އަންނަ އަހަރު ރާއްޖޭގެ މާކެޓިން އަށް ކަނޑައަޅާ ބަޖެޓު ބޮޑުކޮށް، ޖަރުމަނުގައި 2026 ގައި އޮންނަ އައިޓީބީ ބާލިން ފެއާގައި ރާއްޖެއަކީ "ހޮސްޓް ކަންޓްރީ" އަކަށް ހަދަން މަސައްކަތް ފަށާފައިވާ ކަމަށް ފަތުރުވެރިކަމާއިބެހޭ ވުޒާރާގެ ވަޒީރު އިބްރާހީމް ފައިސަލް އިއުލާން ކުރައްވައިފިއެވެ. 

ފައިސަލް މިކަން އިއުލާން ކުރައްވާފައިވަނީ، ޖަރުމަނުގައި އެންމެފަހުން ބޭއްވި އައިޓީބި ފެއާގެ މައުލޫމާތު ދިނުމަށް ޓޫރިޒަމް މިނިސްޓްރީ އާއި އެމްއެމްޕީއާރުސީ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.

އެގޮތުން އޭނާ ވިދާޅުވީ، ދިވެހިރާއްޖެ އަކީ ފަތުރުވެރިންގެ މެދުގައި ނުހަނު މަގުބޫލު މަންޒިލެއް ކަމަށް ވުމުން އައިޓީބީގެ ހޮސްޓް ކަންޓްރީ އަކަށް ރާއްޖެ ހެދުމަށް ކުރާ މަސައްކަތް ކާމިޔާބު ވާނެ ކަމަށެވެ.

Advertisement

މީގެ އިތުރުން ފައިސަލް ވަނީ ނިމިދިޔަ އައިޓީބީ ފެއަރ ގެ މައއޗަށް އަލިއަޅުވާލައްވައިވެސް ވާހަކަ ދައްކަވާފައެވެ. އެގޮތުން އޭނާ ވިދާޅުވިގޮތުގައި އެ ފެއާއަކީ ރާއްޖެ އަށް ވަރަށް ކާމިޔާބު ފެއާއެކެވެ. އެގޮތުން، ކޮވިޑްގެ ފަހުން ބޭއްވުނު އެންމެ ކާމިޔާބު ފެއާރ އަކީ އެއީ ކަމަށް ރާއްޖޭގެ ސްޓޯލް ތަކަށް ހާޒިރުވި ފަރާތްތައްވެސް ފާހަގަ ކުރި ކަމަށް އޭނާ ވިދާޅުވިއެވެ.

މިއާއެކު ފައިސަލް ވަނީ ރާއްޖޭގެ މާކެޓިން ބަޖެޓަކީ އެކަށީގެން ވާވަރަށްވުރެ ކުޑަ ބަޖެޓެއް ކަން ފާހަގަ ކުރައްވައި، އެ ބަޖެޓު އަންނަ އަހަރު ބޮޑު ކުރަން މަސައްކަތް ކުރައްވާނެ ކަމަށް ވިދާލުވެފައެވެ.