ކީރިތި ރަސޫލާ މުޙައްމަދު ޞައްލަﷲ ޢަލައިހި ވަސައްލަމް އަށް ފުރައްސާރަކުރި މީހަކަށް ޕާކިސްތާނުގެ ކޯޓަކުން މަރުގެ ހުކުމް އިއްވައިފިއެވެ.

22 އަހަރުގެ ދަރިވަރެއް ކަމަށްވާ ޖުނައިދު މުނީރު އަށް ޕާކިސްތާނުގެ ކޯޓަކުން މި ހުކުމް އިއްވި އިރު، ރަސޫލާ އަށް ފުރައްސާރަ ކުރުމުގެ މައްސަލަ އަކާއި ގުޅިގެން އުމުރުން 17 އަހަރުގެ އަބްދުލް ހަނާން ނަމަކަށް ކިޔުނު ކުއްޖަކުވެސް އުމުރަށް ޖަލަށް ލުމަށް ވަނީ ހުކުމް ކޮށްފައެވެ.

މި ދެމީހުންވެސް މި ދައުވާތަކަށް ވަނީ އިންކާރުކޮށްފައެވެ.

މުނީރުގެ މައްޗަށް އުފުލާފައިވާ ދައުވާ އަކީ 2022 ވަނަ އަހަރު، ވަޓްސްއެޕް މެދުވެރިކޮށް، އިސްލާމްދީނާއި ޚިލާފު މައުލޫމާތުތަކެއް ހިއްސާ ކުރުމުގެ ދައުވާއެވެ. ނަމަވެސް މުނީރުގެ ބައްޕަ ހުސައިން، ވަނީ އޭނާގެ ދަރިފުޅުގެ މައްޗަށް އުފުލާފައިވާ ދައުވާ ދޮގުކޮށް، ގާނޫނީ ޓީމަކާއި އެކު އެ މައްސަލަ އިސްތިއުނާފަށް ހުށައަޅަން ނިންމާފައެވެ.

ނޫހަކަށް ފޯނުން ގުޅައިގެން ވާހަކަދައްކަމުން ހުސައިން ބުނީ މި މައްސަލަ އާއި ގުޅިގެން އޭނާގެ އާއިލާ ދިރިއުޅެމުންދަނީ ފިލައިގެން ކަމަށާއި، ރަސޫލާ އަށް ފުރައްސާރަ ކުރި ކަމަށް ދައުވާ އުފުލިފައިވާ މީހާގެ ބައްޕަ އަށްވާތީ، އޭނާ ވެސް މަރާލަން ޖެހޭކަމަށް އެ އަވަށުގެ މީހުން ގަބޫލު ކުރާ ކަމަށެވެ.

ބައެއް މީޑިއާ ތަކުން ރިޕޯޓް ކުރާ ގޮތުގައި ހަނާން ގެ މައްޗަށް އުމުރު ދުވަހުގެ ޖަލު ހުކުމެއް އިއްވީ، ކީރިތި ރަސޫލާ އާއި އެކަލޭގެފާނުގެ އަނބިކަނބަލުންނަށް ފުރައްސާރަކޮށް، އުފައްދާފައި ހުރި ފޮޓޯތަކަކާއި ވީޑިއޯ ތަކެއް ސޯޝަލް މީޑިއާ ތެރޭގައި ހިއްސާ ކުރުމާއި ގުޅިގެންނެވެ. ހަނާން އަށް މަރުގެ ހުކުމް އިއްވާފައި ނުވަނީ އޭނާގެ އުމުރުގެ ސަބަބުން ކަމަށް ކަމާބެހޭ ފަރާތްތަކުން ވަނީ ބުނެފައެވެ. އެހެންނަމަވެސް، މިކަމާއި ގުޅޭ ގޮތުން ހަނާން ގެ ފަރާތުން އެއްވެސް ރަސްމީ ބަހެއް ލިބިފައެއް ނުވެއެވެ.

ޕާކިސްތާނުގެ ގާނޫނު ބުނާ ގޮތުން، ދީނަށް ނުވަތަ ދީނީ ފަރާތްތަކަށް ފުރައްސާރަ ކުރި ކަމަށް ސާބިތުވާ ކޮންމެ މީހެއްގެ މައްޗަށް މަރުގެ ހުކުމް އިއްވޭނެއެވެ.