ރާއްޖޭގެ މިނިވަންކަމާއި ސިޔާދަތާއި އިސްތިގްލާލްގެ ހިމާޔަތުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ތެދުވެ ވަޑައިގެން ކުރައްވާ ބުރަ މަސައްކަތުން ހަލުވި ކަމާއެކު ދިވެހި ލަޝްކަރު އަލުން އަތުރާލައްވާ ހޯއްދެއްވި ކުރިއެރުމަކީ ހަތުރުންނާއި މިތުރުން ހައިރާން ކުރުވި ކަމެއް ކަމަށް ދިވެހި ރާއްޖޭގެ ދިފާއީ ވަޒީރު މުހައްމަދު ޣައްސާން މައުމޫން ވިދާޅުވެއްޖެއެވެ.

ނ. މާފަރުގައި ރޭގައި އެމްއެންޑީއެފްގެ އެއާ ކޯ އިފުތިތާހުކޮށް، ޑްރޯން ބޭނުން ކުރަންފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ޣައްސާން ވިދާޅުވީ، މިއީ ރައްޔިތުންގެ ހިތްތަކުގައި ރައީސްއާ މެދު އުފެދުނު އިތުރު ޔަގީންކަމެއް ކަމަށާއި ތުއްތު ކުދިންގެ ހިތްތަކުގައި ހުއްބުލް ވަތޮންގެ ދަންމަރު އަލުން ދިއްލާލައި، ދިވެހި ސިފައިންގެ އަޒުމު އިތުރަށް ވަރުގަދަ ކުރުވި ކަމެއް ކަމަށެވެ.

މީގެ އިތުރުންވެސް ޣައްސާން ވިދާޅުވީ، ހަނގުރާމަތައް ކުރެވޭ ގޮތްތައް ބަދަލުވެގެން އައިސް އެންމެ ބޮޑަށް ފާހަގަކުރެވޭ އެއްކަމަކީ އަދުގެ ހަނގުރާމަތައް ބޮޑަށް ބަރޯސާ ވަނީ ޓެކްނޮލަޖީ އާއި ލަޝްކަރީއިންގެ ފުރާނަ ނުރައްކަލަށް ހުށަހެޅުން މަދު ކުރެވޭ، ކުޑަ ކުރެވޭ ގޮތްތަކަށް ކަމަށެވެ.

އެގޮތުން އެޑްވާންސް ޑްރޯން އަކީ މިހާރު ދުނިޔޭގައި ކުރިއަރާފައިވާ ގައުމުތަކުގައި ބޭނުންކުރާ ޕްލެޓްފޯމެއް ކަން ފާހަގަކުރައްވާ ޣައްސާން ވިދާޅުވީ، މިއީ ދިމާވާ ހާލަތަކުން ރާއްޖޭގެ މިނިވަންކަން ދިފާއު ކުރަން ޑިފެންސިވް މެނޫވާސް ނެގޭނެ އަލިފާނުގެ ބާރުހުރި ހަތިޔާރެއް ކަމަށެވެ. އަދި މި އާއި އެކު މިހާރު ދިވެހި ސިފައިން ރައްކާތެރިކަމާއެކު ތިބެގެން ރައްޔިތުންނަށް ދޭންޖެހޭ ހިދުމަތްތައް ދެވޭނެ ކަމަށްވެސް ޣައްސާން ވިދާޅުވިއެވެ.