މާލެ ސަރަހައްދުގެ ވެމްކޯ ޓްރާންސްފަރ ސްޓޭޝަންތަކަށް އާންމު ރައްޔިތުން ގެންނަ ކުނި ހިލޭ އުކޭނެ އިންތިޒާމު ވޭސްޓް މެނޭޖްމަންޓް ކޯޕަރޭޝަން ލިމިޑެޓް (ވެމްކޯ) އިން ހަމަޖައްސައިފިއެވެ.
ރަމަޟާން މަހަށް ގެތަށް ސާފުކޮށް ގޭގޭގައި އުފެދޭ ކުނިތައް މަގު މައްޗަށް ނެރެފައި ބެހެއްޓުމުގެ ސަބަބުން މާލެ ގޮނޑަކަށް ވަމުންދާ މައްސަލަ ހައްލު ކުރުމަށް ވެމްކޯއިން މި ނިންމުން ނިންމައި އިއްޔެ ނެރުނު އިއުލާނެއްގައި ބުނީ ރޯދައާއި ދިމާކޮށް ބޮޑެތި ކުނި އުފައްދާ މިންވަރު އިތުރުވެފައިވާތީ، ކުނި އުކާލުމަށް ދިމާވެފައިވާ ކަންބޮޑުވުންތަކާއި ގުޅިގެން މާރިޗު 10 ވަނަ ދުވަހުގެ 18:00ން ފެށިގެން ޓްރާންސްފަރ ސްޓޭޝަންތަކަށް އާންމު ރައްޔިތުން ގެންނަ ބޮޑެތި ކުނި އަދި ގެތައް ސާފުކުރުމުގައި އުފައްދާ ކުނި ހިލޭ އުކޭނެ އިންތިޒާމު ހަމަޖައްސާފައިވާ ކަމަށެވެ.
އެގޮތުން ހިލޭ އުކޭނެ އިންތިޒާމު ހަމަޖައްސާފައިވަނީ މާރޗް 13 ވަނަ ދުވަހުގެ ރޭގަނޑު 12 ޖެހުމާއި ހަމައަށް ކަމަށް ވެސް ވެމްކޯ އިން ބުންޏެވެ.
އެ މުއްދަތުގައި އާންމު ރައްޔިތުންގެ ކުނި ގެންނަ ވެހިކަލްތަކުން އެންޓްރީ ފީ އަދި ޑިސްޕޯސަލް ޗާޖް ވެސް ނުނަގާނެ ކަމަށާ އެ މުއްދަތުގައި އާއްމުން ގެންނަ ވެހިކަލް ތަކުން އެންޓްރީ ފީ އަދި ޑިސްޕޯސަލް ޗާޖުވެސް ދައްކަން ނުޖެހޭނެ ކަމަށް ބުނެފައިވެއެވެ.
ނަމަވެސް އެ މުއްދަތުގައި ޓްރާންސްފަރ ސްޓޭޝަނަށް ވިޔަފާރިތަކުން ކުނި އުކާނީ ކުރިއެކޭ ވެސް އެއްގޮތަށް ކުނީގެ ބަރުދަނަށް ބަލައި ކިލޯއަކަށް 75 ލާރީގެ މަގުން ފީ ދެއްކުމަށްފަހު ކަމަށާ، އަދި ސަރުކާރުގެ މުއައްސަސާތަކުންނާއި ވިޔަފާރި އުސޫލުން ޤަވާއިދުން ކުނި ނެގުމުގެ ހިދުމަތް ފޯރުކޮށްދޭ ފަރާތްތަކުން މިހާރެކޭ އެއްގޮތަށް ކިލޯއަކަށް 2.66 ރ ދައްކަން ޖެހޭނެ ކަމަށް ވެމްކޯއިން ބުނެފައިވެއެވެ. އެ ވެހިލްތަކުން އެންޓްރީ ފީގެ ގޮތުގައި ވަންނަ ކޮންމެ ފަހަރަކު 150 ރުފިޔާ ދައްކަން ޖެހޭނެ ކަމަށްވެސް ބުނެފައިވެއެވެ.
ހިލޭ އުކޭނެ ކުނީގެ ތެރޭގައި ތެތް ކުނި (ކާބޯތަކެތި، ފަނާވާ ޒާތުގެ ކުނި) އިމާރާތް ކުރުމާއި އިމާރާތް ތަޅާލުމުގައި އުފައްދާ ކުނި ނުހިމެނޭނެ ކަމަށް ވެސް ވެމްކޯ އިން ބުންޏެވެ.
މިއަދު ޓްރާންސްފަރ ސްޓޭޝަންތަކުގައި ހިދުމަތް ފެށޭނީ މެންދުރު 14:00 ޖަހާއިރުކަންވެސް ވެމްކޯއިން ފާހަގަކޮށްފައިވެއެވެ.
Advertisement
This content is created and paid for by advertisers and does not involve Voice Journalists
