ކުރީ ސަރުކާރުން ކުރިއަށް ގެންދިޔަ ބިންވެެރިޔާ ސްކީމްގެ ދަށުން ގޯތި ލިބުނު މީހުންގެ ތެރެއިން މިހާތަނަށް ރެޖިސްޓެރީ އާއި ހަވާލުނުވާ މީހުންނަށް، އަނެއްކާވެސް ގޯތީގެ ރެޖިސްޓްރީއާއި ހަވާލުވާން އިތުރު ފުރުސަތެއް ދީފިއެވެ.

މިކަމާއި ގުޅޭގޮތުން ގެދޮރުވެރިކަމާއި، ބިމާއި ޢުމްރާނީ ތަރައްގީއާއި ބެހޭ ވުޒާރާއިން މިއަދު ނެރުނު ބަޔާނުގައި ބުނެފައިވަނީ މި ސްކީމްގެ ދަށުން ގޯތި ލިބުނު ފަރާތްތަކުގެ ތެރެއިން ރެޖިސްޓްރީ އާއި ގޯތި ލިބުނުކަމުގެ ލިޔުން 8،394 މީހުންނާއި ހަވާލުކުރެވިފައިވާ ކަމަށެވެ.

އަދި ސްކީމްގެ ދަށުން ދޫކުރުމަށް ހަމަޖެހިފައިވާ ބިން ތަކުގެ އެއްބަސްވުމުގައި ސޮއިކޮށް، ރެޖިސްޓަރީ ހަވާލުކުރުމުގެ އިތުރުން، ގޯތި ލިބިފައިވާ ކަމުގެ ލިޔުމާ އަދިވެސް ބައެއް ފަރާތްތަކުން ހަވާލުނުވާ ކަމަށް މިނިސްޓްރީން ފާހަގަކޮށްފައިވެއެވެ. އެގޮތުން އިތުރު ފުރުސަތު ދިނުމުންވެސް އަދިވެސް ގިނަ ފަރާތްތަކުން ގޯތި ލިބުނު ކަމުގެ ލިޔުމާއި ހަވާލުވާން ހާޒިރުވެފައި ނުވާ ކަމަށް އެ މިނިސްޓްރީން ބުނެފައިވެއެވެ.

އެހެންކަމުން ގޯތީގެ ރަޖިސްޓްރީއާ ހަވާލުވުމަށް 16 މާރިޗް ވާ ހޮނިހިރު ދުވަހުން ފެށިގެން 27 މާރިޗް ވާ ބުދަ ދުވަހުގެ ރޭ 23:59 އަށް އިތުރު ފުރުސަތެއް ހުޅުވާލާނެ ކަމަށް މިނިސްޓްރީގެ އިއުލާނުގައި ވަނީ ބުނެފައެވެ.

އަދި ރެޖިސްޓްރީއާ ހަވާލުވުމަށް އެޕޮއިންޓްމެންޓު ހިޔާވެހި ޕޯޓަލް މެދުވެރިކޮށް ހެއްދޭނެ ކަމަށް އެ މިނިސްޓްރީން ވަނީ ބުނެފައެވެ.