މާލެ ސަރަހައްދުގެ 4 ތަނެއްގައި މި އަހަރުގެ ފިތުރު އީދު ނަމާދު ބޮޑު ޖަމާއަތުގައި ބޭއްވުމަށް ނިންމައިފިއެވެ.
މިނިސްޓްރީ އޮފް އިސްލާމިކް އެފެއާޒުން ކުރި އިއުލާނެއްގައި، އެ މިނިސްޓްރީން ވަނީ މާފަންނު ސްޓޭޑިއަމް ސަރަޙައްދާއި، ވިލިމާލެ ބޯޅަދަނޑު، ހުޅުމާލެ ފޭސް އެކެއްގެ ސިންތެޓިކް ޓްރެކް ސަރަހައްދު، އަދި ހުޅުމާލެ ފޭސް ދޭއްގެ ކްރިކެޓް ސްޓޭޑިއަމްގައި ފިތުރު އީދު ނަމާދުގެ ބޮޑުޖަމާއަތް ބާއްވަން ނިންމާފައިވާ ކަމަށް ބުނެފައެވެ. އެ ތަންތަނުގެ އިތުރުން އިސްލާމީ މަރުކަޒާއި އެ މިސްކިތުގެ ސަރަހައްދާއި ކިންގް ސަލްމާން މިސްކިތާއި އެމިސްކިތުގެ ސަރަހައްދުގައިވެސް ޖަމާއަތުގައި އީދު ނަމާދު ކުރާނެ ކަމަށް ބުނެފައިވެއެވެ.
އެހެންކަމުން ބޮޑު ޖަމާއަތުގައި އީދު ނަމާދުކުރުމަށް ހަމަޖެހިފައިވާ ހަތަރު ސަރަހައްދުގައި ޢީދުނަމާދަށް ތައްޔާރު ކުރުމުގެ މަސައްކަތުގައި އުޅޭ ބޭފުޅުންގެ ކެއުމާއި ސައި ތައްޔާރުކޮށްދޭނެ ފަރާތެއް ހޯދަން ބޭނުންވާ ކަމަށާ އަދި ސައުންޑް ހަމަޖައްސައިދޭނެ ފަރާތެއް ހޯދުމަށް ބޭނުންވާ ކަމަށް އިއުލާނުގައިވެއެވެ.
އީދު ނަމާދުގެ ބޮޑު ޖަމާއަތުގައި ނަމާދުކޮށް ނުނިމެނީސް އަވި އަރާތީ، ގިނަބައެއް އެކަމުގެ ޝަކުވާ ކުރުމާ ގުޅިގެން އީދު ނަމާދުގެ ޖަމާއަތް ފަށާ ގަޑި 7:00އަށް އަވަސްކުރުމަށް މަޝްވަރާކުރަމުންދާ ކަމަށް އިސްލާމިކް މިސްޓަރު ޑރ. މުހައްމަދު ޝަހީމް އަލީ ސައީދު ވަނީ މީގެ ކުރިން ވިދާޅުވެފައެވެ.
މަޝްވަރާތަކަށް ފަހު އީދު ނަމާދުގެ ޖަމާއަތް ފަށާނެ ވަގުތެއް ނިންމާނީ އިލްމުވެރިންނެވެ.
މިހާރު ޢީދު ނަމާދުގެ ޖަމާއަތް ފަށަނީ ހެނދުނު 7:30ގައެވެ.
Advertisement
This content is created and paid for by advertisers and does not involve Voice Journalists
