިރުކުރަން ގޮވާލާ ނޫސްބަޔާނެއް ނެރެފައެވެ. މި ނޫސްބަޔާނުގައި ދަ ޑިމޮކްރެޓްސް އިން ބުނީ، މާލެ ސިޓީގެ މަގުތަކުގެ ކަންކަންމަތީގައިވާ ކުނިވާ ޒާތުގެ ޑަސްބިންކޮތަޅުން ފެށިގެން ފަރުނީޗަރުގެ ބައިބަޔާއި، ގައުކުނޑީގެ ފުނިވަރުތަކުން މާލެ މިވަނީ މުޅިން ގޮނޑުވެފައި ކަަމަށެވެ. މިކަމުގެ ސަބަބުން މާލޭގެ މަގުތަކާއި އާންމު ހުސްޖާގަތަކުގެ ނުތާހިރުކަން އިންތިހާއަށް ބޮޑުވެ، އާންމު ސިއްހަތަށާއި، ދުޅަހެޔޮކަމާއި، އާންމުންގެ ސަލާމަތާއި ރައްކާތެރިކަމަށް ނުރައްކާ ވަމުންދާކަމަށް ވެސް އެ ޕާޓީން ނެރުނު ނޫސްބަޔާނުގައި ވެއެވެ.

ދަ ޑިމޮކްރެޓްސް އިން ބުނީ، މާލެ މި ދަރަޖައަށް ހަޑިވެފައިވާއިރުވެސް، ބަރަކާތްތެރި ރޯދަމަހާއި ދިމާކޮށް ސިޓީތެރެ ސާފުތާހިރު ކުރުމުގެ އެއްވެސް މަސައްކަތެއް ކަމާބެހޭ އެއްވެސް އިދާރާއަކުން ހިންގާފައެއް ނުވާ ކަމަށާއި،  ގޯތިގެދޮރު ފޮޅާ ސާފުކޮށް، ރޯދައަށްވާ ތައްޔާރީގައި ގޭބީސީތަކުން އުފެދޭ ކުނި އުކާލުމާއި، މަގުތަކާއި އާންމު ހުސްޖާގަތައް ސާފުކުރަން އެހެން އަހަރުތަކުގައި ހިންގި ބާވަތުގެ އެއްވެސް ހަރަކާތެއް މާލެ ސިޓީ ކައުންސިލުންވެސް ހިންގާފައި ނުވާ ކަމަށެވެ.

މާލޭގެ މަގުތަކާއި ޕާކުތަކާއި އާންމު ހުސްޖާގަތަކަށް ނުކުމެ ނޫޅެވޭވަރު ތަނަކަށް މުޅިން ބަދަލުވަމުން އަންނައިރު، މާލެ ސިޓީގެ މޭޔަރު އާދަމް އާޒިމް މާލޭގެ މޭޔަރު ކަމަށް އިންތިހާބުވެ ވަޑައިގެންނެވިީ މާލެއަކީ ތަނަވަސްކަމާއި ފެހިކަމާއި ތާހިރުކަމުގެ ޝިއާރުގައި ކަން ފާހަގަކޮށް، އެ ޕާޓީން ވަނީ މޭޔަރު އާޒިމް މާލެ ތާހިރުކުރަން ޕްލޭންކުރައްވާ ގޮތެއް، އަޅުއްވަން ގަސްތުކުރައްވާ ފިޔަވަޅެއް އަދި އެކަން ހާސިލު ކުރުމަށް ހިންގަވާ މަސައްކަތެއްގެ ހިލަމެއްވެސް ނުވާކަމަށް ބުނެފައެވެ.

އެހެންކަމުން ދަ ޑިމޮކްރެޓްސް އިން ވަނީ ، މާލެ "ކުނިގޮނޑަކަށް" ބަދަލުވަމުންދާއިރު، އަތްއުރާލައިގެން ނުތިބެ، އާންމު ސިއްހަތާއި ސަލާމަތަށް އެކަށޭނަ ގޮތެއްގައި މާލެ ސިޓީ ސާފުކުރުމުގެ ޕްރޮގްރާމެއް ހިންގުމަށް މޭޔަރު އާޒިމަށާއި، ސިޓީ ކައުންސިލްގެ މައްޗަށް ކަންބޮޑުވުމާއި އެކު ގޮވާލާފައެވެ. އަދި ދެމެހެއްޓެނިވި އިންތިޒާމެއްގެ ދަށުން މާލޭގެ ސާފުތާހިރުކަން ކަށަވަރު ކޮށް، މާލޭ މޭޔަރުގެ ބައި އިލެކްޝަނަށް އެ ޕާޓީއިން ޢާންމުކުރި މެނިފެސްޓޯގައިވާ ފަދައިން މާލެއަކީ ދިރިއުޅޭން އެކަށޭނަ ސިޓީއަކަށް ބަދަލުކުރުމަށް އަވަހަށް ފިޔަވަޅު އެޅުމަށް ވެސް އެ ޕާޓީން ނެރުނު ބަޔާނުގައި ވެއެވެ.