ނިމިދިޔަ އެމްޑީޕީ ސަރުކާރުގެ ފަހު ދުވަސްކޮޅު ފަށާފައިވާ މަޝްރޫޢު ތަކުގެ ތެރެއިން ހުއްޓިފައިވަނީ ފައިސާނެތީސް ސިޔާސީ ބޭނުމަށް ފަށާފައިވާ މަޝްރޫޢުތައް ކަމަށް އެމްޓީސީސީގެ ސީއީއޯ އަބްދުالله ޒިޔާދު ވިދާޅުވެއްޖެއެވެ.

ޒިޔާދު މިހެން ވިދާޅުވެފައިވަނީ، 20 ވަނަ ރައްޔިތުންގެ މަޖިލީހުގައި އެމްޑީޕީގެ ޓިކެޓްގައި ނިލަންދޫ ދާއިރާއަށް ވާދަކުރައްވާ ކެންޑިޑޭޓް، ޢަލީ ރިޒާގެ ކެންޕެއިން ޖަލްސާގައި ވާހަކަ ދައްކަވަމުން ކުރީގެ ރައީސް އިބްރާހީމް މުހައްމަދު ޞާލިހު، އެމަނިކުފާނުގެ ސަރުކާރުން ކުރަން ފަށާފައި ހުރި ހުރިހާ މަޝްރޫޢުއެއް މިސަރުކާރުން ހުއްޓާލާފައިވާ ކަމަށް ވިދާޅުވުމާއި ގުޅިގެންނެވެ. 

ރައީސް ޞާލިހުގެ އެވާހަކަފުޅަށް ރައްދު ދެއްވަމުން ޒިޔާދު ވަނީ، މަސައްކަތް ހުއްޓިފައި ހުރި ހުރިހާ ރަށްރަށުގައި ރައީސް ޞާލިހުގެ ސަރުކާރުން މަސައްކަތް ފެއްޓެވީ ސިޔާސީ ބޭނުމުގައި ފައިސާވެސް ނެތީސް ކަމަށެވެ.

މީގެ ކުރިންވެސް އެމްޓީސީސީގެ ފަރާތުން ބޭއްވި ނޫސްވެރިންގެ ބައްދަލުވުމުގައި ޒިޔާދު ވަނީ އެ ކުންފުނީގެ ކުރީގައި އޮތް މެނޭޖްމަންޓުން ޢަމަލުކޮށްފައިވާ ގޮތުން އެމްޓީސީސީއަށް ބޮޑެތި ގެއްލުންތަކެއް ވެފައިވާކަމަށް ވިދާޅުވެފައެވެ. 

އެގޮތުން ބައެއް ބާޖާއި ޑްރެޖަރުތައް ކުއްޔަށް ނެގި މުއްދަތު އިތުރުކުރަމުން ގޮސް، އެ ތަކެތި ގަންނަން ހޭދަވާވަރަށް ކުލީގެ ގޮތުގައި ފައިސާ އަރާފައިވާކަމަށާ އަދި އެކަމުގެ ސަބަބުން މަޝްރޫޢުތަކުން ކުންފުންޏަށް ލިބެންޖެހޭ ޢާމްދަނީގެ ބޮޑު ބައެއް ގެއްލިފައިވާކަމަށްވެސް ޒިޔާދު ވިދާޅުވިއެވެ.