ސަރުކާރުން ޑްރޯންތައް ވިއްކަން ދުނިޔޭގެ ބާޒާރުގައި ހުރި އަގަށްވުރެ ބޮޑު އަގެއްގައި އެ ޓެކްނޮލޮޖީ ގަތީ މަޖިލީހުގެ އިންތިހާބަށް ފައިސާ ހޯދަންކަަމަށް އިދިކޮޅު އެމްޑީޕީ އިން ތުހުމަތުކޮށްފިއެވެ.

އަންނަ މަހު ބާއްވާ ރައްޔިތުންގެ މަޖިލީހުގެ އިންތިހާބަށް އެމްޑީޕީން ކުރަމުންދާ ކެމްޕޭނާއި ގުޅޭ މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން، އެ ޕާޓީގެ ކެމްޕޭން ތަރުޖަމާނު އަދި ކެނދިކުޅުދޫ ދާއިރާގެ މެމްބަރު އަހުމަދު އީސަ ވިދާޅުވީ، ރާއްޖޭގެ އިގްތިސާދީ ސަރަހައްދު ބެލެހެއްޓުމަށް ޑްރޯން ގެނައުމަށް ނިމިދިޔަ އެމްޑީޕީ ސަރުކާރުގައި މަސައްކަތްތަކެއް ކޮށްފައިވާ ކަމަށެވެ. ނަމަވެސް ސަރުކާރު ބަދަލުވީ، ކުރީ ސަރުކާރުން އެކަމާއި ގުޅޭގޮތުން މަޝްވަރާކުރުމުގެ މަރުހަލާގައި އޮއްވާ ކަމަށް ވެސް އީސަ ވިދާޅުވިއެވެ.

އީސަ ވިދާޅުވީ، ސަރުކާރުން ޑްރޯން ގަންނަން 30 މިލިއަން ހަރަދުކޮށްފައިވާއިރު އެއަށްވުރެ އަގުހެޔޮކޮށް ޑްރޯން ހޯދޭނެ ގޮތުގެ ތަފްސީލު އެމްޑީޕީ އަތުގައި އެބަހުރި ކަމަށާއި، ކުއްލިއަކަށް އެވަރުގެ ބޮޑު ހަރަދެއް ބަޖެޓް ނުކޮށް، ކުރެއްވުމަކީ ސުވާލު އުފެދޭ ކަމެއް ކަމަށެވެ.

މީގެ އިތުރުންވެސް އީސަ ވިދާޅުވީ، ރައީސް ޑރ.މުއިއްޒު ވެރިކަމާއި ހަވާލުވެވަޑައިގަތުމަށްފަހު ތުރުކީ އަށް ވަޑައިގެން، ޑްރޯންތައް ގެނައީ "ތެޅި ފޮޅެމުން" ކަމަށާއި،  ކޮންޓިންޖެންސީ ބަޖެޓުން ޑްރޯން ގެންނަން ނިންމީ ފަށާފައިވާ ގިނަ މަޝްރޫއުތަކެއް ވެސް ހުއްޓާލާފައި ކަމަށެވެ.

ކަނޑުގެ ސަރަހައްދު ބެލެހެއްޓުމަށްޓަކައި ސަރުކާރުން ތުރުކީ އިން ގެނައި ޑްރޯންތައް ގެނައުމަށް ހަމަޖެހިފައިވަނީ، ނ. މާފަރު އެއާޕޯޓަށެވެ. އަދި ސަރުކާރުން ރާއްޖެ އަށް ގެނައުމަށް ހަމަޖެހިފައިވަނީ ޓީބީ2 ޑްރޯންތަކެއް ކަމަށްވެސް ރިޕޯޓްތައް ބުނެއެވެ.