އަންނަ އަހަރު ރާއްޖޭގެ މާކެޓިން އަށް ކަނޑައަޅާ ބަޖެޓު ބޮޑުކޮށް، ޖަރުމަނުގައި 2026 ގައި އޮންނަ އައިޓީބީ ބާލިން ފެއާގައި ރާއްޖެއަކީ "ހޮސްޓް ކަންޓްރީ" އަކަށް ހަދަން މަސައްކަތް ފަށާފައިވާ ކަމަށް ފަތުރުވެރިކަމާއިބެހޭ ވުޒާރާގެ ވަޒީރު އިބްރާހީމް ފައިސަލް އިއުލާން ކުރައްވައިފިއެވެ.
ފައިސަލް މިކަން އިއުލާން ކުރައްވާފައިވަނީ، ޖަރުމަނުގައި އެންމެފަހުން ބޭއްވި އައިޓީބި ފެއާގެ މައުލޫމާތު ދިނުމަށް ޓޫރިޒަމް މިނިސްޓްރީ އާއި އެމްއެމްޕީއާރުސީ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
އެގޮތުން އޭނާ ވިދާޅުވީ، ދިވެހިރާއްޖެ އަކީ ފަތުރުވެރިންގެ މެދުގައި ނުހަނު މަގުބޫލު މަންޒިލެއް ކަމަށް ވުމުން އައިޓީބީގެ ހޮސްޓް ކަންޓްރީ އަކަށް ރާއްޖެ ހެދުމަށް ކުރާ މަސައްކަތް ކާމިޔާބު ވާނެ ކަމަށެވެ.
"އިރާދުކުރެއްވިއްޔާ 2026 ގައި އައިޓީބީގެ ހޮސްޓް ކަންޓްރީއަކަށް ވާނީ ރާއްޖެ. އެކަން އެމްއެމްޕީއާރުސީ އާއި ޓޫރިޒަމް އެޑްވައިޒަރު [ހަލީލް[ ވެސް ވަނީ މަސައްކަތް ފައްޓަވާފަ. މިކަމަކީ އިންޑަސްޓްރީގެ ވަރަށް ބޮޑު އެއްބާރުލުމަކާއެކީގައި ކުރެވޭނެ ކަމެއް. މިއީ ރާއްޖޭގެ ޑެސްޓިނޭޝަން މާކެޓިން އަށް ވެސް ލިބިގެންދާނެ ވަރަށް ބޮޑު ކުރިއެރުމަކަށް ވެގެން ދާނެ،"
ވަޒީރު އިބްރާހީމް ފައިސަލް
މީގެ އިތުރުން ފައިސަލް ވަނީ ނިމިދިޔަ އައިޓީބީ ފެއަރ ގެ މައއޗަށް އަލިއަޅުވާލައްވައިވެސް ވާހަކަ ދައްކަވާފައެވެ. އެގޮތުން އޭނާ ވިދާޅުވިގޮތުގައި އެ ފެއާއަކީ ރާއްޖެ އަށް ވަރަށް ކާމިޔާބު ފެއާއެކެވެ. އެގޮތުން، ކޮވިޑްގެ ފަހުން ބޭއްވުނު އެންމެ ކާމިޔާބު ފެއާރ އަކީ އެއީ ކަމަށް ރާއްޖޭގެ ސްޓޯލް ތަކަށް ހާޒިރުވި ފަރާތްތައްވެސް ފާހަގަ ކުރި ކަމަށް އޭނާ ވިދާޅުވިއެވެ.
"ކައިރި އެހެން ގައުމުތަކަށް ބެލިނަމަވެސް ރާއްޖޭގެ ސްޓޯލް ފެނިގެން ދިޔައީ ވަރަށް ހަރަކާތްތެރިކޮށް، މިކަން ފާހަގަ ކުރެއްވި މި ފެއާއަށް 15 އަހަރު 20 އަހަރު ވަޑައިގެންނެވި ފަރާތްތަކުން ވެސް. ކޮވިޑުގެ ފަހުން މިހާ ކާމިޔާބުކޮށް ގެންދިޔަ ފުރަތަމަ ފަހަރުކަން. މި ފެއާގައި ބައިވެރި އިންޑަސްޓްރީގެ ސްޓޭކްހޯލްޑަރުންނާ އަޅުގަނޑު ބައްދަލުކުރިން. އެ ބޭފުޅުން ވެސް ފާހަގަ ކުރި މިކަން،"
ވަޒީރު އިބްރާހީމް ފައިސަލް
މިއާއެކު ފައިސަލް ވަނީ ރާއްޖޭގެ މާކެޓިން ބަޖެޓަކީ އެކަށީގެން ވާވަރަށްވުރެ ކުޑަ ބަޖެޓެއް ކަން ފާހަގަ ކުރައްވައި، އެ ބަޖެޓު އަންނަ އަހަރު ބޮޑު ކުރަން މަސައްކަތް ކުރައްވާނެ ކަމަށް ވިދާލުވެފައެވެ.
Advertisement
This content is created and paid for by advertisers and does not involve Voice Journalists
