5 އަހަރަށްފަހު އައިޖީއެމްއެޗް މިސްކިތް އަލުން މަރާމާތުކޮށް ހުޅުވައިފިއެވެ.

މި މިސްކިތް ހުޅުވުމަށް މިއަދު ރަސްމިއްޔާތެއް ބާއްވާފައިވާއިރު، މިސްކިތް ހުޅުވައިދެއްވީ އިސްލާމީކަންތައްތަކާ ބެހޭ ވުޒާރާގެ ވަޒީރު ޑރ. މުހައްމަދު ޝަހީމް އަލީ ސައީދެވެ.

މިސްކިތް ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން ވަޒީރު ޝަހީމް ވިދާޅުވީ ހޮސްޕިޓަލެއްގައި މިސްކިތެއް ހުރުމަކީ ހޮސްޕިޓަލުން ޚިދުމަތް ހޯދާ ފަރާތްތަކަށާއި ބަލި މީހުންގެ އެހީތެރިންނަށް ލިބޭނެ ބޮޑު ހިތްހަމަޖެހުމަކަށް ވާނެ ކަމަށާއި މިސްކިތުގައި އިނދެ ދުއާ ކުރުމުން ލިބޭ ހިތްހަމަޖެހުމާއި މަޢުނަވީ, ރޫޙާނީ ސަޕޯޓަކީ ވަރަށް މުހިންމު އެއްޗެއް ކަމަށެވެ.

Advertisement

މި ރަސްމިއްޔާތުގައި ވާހަކަދައްކަވަމުން އައިޖީއެމްއެޗްގެ ސީއީއޯ އިބްރާހިމް ޢަބްދުއްރައްޒާޤް ހަލީމް ވިދާޅުވީ މިސްކިތް ބަންދުކޮށްފައިވަނީ 2019 ވަނަ އަހަރުގެ ރަމަޟާން މަހުގެ ފަހުން ކަމަށާއި މިތަން ބޭނުންކުރަމުން ދިޔައީ ޖަންކް ޔާރޑެއްގެ ގޮތުގައި ކަމަށެވެ. އަދި މިތަން އަލުން ހުޅުވާލުމަށް ނިންމީ ރައީސް ޑރ.މުއިއްޒު ގެ އިރުޝާދުގެ ދަށުން ކަމަށާއި، އައިޖީއެމްއެޗްގައި ނަމާދުކުރެވޭނެ އެކަށޭނަ ތަނެއް ޤާއިމްކުރުމަށް ރައީސް ޑރ.މުއިއްޒު އިރުޝާދު ދެއްވިކަމަށް އެބޭފުޅާ ވިދާޅުވިއެވެ.

މީގެ އިތުރުންވެސް އިބްރާހިމް ޢަބްދުއްރައްޒާޤް ހަލީމް ވިދާޅުވީ، މިސްކިތް އެޅުމަށް ގިނަ ބަޔެއްގެ އެހީތެރިކަން މާލީ ގޮތުންނާއި ޢަމަލީ ގޮތުން ލިބުނު ކަމަށާއި، މިސްކިތް އެޅުމަށް އެއްވެސް ވަރަކަށް އައިޖީއެމްއެޗްގެ ފަންޑުން ޚަރަދުކޮށްފައިނުވާކަމަށެވެ.

100 މީހުންނަށް އެއްފަހަރާ ނަމާދު ކުރެވޭ ވަރުގެ ޖާގައެއް އޮންނަ މި މިސްކިތުގައި، ވުޟޫކުރުމަށާއި ނަމާދުކުރުމަށް ފިރިހެނުންނަށާއި އަންހެނުންނަށް ވަކިން ބައެއްހަދާފައިވާއިރު، ކުރިއަށް އޮތް ރަމަޟާން މަހު މި މިސްކިތުގައި ތަރާވީޙު ނަމާދުކުރެވޭނެ ކަމަށްވެސް އައިޖީއެމްއެޗުން މައުލޫމާތު ދެއެވެ.