‏"ބިންވެރިޔާ" އަދި "ގެދޮރުވެރިޔާ" ސްކީމްއާއި ގުޅިގެން ހުށަހާޅާ މައްސަލަތަކާއި އަދި ނިންމަންޖެހޭ ނިންމުންތައް ނިންމުމަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ލަފާފުޅުގެ މަތިން "ހައުސިން ކޮމިޓީ" އެކުލަވާލައިފި އެވެ.

ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާ އިން މިއަދު ނެރުނު އިއުލާނުގައި ބުނެފައިވާ ގޮތުން "ހައުސިން ކޮމިޓީ" އުފައްދާފައުވަނީ ނިމިދިޔަ ފެބްރުއަރީ މަހުގެ 26 ވަނަ ދުވަހުއެވެ.

އަދި އެ ކޮމިޓީގެ ޗެއާރއެއްގެ ގޮތުގައި އައްޔަނު ކުރެވިފައިވަނީ އަނީސާ އަހުމަދު ކަމަށާ ވައިސް ޗެއާރ ގެ ގޮތުގައި އައްޔަނު ކުރެވުނީ އަބްދުލްއަޒީޒް ޔޫސުފް ކަމަށްވެސް ބުނެފައިވެއެވެ. 

އެ ކޮމެޓީގައި ހިމެނިވަޑައިގަންނަވަނީ؛

އަނީސާ އަހްމަދު

އާމިނަތު އީނާސް

އަހްމަދު އަލީ މަނިކު

އަބްދުލްއަޒީޒް ޔޫސުފް

މަރިޔަމް ފިޒާނާ ރަޝީދު

މި ކޮމިޓީގެ ބައްދަލުވުމެއް މިއަދު ވަނީ ކުރިއަށް ގެންގޮސްފައެވެ.

ސަރުކާރުން މިފަދަ ކޮމެޓީއެއް އުފައްދާފައި މިވަނީ ކުރީގެ ރައީސް އިބްރާހީމް މުހައްމަދު ޞާލިހުގެ ސަރުކާރުން އިމާރާތް ކުރަން ފެށި 4000 ފްލެޓް ލިބޭނެ ކަމަށް ކަނޑައަޅާފައިވާ މީހުންގެ ލިސްޓާ ގުޅޭ ގޮތުން އެންޓި ކޮރަޕްޝަން ކޮމިޝަން (އޭސީސީ) އިން ހިންގި ތަހުގީގުގައި، އެ ދިން މީހުންގެގާތްގަނޑަކަށް 60 އިންސައްތަ މީހުން ޝަތުރު ހަމަނުވާ ކަމަށް ކަނޑައެޅުމުންނެވެ. 

ގެދޮރުވެރިޔާ ސްކީމްގެ ފުރަތަމަ ބުރުގައި ފްލެޓަށް 21،000 މީހުން ކުރިމަތިލިއިރު، އޭގެ ތެރެއިން 12،000 މީހުން ފްލެޓަށް ޝަރުތު ހަމަވާ ކަމަށް ވަނީ ކުރީ ސަރުކާރުން ކަނޑައަޅާފައެވެ. އަދި ޝަރުތު ހަމަވާ ފަރާތްތަކުގެ ތެރެއިން ފުރަތަމަ 4،000 ފްލެޓް ލިބޭނެ މީހުން ކަނޑައަޅައި، އެ މީހުންނަށް ވަނީ ފްލެޓް ލިބުނު ކަމުގެ ލިޔުން ވެސް ދީފައެވެ.