ވިއްސާރައިގައި ގެއްލުން ލިބުނު ކްރިމިނަލް ކޯޓުގެ ސާވަރު ރައްކާތެރި މާހައުލަކަށް ބަދަލުކޮށް ދެ މަސް ފަހުން ބޭނުން ކުރަން ފަށައިފިއެވެ.

ކްރިމިނަލް ކޯޓުން ނެރުނު އިއުލާނެއްގައި ބުނީ، އެ ކޯޓުގެ ސާވަރ މިހާރު ރައްކާތެރި މާހައުލަކަށް ބަދަލު ކުރެވިފައިވާތީ މިމަހުގެ 11 ވަނަ ދުވަހުން ފެށިގެން ބަންދާ މެދު ގޮތެއް ނިންމުމުގެ މަޖިލިސްތަކާއި ޝަރީއަތުގެ އަޑުއެހުންތައް އާންމު އުސޫލުން ކުރިއަށް ގެންދިޔުމަށް އެ ކޯޓުގެ ގާޒީން ގެ މަޖިލީހުން ނިންމާފައިވާ ކަމަށެވެ. 

އެހެންކަމުން، ޝަރީއަތްތައް އަޑުއެހުމުގެ ގޮތުންނާއި، ޝަރީއަތް އަޑުއެހުމަށް ބޭނުންވާ ނޫސްވެރިންނަށް ވެސް އޮންލައިންކޮށް ބައިވެރި ވުމުގެ އިންތިޒާމް ހަމަޖެހިފައިވާ ކަމަށް އެ ކޯޓުން ވަނީ ބުނެފައެވެ.

Advertisement

ކްރިމިނަލް ކޯޓުގެ ސާވަރ އަށް ގެއްލުން ލިބުނީ، ޑިސެންބަރު މަހުގެ 31 ވަނަ ދުވަހު މާލެ އަށް ކުރި ވިއްސާރައިގައި ކްރިމިނަލް ކޯޓުގެ އިމާރާތަށް ފެންވަދެ، ސާވާއަށް ލިބުނު ގެއްލުން ތަކާއި ގުޅިގެންނެވެ.

އެދުވަހު ކްރިމިނަލް ކޯޓުން ބޭއްވުމަށް ހަމަޖެހިފައިވާ ހުރިހާ ޝަރީއަތެއްވެސް ކެންސަލް ކުރިއިރު، މީގެ ކުރިންވެސް ބޯކޮށް ވާރޭ ވެހޭ ދުވަސްތަކުގައި ކްރިމިނަލް ކޯޓުގެ ތެރެއަށް ފެންވަދެ، ސާވާ އަށް ގެއްލުން ލިބުމުގެ ސަބަބުން ޝަރީއަތްތައް ކެންސަލްކޮށްފައިވާކަން ފާހަގަކޮށްލަން ޖެހެއެވެ.