ކުރީގެ ރައީސް އަބްދުالله ޔާމީން އަބްދުލްޤައްޔޫމް އުސްވެ ހުންނަވައިގެން އުފައްދަން މަސައްކަތް ކުރައްވާ ޕީޕަލްސް ނެޝަނަލް ފްރޮންޓް (ޕީއެންއެފް)، އުފެއްދުމަށް އިލެކްޝަންސް ކޮމިޝަން (އީސީ)އަށް ހުށަހަޅާފައިވާ 3370 ފޯމުގެ ތެރެއިން ސައްހަވީ 1976 ފޯމް ކަމަށް އެ ކޮމިޝަންގެ ނައިބު ރައީސް އިސްމާއިލް ހަބީބް ވިދާޅުވެއްޖެއެވެ.
ރޭ ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ހަބީބު ވިދާޅުވީ ޕީއެންއެފްއިން އެ ކޮމިޝަނަށް އެންމެ ފުރަތަމަ ހުށަހެޅީ 3060 ފޯމު ކަމަށެވެ. ނަމަވެސް ފަހުން އިތުުރު ފޯމު ހުށަހަޅައި، ޖުމްލަ 3370 ފޯމް ކޮމިޝަނަށް ހުށަހަޅާފައިވާ ކަމަށާއި އެ ހުރިހާ ފޯމެއްގެ ސައްހަކަން ކަށަވަރުކޮށް ނިމިފައިވާ ކަމަށެވެ.
އަދި އޭގެ ތެރެއިން ސައްހަކަން ކަށަވަރުވެފައިވަނީ 1976 ފޯމު ކަމަށާއި، ސައްހަ ފޯމުތަކުގެ އިތުރަށް ރަނގަޅު ކުރެވޭނެ 1394 ފޯމު ވާކަމަށް ހަބީބު ވިދާޅުވިއެވެ.
އެހެންނަމަވެސް އެ ފޯމުގެ ތަކުގެތެރެއިން 81 ފޯމަކީ އެއްވެސް ވަރަކަށް ބަލައިގަނެވޭނެ ނުވަތަ ސައްހަ ފޯމުތަކެއް ނޫންކަމަށް ހަބީބް ވިދާޅުވިއެވެ.
"ޕީއެންއެފް ރެޖިސްޓަރ ކުރުމަށްޓަކައި މީގެ 10 ދުވަސް ކުރީން އެބައޮތް އަޅުގަނޑުމެންނަށް 3370 ފޯމު ހުށަހަޅުއްވާފައި. އެހުރިހާ ފޯމުގެ ސައްހަކަން ކަށަވަރުކޮށް ނިންމާފައި، ޕާޓީގައިވެސް މިހާރު ދަންނަވާފައި އޮންނާނީ. އޭގެ ތެރެއިން ސައްހަވީ 1976 ފޯމް، އިތުރަށް ރަނގަޅު ކުރަންޖެހޭ ފޯމްތަކެއް ވެސް އެބަހުރި، އެވާހަކަ ވެސް އެބޭފުޅުންނަށް ދަންނަވާފައި ވާނީ. މިސާލަކަށް މެމްބަރަކަށްވާން ސޮއިކުރާއިރު އޭގެ އެބަހުރި ކުރީގެ ތާރީހުތައް ޖެހިފައި އަދި ސޮއިކޮށްފައި. ރަޖިސްޓްރަރގެ ފަރާތުންނާއި ޕާޓީގެ ފަރާތުން ވެސް ފުރިހަމަ ކުރަންޖެހޭ ބައިތައް ހުރި ފޯމްތައް ވެސް އެބަހުރި. އެކަންކަން ރަނގަޅުކޮށްލުމުން ދެވަނަ ފަހަރަށް ވެސް ބަލައިގަނެވޭނެ ފޯމްތައް އެބަހުރި. ސައްހަކަން ކަށަވަރު ނުވެ 81 ފޯމް އެބަވޭ، އެބޭފުޅުންނަށް އަޅުގަނޑުމެން ވާނީ ހުރިހާ ތަފްސީލެއް އަރުވާފައި،"
އީސީގެ ނާއިބު ރައީސް ޢިސްމާއީލް ހަބީބު
ޕީއެންއެފްގެ މުއައްސިސެއްގެ ގޮތުގައި ކަނޑައަޅާފައި ވަނީ ރައީސް ޔާމީންގެ ދަރިކަލުން ޒެއިން އަބްދުالله ޔާމީނެވެ. އެ ޕާޓީ އުފެއްދުމަށްޓަކައި 3،000 މެމްބަރުންގެ ސޮއި ހަމަ ކުރުމުގެ ހުއްދަ އީސީން ދިނީ މިދިޔަ ނޮވެމްބަރު މަހުގެ ތެރޭގައެވެ.
Advertisement
This content is created and paid for by advertisers and does not involve Voice Journalists
