5 އަހަރަށްފަހު އައިޖީއެމްއެޗް މިސްކިތް އަލުން މަރާމާތުކޮށް ހުޅުވައިފިއެވެ.
މި މިސްކިތް ހުޅުވުމަށް މިއަދު ރަސްމިއްޔާތެއް ބާއްވާފައިވާއިރު، މިސްކިތް ހުޅުވައިދެއްވީ އިސްލާމީކަންތައްތަކާ ބެހޭ ވުޒާރާގެ ވަޒީރު ޑރ. މުހައްމަދު ޝަހީމް އަލީ ސައީދެވެ.
މިސްކިތް ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން ވަޒީރު ޝަހީމް ވިދާޅުވީ ހޮސްޕިޓަލެއްގައި މިސްކިތެއް ހުރުމަކީ ހޮސްޕިޓަލުން ޚިދުމަތް ހޯދާ ފަރާތްތަކަށާއި ބަލި މީހުންގެ އެހީތެރިންނަށް ލިބޭނެ ބޮޑު ހިތްހަމަޖެހުމަކަށް ވާނެ ކަމަށާއި މިސްކިތުގައި އިނދެ ދުއާ ކުރުމުން ލިބޭ ހިތްހަމަޖެހުމާއި މަޢުނަވީ, ރޫޙާނީ ސަޕޯޓަކީ ވަރަށް މުހިންމު އެއްޗެއް ކަމަށެވެ.
"މިސްކިތުގައި އިނދެގެން ދުޢާކުރީމަ އެލިބޭ ހިތްހަމަޖެހުމާއި މަޢުނަވީ ރޫޙާނީ ސަޕޯޓަކީ ވަރަށް މުހިންމު އެއްޗެއް. މި މިސްކިތް އެޅުމަށް މެނޭޖްމަންޓުން ނިންމި ނިންމުމަކީ ޚިދުމަތް ހޯދާ ބަލި މީހުންނާއި ބަލި މީހުންގެ އެހީތެރިންނަށްޓަކައި ވަރަށް ރަނގަޅު ނިންމުމެއް."
ވަޒީރު ޝަހީމް ވިދާލުވިއެވެ.
މި ރަސްމިއްޔާތުގައި ވާހަކަދައްކަވަމުން އައިޖީއެމްއެޗްގެ ސީއީއޯ އިބްރާހިމް ޢަބްދުއްރައްޒާޤް ހަލީމް ވިދާޅުވީ މިސްކިތް ބަންދުކޮށްފައިވަނީ 2019 ވަނަ އަހަރުގެ ރަމަޟާން މަހުގެ ފަހުން ކަމަށާއި މިތަން ބޭނުންކުރަމުން ދިޔައީ ޖަންކް ޔާރޑެއްގެ ގޮތުގައި ކަމަށެވެ. އަދި މިތަން އަލުން ހުޅުވާލުމަށް ނިންމީ ރައީސް ޑރ.މުއިއްޒު ގެ އިރުޝާދުގެ ދަށުން ކަމަށާއި، އައިޖީއެމްއެޗްގައި ނަމާދުކުރެވޭނެ އެކަށޭނަ ތަނެއް ޤާއިމްކުރުމަށް ރައީސް ޑރ.މުއިއްޒު އިރުޝާދު ދެއްވިކަމަށް އެބޭފުޅާ ވިދާޅުވިއެވެ.
"އައިޖީއެމްއެޗްގައި ނަމާދުކުރެވޭނެ އެކަށޭނަ ތަނެއް ޤާއިމްކުރުމަކީ ރައީސް އަޅުގަނޑަށް ދެއްވި އިރުޝާދެއް. މިތަން ބޭނުންކުރަމުން ދިޔައީ ޖަންކް ޔާރޑެއްގެ ގޮތުގައި. އަޅުގަނޑުމެން ނިންމީ މިތަން ރޯދަމަސް އައުމުގެ ކުރިން ނަމާދުކުރެވޭނެ މިސްކިތެއް މިތަނުގައި ޤާއިމްކުރަން."
އިބްރާހިމް ޢަބްދުއްރައްޒާޤް ހަލީމް ވިދާޅުވިއެވެ.
މީގެ އިތުރުންވެސް އިބްރާހިމް ޢަބްދުއްރައްޒާޤް ހަލީމް ވިދާޅުވީ، މިސްކިތް އެޅުމަށް ގިނަ ބަޔެއްގެ އެހީތެރިކަން މާލީ ގޮތުންނާއި ޢަމަލީ ގޮތުން ލިބުނު ކަމަށާއި، މިސްކިތް އެޅުމަށް އެއްވެސް ވަރަކަށް އައިޖީއެމްއެޗްގެ ފަންޑުން ޚަރަދުކޮށްފައިނުވާކަމަށެވެ.
100 މީހުންނަށް އެއްފަހަރާ ނަމާދު ކުރެވޭ ވަރުގެ ޖާގައެއް އޮންނަ މި މިސްކިތުގައި، ވުޟޫކުރުމަށާއި ނަމާދުކުރުމަށް ފިރިހެނުންނަށާއި އަންހެނުންނަށް ވަކިން ބައެއްހަދާފައިވާއިރު، ކުރިއަށް އޮތް ރަމަޟާން މަހު މި މިސްކިތުގައި ތަރާވީޙު ނަމާދުކުރެވޭނެ ކަމަށްވެސް އައިޖީއެމްއެޗުން މައުލޫމާތު ދެއެވެ.
Advertisement
This content is created and paid for by advertisers and does not involve Voice Journalists
