20 މަސްދުވަސް ވަންދެން ގްރައުންޑް ވެފައި އޮތް އެމްޓީސީސީ ގެ އެންމެ އަގު ބޮޑު އެސެޓް އަދި ޑްރެޖަރު، މަހާ ޖައްރާފު 2 މަސްދުވަސް ތެރޭ މަރާމާތުކޮށް އޮޕަރޭޝަނަށް ގެނެސްފިއެވެ.

އެމްޓީސީސީން ނެރުނު ބަޔާނެއްގައި ބުނީ، މަހާ ޖައްރާފު 8 ޖޫން 2022 އިން ފެށިގެން އޮތީ ގްރައުންޑް ވެފައި ކަމަށާއި، ނަމަވެސް މިދިޔަ ޖެނުއަރީ މަހު 16 ވަނަ ދުވަހު މަހާ ޖައްރާފު އޮޕަރޭޝަނަށް އަލުން ނެރެފައިވާ ކަމަށެވެ. މަހާ ޖައްރާފު ގްރައުންޑް ވުމަށް މެދުވެރިވި އެންމެ ބޮޑު ސަބަބަކީ، ކުރީގެ މެނޭޖްމެންޓުން ޝެޑިއުލް މެއިންޓެނެންސް ކުރިއަށް ނުގެންދިއުމާއި ބަލަން ޖެހޭ ވަރަށް ނުބެލުން ކަމުގައި އެމްޓީސީސީން ވަނީ ބުނެފައެވެ.

މީގެ އިތުރުންވެސް، އެމްޓީސީސީން ބުނީ، މަހާޖައްރާފު ބޭނުން ނުކޮށް 571 ދުވަސް ހޭދަވި ކަމަށާއި މިކަމުގެ ސަބަބުން މާލީ ބޮޑެތި ގެއްލުންތަކެއް ލިބިފައިވާ ކުންފުންޏަށް ލިބިފައިވާ ކަމަށެވެ. އަދި މި މުއްދަތުގައި، ބިން ހިއްކުމުގެ މަޝްރޫއުތައް ކުރިޔަށް ގެންދިޔައީ ބޭރުން ކޮންނަ ބޯޓެއް ކުއްޔަށް ގެނެސްގެން ކަމަށްވާތީ، މި ބާވަތުގެ މަޝްރޫޢުތަކުން ލިބޭ އާމްދަނީ ބޮޑުތަނުން ދަށަށް ގޮސްފައިވާ ކަމަށް އެކުންފުނީގެ ނޫސް ބަޔާނުގައި ވެއެވެ.

Advertisement

ކުންފުނީގެ ޕްރޮޖެކްޓްސް ސެކްޝަނުގެ ތިން ބައި ކުޅަ އެއްބައި އާމްދަނީ ބިން ހިއްކުމުގެ މަޝްރޫޢުތަކުން ލިބޭ އާމްދަނީ ކަމަށާއި، މަހާ ޖައްރާފު ފަދަ ބޮޑު ޑްރެޖަރެއް ގްރައުންޑް ވެފައި އޮތުމުން، ޖުމްލަ 510 މިލިއަން ރުފިޔާގެ އާމްދަނީ މި މުއްދަތުގައި ގެއްލިފައިވާ ކަމަށް އެމްޓީސީސީން ވަނީ ހާމަކޮށްފައެވެ.

އެއާއި އެކު އެމްޓީސީސީ ގެ އައު މެނޭޖްމެންޓުން ހަވާލުވެ އެންމެ ބޮޑު އިސްކަމެއް ދިނީ މަހާ ޖައްރާފު އޮޕަރޭޝަނަށް ގެނައުމަށް ކަމަށް އެމްޓީސީސީން ބުނެއެވެ. އެގޮތުން 2 މަސްދުވަސް ތެރޭ އަލުން މަހާ ޖައްރާފު އޮޕަރޭޝަނަށް ގެނެސް، މިހާރު އެ އުޅަނދު އުނގޫފާރުގެ ބިން ހިއްކުމުގެ މަޝްރޫޢުގައި ބޭނުން ކުރަމުންދާ ކަމަށް ވެސް އެ ކުންފުނިން ވަނީ ބުނެފައެވެ.

މަހާ ޖައްރާފު ގެނެސް ބޭނުންކުރަން ފަށާފައިވަނީ ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ވެރިކަމުގައި، 2017 ވަނަ އަހަރުގެ ތެރޭގައެވެ. މި ޑްރެޖަރ މެދުވެރިކޮށް އެކުންފުނިން ވަނީ ބިންހިއްކުމުގެ ގިނަ މަޝްރޫއުތަކެއް ހިންގާފައެވެ.