ބަރަކާތްތެރި ރަމަޟާން މަހު ވެސް، މުސްލިމުންގެ ތިން ވަނަ އެންމެ މުގައްދަސް ހަރަމްފުޅު ކަމަށްވާ މާތްވެގެންވާ އަލް އަޤްސާ މިސްކިތަށް ފަލަސްތީނުގެ މުސްލިމުން ވަނުމަށް ޔަހޫދީން ހުރަސްއަޅައިފިއެވެ.

މިގޮތުން ރޯދަ މަސް ފެށުމުގެ ކުރިންވެސް އިސްރާއީލުން ވަނީ އަޤްސާ މިސްކިތް ވަށައިން ތިބޭ ޔަހޫދީ ސިފައިންގެ ފައުޖު ވަރުގަދަކޮށްފައެވެ. މީގެ އިތުރުންވެސް، ރަމަޟާން މަސް ފެށުނުކަން އިއުލާން ކުރުމާއި ގުޅިގެން ރޭގައި ފަލަސްތީނުގެ އެތައް ހާސް މުސްލިމުން އަޅުކަން ކުރުމަށްޓަކައި އަޤްސާ މިސްކިތުގައި ތިއްބާ އިސްރާއީލު ސިފައިން ހަމަނުޖެހުން ހިންގާފައިވާ ކަމަށް ވެސް ބޭރު ދުނިޔޭގެ މީޑިއާތަކުން ރިޕޯޓް ކުރެއެވެ.

މީޑިއާ ރިޕޯޓްތަކުން ބުނާ ގޮތުގައި ހައްދުފަހަނަ އަޅާފައިވާ އިސްރާއީލުން، މިސްކިތަށް ވަދެ ނަމާދު ކުރުމުގެ ހުއްދަ އުމުރުން 40 އަހަރުން މަތީގެ އަންހެނުންނަށް ދީފައިވާއިރު، ފިރިހެނުންނާއި ޒުވާން އަންހެނުން އަޤްސާ މިސްކިތަށް ވަނުންވެސް ވަނީ މަނާކޮށްފައެވެ.

ދަތި ކުރުމުގެ ފިޔަވަޅުތައް އިސްރާއީލުގެ އަނިޔާވެރި ބޮޑުވަޒީރު ނަތަންޔާހޫ ފަލަސްތީނުގެ މުސްލިމުންނަށް އަޅާފައިވާއިރު، އަޤްސާ މިސްކިތަށް ވަދެ އުޅޭ އެއްވެސް ޔަހޫދީ އަކަށް އެއްވެސް ދަތިކުރުމެއް ނެތެވެ.

ބަރަކާތްތެރި ރަމަޟާން މަސް ފެށިފައިވާއިރު، ފަލަސްތީނުގެ ޣައްޒާގައި ތިބި މުސްލިމުން ދަނީ ބަނޑުހައިހޫނު ކަމުގެ ވޭން ތަޙައްމަލު ކުރަމުންނެވެ. ރަމަޟާން މަސް ފެށުނު ނަމަވެސް ޔަހޫދީން ޣައްޒާއަށް ދެމުންގެންދާ ލާއިންސާނީ ހަމަލާތަކަށް ހުއްޓުމެއް އައިސްފައެއް ނުވެއެވެ.