ޝަރީޢަތް ނިމެންދެން ވާނުވާ ބަންދުގައި ބެހެއްޓޭ މައްސަލައަށް ދާއިމީ ހައްލެއް ގެނައުމަށް ގާނޫނީ މަސައްކަތްތައް ކުރެވެމުންދާ ކަމަށާ، އެ މަސައްކަތް ނިމުމުން އެ މައްސަލައަށް ދާއިމީ ހައްލެއް ލިބިގެންދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވެފައި ވަނީ ރައީސް އޮފީހުން ކުރިޔަށް ގެންދާ "ރައީސްގެ ޖަވާބު" ސިލްސިލާގެ މިއަދުގެ ސެގްމަންޓުގައި، މ.މުލަކު، އޯޝަންލެޑް، ނަޝީދާ ޙަސަން، ޝަރީޢަތް ނިމެންދެންކުރާ ބަންދު ނުވަތަ "ވާނުވާ" އަށް ޙައްލެއް ހޯއްދަވައިދެއްވުމުގެ ވަޢުދާއިމެދު ދެންނެވި ސުވާލަށް ޖަވާބު ދެއްވަމުންނެވެ.
ވާނުވާގައި ތިބޭ މީހުން ދޫކޮށްލައޭ ބުނީމަ، އަޅުގަނޑުމެން ވަރަށް ބޮޑު އުއްމީދެއްގައި މިހުރީ. ހަތަރު ކުދިން ގޮވައިގެން، ނުކުޅެދުންތެރިކަން ހުން ކުއްޖެއް ގޮވައިގެން، ފިރިމީހާ ނެތީމާ ވަރަށް ނިކަމެތި ވެފައި. ފިރިމީހާ އިނީ ތުހުމަތެއްގައި ގެންގޮސްފައި. މިހާރު ދެ އަހަރު މިވަނީ. ނަގާފައު ހުރި ހެކިބަސްތަކުގެ އަލީގައި އޭނަގެ ކުށެއް ނެތް
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު
މި ސުވާލުގެ ޖަވާބުގައި ރައީސް މުއިއްޒު ވިދާޅުވީ "ވާނުވާ"ގެ މައްސަލައަށް ހައްލު ގެނައުމަކީ އެމަނިކުފާނު ވެވަޑައިގެންފައިވާ މުހިންމު ވައުދެއްް ކަމަށެވެ. އަދި އެ ކަމަށްޓަކާ ގާނޫނު އިސްލާހު ކުރެވެމުންދާ ކަމަށެވެ.
ވާނުވާ ބަންދު މައްސަލައާއި ގުޅިގެން އިސްލާހުތަކެއް ގާނޫނަށް ގެނައުމަށާއި، އެކަހަލަ ލީގަލް މަސައްކަތް ތަކެއްް އަޅުގަނޑުމެން ފަށައިފިން. އެހެންވީމާ އިރާދަކުރެއްވިއްޔާ ގާނޫނީ ހައްލެއް ތިކަމަށް ގެނެސްދެވޭނެ މަސައްކަތްތަކެއް ކުރެވެމުން ދަނީ. އަދި ތަހުގީގީ މަރުހަލާތައްވެސް މިހާރަށްވުރެ ރަނގަޅު ކުރުމަށް މަސައްކަތްތަކެއް ކުރެވި، އިރާދަކުރެއްވިއްޔާ ވާނުވާ މައްސަލައަށް ދާއިމީ ހައްލެއް ގެނެސްދޭނަން
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު
ރައީސުލްޖުމްހޫރިއްޔާ މިހެން ވިދާލުވެފައި ވާއިރު، މިދިޔަ ފެބްރުއަރީ މަހުގަްއި އެމަނިކުފާނު އިއްވެވި ރިޔާސީ ބަޔާނުގައި އެމަނިކުފާނު ވަނީ އެ މައްސަލަ ހައްލު ކުރުމުގެ މަސައްކަތް އެ މަސްތެރޭގައި ފަށްޓަވާނެ ކަމަށާ، މަޖލީހުގެ މި ފެށޭ ދައުރުގައި ގާނޫނަށް އިސްލާހު ގެނައުމަށް މަޖލީހަށް ހުށަހަޅުއްވާނެ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
