"11 ވަނަ ޓީއެފްޓީ ފުޓްސަލް ޗެލެންޖު 2024" ގެ މީޑިއާ ޕާޓްނަރަކަށް ވޮއިސް ހަމަޖައްސައިފިއެވެ. މި މުބާރާތަކީ ދަ ފުޓްސަލް ޓައުންގެ ފަރާތުން އިންތިޒާމްކޮށްގެން ވިލިމާލެ ޒުވާނުންނަށް އަމާޒްކޮށްގެން ކޮންމެ އަހަރެއްގެ ރަމަޟާންމަހު ބައްވަމުން އަންނަ ފުޓްސަލް މުބާރާތެކެވެ.

މިއަދު މީޑިއާ ޕާޓްނަރާއެކު ބޭއްވި ސޮއި ކުރުމުގެ ރަސްމިއްޔާތުގައި ވޮއިސްގެ ފަރާތުން މިއެއްބަސްވުމުގައި ސޮއިކުރެއްވީ ޗީފް އެޑިޓަރު ޝަފްރާޒް އަހުމަދު ހުސެއިން އެވެ. އަދި ޓީއެފްޓީގެ ފަރާތުން ސޮއިކުރެއްވީ އެޖަމިއްޔާގެ ނައިބު ރައީސް ހަސަން ރަޝީދު އެވެ.

ވޮއިސްއަށް މައުލޫމާތު ދެއްވަމުން ޓީއެފްޓީގެ ނައިބު ރައީސް ހަސަން ރަޝީދު ވިދާޅުވީ ޓީ.އެފް.ޓީ އަކީ 2012 ވަނަ އަހަރު ވިލިމާލޭގައި އުފެދުނު ޖަމިއްޔާއެއް ކަމަށާއި، މި ޖައްމިއްޔާ އުފެއްދުމުގެ އެންމެ ބޮޑު މަގުސަދަކީ ޒުވާނުން މެދުގައި ކުޅިވަރުގެ ރޫހު އާލާކުރުމުގެ އިތުރުން ދުޅަހެޔޮ މުޖުތަމައެއް ބިނާކުރުމަށްޓަކައި ކުޅިވަރުގެ ތެރެއިން ޒުވާނުންނަށް ފަހި ފުރުސަތުތަކެއް ހޯދައިދިނުމެވެ.

އެގޮތުން 2012 ވަނަ އަހަރުން ފެށިގެން ކޮންމެ އަހަރެއްގެ ރަމަޞާން މަހާއި ދިމާކޮށް އަޅުގަނޑުމެން މި އަންނަނީ ވިލިމާލޭގައި ފުޓްސެލް މުބާރާތެއް ބާއްވަމުން، ނަމަވެސް 2020 އަދި 2021 ވަނަ އަހަރު އަޅުގަނޑުމެންނަށް ކޮވިޑް އަދި އެޗްޕީއޭގެ ގައިޑް ލައިން ތަށް ހުރި ގޮތުން މުބާރަތް ކުރިއަށް ނުގެންދެވުނު ނަމަވެސް 2022 ވަނަ އަހަރުން ފެށިގެން އަލުން ބާއްވަމުން މިއަންނަނީ..

އިތުރަށް ވާހަކަދައްކަމުން ހަސަން ރަޝީދު ވިދާޅުވީ މިމުބާރަތުގެ މީޑިއާ ޕާޓްނަރަކަށް ވޮއިސް ހަމަޖެހިގެން ދިއުމަކީ މުބާރާތަށް ލިބިގެންދިޔަ އިތުރު ފުރިހަމަކަމެކެވެ. އަދި އަޅުގަނޑުމެންގެ އުންމީދަކީ މީގެ ކުރިން ބޭއްވުނު މުބާރާތްތަކަށް ވުރެ ކާމިޔާބު އަދި ފުރިހަމަ މުބާރަތަކަށް މިއަހަރުގެ މުބާރާތް ވެގެންދިއުމެވެ.

ޗެންޕިއަން ޓީމަށް 50,000 އަދި ރަނަރަޕް ޓީމަށް 30,000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު ވެސް 32 ޓީމު ވާދަކުރެއެވެ. އަދި މުބާރާތުގެ މެޗްތައް ކުރިޔަށް ދާނީ ކޮންމެ ރެޔަކު 2100-0000 ވިލިމާލެ ފުޓްސެލް ގުރައުންޑްގައެވެ. މީގެ އިތުރުން މިމުބާރާތަކީ ރަމަޞާން މަހު ރާއްޖޭގައި ބާއްވާ އެންމެ ޑިމާންޑް ބޮޑު އަދި އެންމެ ގިނަ ބަޔަކު އިންތިޒާރު ކުރަމުން އަންނަ އެއް މުބާރާތެވެ.

ޖުމްލަ 32 ޓީމު ވާދަކުރާ މިމުބާރާތުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 32 ޓީމު 8 ގުރޫޕަކަށް ބަހާލައިގެން ކޮންމެ ގްރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު މުބާރާތުގެ ދެވަނަ ބުރަށް ހޮވޭގޮތަށެވެ.

މުބާރާތުގެ ކުޅުން މިރޭ ފެށުމަށް ހަމަޖެހިފައިވާއިރު، މިމަހުގެ 28 ވަނަ ދުވަހުގެ ރެއާއި ހަމައަށް ކޮންމެ ރެއަކުވެސް ގުރޫޕް ސްޓޭޖުގެ ތިން މެޗު ކުޅުމަށް ވަނީ ހަމަޖެހިފައެވެ.