އިލެކްޝަން ކޮމިޝަން (އީސީ) އަށް ޚިދުމަތްކުރާތާ، 21 އަހަރަށްފަހު އެކޮމިޝަނުގެ ނައިބު ރައީސް އިސްމާއީލް ހަބީބް އީސީ އިން ވަކިވެވަޑައިގެންފިއެވެ.

ހަބީބު އީސީން އިން ވަކިވެވަޑައިގަތީ ކޮމިޝަންގެ މެމްބަރު ކަމުގައި ދެ ދައުރު ހަމަވުމުންނެވެ. ގާނޫނުގައި އޮންނަ ގޮތުން، އީސީގެ މެންބަރު ކަމުގައި ފުރިހަމަ ކުރެވޭނީ ގިނަވެގެން ދެ ދައުރުކަމަށްވާއިރު،  ހަބީބު ވަނީ ފަސް އަހަރުގެ ދެ ދައުރު ފުރިހަމަ ކުރައްވާފައެވެ.

މިކަމާއި ގުޅިގެން ހަބީބު އެކްސް ގައި ކުރެއްވި ޕޯސްޓެއްގައި ވިދާޅުވީ، އިންތިޚާބުތައް ރާވައި ހިންގުމުގައި އިންތިޚާބުތަކާ ބެހޭ އޮފީހުގެ މުވައްޒަފެއްގެ ހައިސިއްޔަތުންނާއި ކޮމިޝަނުގެ މެންބަރެއްގެ ހައިސިއްޔަތުން ރައްޔިތުންނަށް ހިދުމަތް ކުރަން ލިބުނު 21 އަހަރުގެ ތަޖުރިބާތަކަކީ ދެމިހުންނާނެ ތަޖުރިބާތަކެއް ކަމަށެވެ.

ހަބީބު ވަނީ އޭނާ އީސީ ގައި ހުންނެވި މުއްދަތުގައި ކޮމިޝަންގެ މެންބަރުންނާއި މުވައްޒަފުންނާއި، މުއައްސަސާތަކުންނާއި ނޫސްވެރިންގެ އިތުރުން ސިޔާސީ ޕާޓީތަކުން ދެއްވި އެއްބާރުލުމަށް ޝުކުރު އަދާކުރައްވާފައެވެ.

އީސީގެ މެންބަރުކަމަށް އައްޔަންކުރުމުގެ ކުރިން ވެސް އިންތިހާބުތަކާ ބެހޭ އޮފީހުގެ މުވައްޒަފެއްގެ ހައިސިއްޔަތުން ގިނަ ހިދުމަތްތަކެއް ކުރެއްވި ހަބީބް، އިލެކްޝަންސް ކޮމިޝަން މެންބަރުކަމަށް އެންމެ ފުރަތަމަ އައްޔަން ކުރީ 2013 ވަނަ އަަހަރުގެ މާޗު މަހުއެވެ. އެއަށްފަހު ފުރަތަމަ ދައުރު ހަމަވެ ދެ ވަނަ ދައުރަކަށް 2019 އަހަރު ވެސް ހަބީބް ވަނީ އައްޔަނުކޮށްފައެވެ.

ހަބީބް އީސީ ގެ ނައިބު ރައީސް ގެ މަގާމުން ވަކިވެވަޑައިގަތުމާއި އެކު، މިއަދު ބޭއްވި އެ ކޮމިޝަނުގެ އާންމު ޖަލްސާގައި، އީސީގެ ނައިބު ރައީސް ކަމަށް އެ ކޮމިޝަނުގެ މެންބަރު އަލީ ނަޝާތު ވަނީ އައްޔަންކޮށްފައެވެ.