މިދުވަސްވަރަކީ ޑޮލަރަށް ޑިމާންޑް ބޮޑު ދުވަސްވަރެއް ކަމަށާ، އެހެން ނަމަވެސް ޑޮލަރު ރޭޓު މަތިވިޔަ ނުދީ އެއްވަރެއްގެ ހިފެހެއްޓިފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.

ސައީދު ރޭ އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ބުރަ މަސައްކަތުގެ ސަބަބުން މިވަގުތުު ރާއްޖޭގެ އެގްތިސޯދު އޮތީ މިދިޔަ އަހަރުގެ ނޮވެމްބަރު މަހުގައި އިގްތިސޯދު އޮތް ދަތި ހާލަތުގައި ނޫންކަމަށެވެ.

އަދި ރަމަޟާން މަހާއި ރާއްޖޭގެ އިމްޕޯޓު އިތުރުވުމުގެ އިތުރުން އުމްރާގެ ހަރަދުތަކާއި އެކުވެސް ރާއްޖޭގެ ޑޮލަރުގެ ރޭޓު ހަމައަކަށް އެޅެން ފަށާފައިވާކަމަށް އޭނާ ވިދާޅުވިއެވެ.

Advertisement

ސަޢީދު އިތުރަށް ވިދާޅުވިގޮތުގައި މި ސަރުކާރުން ކުރިޔަށް އަޅަން ހުރި މުހިންމު ފިޔަވަޅުތަކާއި އެކު ޑޮލަރުގެ ރޭޓު އަދިވެސް ދަށަށް ދާނެ ކަމަށް ބެލެވޭ ކަމަށެވެ. 

ދައުލަތް ހިންގުމުގެ ހަރަދު ދެކޮޅު ޖައްސަން ކޮންމެ އަހަރަކު އެތައް ބިލިއަން ރުފިޔާއެއްގެ ފައިސާ ޗާޕުކުރުން ނިމުމަކަށް ގެނެސްފައިވަނީ މިދިޔަ ޑިސެމްބަރު މަހު އެވެ. އޭގެފަހުން، ސަރުކާރުން ވަނީ ދަރަނި މެނޭޖުކުރުމާއި ބަޖެޓު ފޫބެއްދުމަށް ފިސްކަލް ރިފޯމް އެޖެންޑާއެއް އެކުލަވާލައި ތަންފީޒުކުރަން ފަށައިފަ އެވެ.

ފައިސާ ޗާޕް ކުރުން ހުއްޓާލައި ސަރުކާރުން އެކުލަވައިލި އެ އެޖެންޑާއަށް އައިއެމްއެފް އިން ވެސް ވަނީ މަރުހަބާ ކިޔާފައެވެ.

ރާއްޖޭގެ ޑޮލަރު މާކެޓަށް ބަލާނަމަ މިދިޔަ އަހަރު ފަހު ކޮޅު ކަޅު ބާޒާރުގައި ޑޮލަރުގެ ރޭޓުވަނީ 19 ރުފިޔާއާއި ހަމައަށް ބޮޑުވެގެން ގޮސްފައި އެވެ. ނަމަވެސް މިހާރު ކަޅު ބާޒާރުގައި ޑޮލަރުގެ ރޭޓު އަންނަނީ ވަރަށް ބޮޑަށް ދަށަށް ޖެހެމުންނެވެ. ރާއްޖޭގެ ރަސްމީ ޑޮލަރު ރޭޓަކީ 15.42 ރުފިޔާ އެވެ.