ޔުއެފާ ޗެމްޕިއަންސްލީގު ކުއާޓާ ފައިނަލުގައި އެންމެ ފަހުގެ ޗެމްޕިއަން މެންޗެސްޓާ ސިޓީ އާއި މުބާރާތުގެ އެންމެ ކާމިޔާބު ކުލަބު ރެއާލް މެޑްރިޑް ވާދަކުރަންޖެހިއްޖެއެވެ.

ސްވިޒަލޭންޑްގެ ނިޔޯންގައި ހުންނަ ޔުއެފާގެ މައި އިދާރާގައި މިއަދު ބޭއްވުނު 2023/24 ވަނަ ސީޒަންގެ ޗެންޕިްއަންސް ލީގުގެ ކުއާޓާ ފައިނަލު އަދި ސެމީގެ ގުރުލުމުގެ ރަސްމިއްޔާތުގައި އެންމެ ފަހުގެ ޗެމްޕިއަން މެންޗެސްޓާ ސިޓީ އާއި ރެއާލް މެޑްރިޑް ކުއާޓާ ފައިނަލުގައި ވާދަކުރަން ޖެހުނުއިރު، ލަލީގާގެ ޗެމްޕިއަން ބާސެލޯނާ އިން ވަދަކުރަންޖެހޭނީ ފްރާންސްގެ ޗެންޕިއަން ޕީއެސްޖީ އާއި ދެކޮޅަށެވެ.

2017 ވަނަ އަހަރުގެ ފަހުން ފުރަތަަމަ ފަހަރަށް މުބާރަާތުގައި ވާދަކުރަމުން އަންނަ އާސެނަލް އިން ކުއާޓާ ފައިނަލުގައި ނުކުންނާނީ ޖަރުމަނުގެ ޗެންޕިއަން ބަޔާން މިއުނިކާއި ދެކޮޅަށެވެ. އަދި އިޓަލީގެ އިންޓަ މިލާން ޕެނަލްޓީގައި ބަލިކޮށް ކުއާޓާ ފައިނަލުން ޖާގަ ހޯދި އެތްލެޓިކޯ މެޑްރިޑް ވާދަކުރަން ޖެހުނީ ބޮރޫޝިއާ ޑޯޓްމަންޑް އާއެވެ.

ކުއާޓާ ފައިނަލުގެ ފުރަތަމަ ލެގުގެ މެޗުތައް ކުޅުމަށް ހަމަޖެހިފައިވަނީ އެޕްރީލް މަހުގެ 9 އަދި 10 ވަނަ ދުވަހު އެވެ. އަދި ދެވަނަ ލެގުގެ މެޗުތައް ކުޅުމަށް ހަމަޖެހިފައިވަނީ އެޕްރީލް މަހުގެ 16 އަދި 17 ވަނަ ދުވަހު އެވެ. މީގެ އިތުރުން މުބާރާތުގެ ސެމީ ފައިނަލުގެ ފުރަތަަމަ ލެގުގެ މެޗުތައް ކުޅުމަށް ހަމަޖެހިފައިވަނީ އެޕްރީލް 30 އަދި މެއި އެއްވަނަ ދުވަހުއެވެ. އަދި ދެވަނަ ލެގުގެ މެޗުތައް ކުޅުމަށް ހަމަޖެހިފައިވަނީ މެއި 7 އަދި 8 ވަނަ ދުވަހުއެވެ.

އިގިރޭސިވިލާތުގެ ވެރިރަށް ލަންޑަނުގެ ވެމްބްލީ ސްޓޭޑިއަމުގައި ކުޅުމަށް ހަމަޖެހިފައިވާ މިސީޒަނުގެ ޗެންޕިއަންސް ލީގުގެ ފައިނަލް މެޗު ކުޅުމަށް ހަމަޖެހިފައިވަނީ ޖޫން މަހުގެ އެއްވަނަ ދުވަހުގައެވެ.