މި ރަމަޟާން މަސް އެންމެހައި މުސްލިމުންނާއި ބައްދަލުކުރިއިރު ފަލަސްޠީނުގެ ބިމުގައި ހަނގުރާމައާ، ބިރުވެރިކަމާ، ހައިހޫނުކަމުގައި، ގެދޮރާއި އާއިލާގެއްލި ބިކަވުމުގެ ޙާލަތު ކުރިމަތިވެފައިވާ މުސްލިމް ތުއްތުކުދީންނާ، އުޚްތުންނާ، އަޚުންގެ މަތީން ހުރިހާ ދިވެހީން އަބަދުމެ ހަނދުމަކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގެންފިއެވެ.
ބަރަކާތްތެރި ރަމަޟާން މަހާއި ގުޅިގެން ރައީސް މުޢިއްޒު މިއަދު ދެއްވި ޚިޠާބުގައި ވިދާޅުވީ އިސްލާމީ އުންމަތަކީ އެއް ހަށިގަނޑެއް ފަދަ ބަދަހި އުންމަތެއްކަމަށެވެ. އަދި މި ބަރަކާތްތެރި މައްސަރުގައި މި މުޅި އުންމަތަށް ހެޔޮދުޢާ ކުރަން އެމަނިކުފާނު ވަނީ އިލްތިމާސްކުރައްވާފައިއެވެ.
ވަކީން ޚާއްޞަކޮށް، މި ރަމަޟާންމަސް އަޅުގަނޑުމެންނާ ބައްދަލުކުރާއިރު، ފަލަޞްޠީނުގެ ބިމުގައި ހަނގުރާމައާ، ބިރުވެރިކަމާ، ހައިހޫނުކަމުގައި، ގެދޮރާ ޢާއިލާގެއްލި ބިކަވުމުގެ ޙާލަތު ކުރިމަތިވެފައިވާ އަޅުގަނޑުމެންގެ މުސްލިމް ތުއްތުކުދީންނާ، އުޚްތުންނާ، އަޚުންގެ މަތީން އަޅުގަނޑުމެން ހުރިހާ ދިވެހީން އަބަދުމެ ހަނދާންވެއެވެ. މުސްލިމުންގެ މުޤައްދަސް އެއް މިސްކިތްކަމުގައިވާ އަލްމަސްޖިދުލް އަޤްޞާ ހުރި ބަރަކާތްތެރި ވަޠަނުގައި، އިސްލާމްދީނާ މިނިވަންކަމުގެ ޙައްޤުގައި ފަލަޞްޠީނުގެ އަހުލުވެރީން ކުރަމުންދާ ޖިހާދަށް ނަޞްރުދެއްވައި، އަނިޔާވެރީންގެ ކެހިވެރިކަމުން މިންޖުކުރައްވާށިއެވެ.
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
ރައީސުލްޖުމްހޫރިއްޔާގެ ޚިތާބުގައި އިތުރަށް ވަނީ، ދިވެހީންނަކީ އެއް އާއިލާއެއް އަދި އެއް ދީނެއްގައި ތިބި އެއް ޤައުމެއްގެ އަޚުންނާއި އުޚުތުންކަން ދެނެ ދޭދޭ ގުޅުންތައް ބަދަހިކުރެއްވުމަށް އެދިވަޑައިގެންފަ އެވެ.
ހެޔޮ ކަމުގެ މި މޫސުމުގައި ކީރިތި ޤުރްއާނުން ރޫޙާނީ މީރުކަން ހޯއްދަވާށެވެ. ޙަޤީޤަތެއް ނެތް ދޮގުވާހަކަތަކުން މުޖުތަމަޢު ކިލަނބު ނުކުރައްވާށެވެ. އަމިއްލަ ނަފުސާ މެދު އިތުރަށް ވިސްނައިވަޑައިގެން އިޞްލާޙުކުރައްވާށެވެ. ރީތި ހިމޭން ބަސްމަގުން ތެދުބަހުން މީހުންނާ މުޢާމަލާތުކުރައްވާށެވެ. ވަގުތާއި ކެއިން ބުއިމުގެ އިސްރާފުތައް ވެސް ނުކުރައްވާށެވެ. ކޮންމެ ގެޔަކީ ކުޑަކުދީންނަށް އޯގާވެރި ދުވަސްވީ މީހުންނަށް ކަމޭހިތާ ދޭދޭ އެންމެހައި ގުޅުންތަކަށް އިޙްތިރާމުކުރާ އުފާވެރި ގެޔަކަށް ހައްދަވައިދެއްވާށެވެ
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
މިއާއެކު ރައީސް މުޢިއްޒު ވިދާޅުވީ ރަމަޟާން މަސް އަޅުގަނޑުމެން މުސްލިމުންނަށް ދޭ ފިލާވަޅުތައް ގިނަ ގުނަކަން ފާހަގަކުރައްވާފައެވެ.
އެގޮތުން ވިދާޅުވީ, މިއީ ކެތްތެރިކަމާއި، އެކަކު އަނެކެއްގެ ބުރަތައް ލުއިކޮށް ދިނުމާއި، މާފަށް އެދުމާއި މާފުކުރުމުގެ އިތުރުން އިސްތިޣުފާރުކުރުމާއި ތައުބާވެ އަމިއްލަ ނަފުސު އިޞްލާޙުކުރުމުގެ މައްސަރުކަމަށެވެ.
އަދި މި ރަމަޟާން މަހުގައި އަހަރެމެންގެ އުޅުންތަކާއި ގުޅުންތައް އިޞްލާޙުކުރައްވައި، ހަރުދަނާކަންމަތީ ލެހެއްޓެވުން އެސި ދުޢާ ކުރުމަށް އެމަނިކުފާނު ވަނީ އެދިވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
