ރާއްޖޭގައި ހެލިކޮޕްޓަރު ދުއްވަން ޔުނިފޯމު ބަދަލުކޮށްގެން "ގަންޖުފަރާހެއް ލައިގެން" އިންޑިއާގެ ސިފައިން ތިބެން ނުޖެހޭ ކަމަށާއި އެ މީހުން ފޮނުވާލަން މި ސަރުކާރުން އަންގަން ޖެހޭ ކަމަށް ކުރީގެ ރައީސް ޔާމީން އަބްދުލް ޤައްޔޫމް ވިދާޅުވެއްޖެއެވެ.

ކުރިއަށް އޮތް ރައްޔިތުންގެ މަޖިލީސް އިންތިޚާބަށް ޕީއެންއެފުން ނެރޭ ކެނޑިޑޭޓުންނަށް ކެމްޕޭން ކުރަން ބާއްވާ ޖަގަހަ ޖަލްސާގައި ބައިވެރިވެވަޑައިގެން ރައީސް ޔާމީން ވިދާޅުވީ،އިންޑިއާ ސިފައިން ތިބެން ޖެހޭ އެންމެ ބޮޑު ސަބަބަކަށް އޮތީ ހެލިކޮޕްޓަރުގައި ބަލިމީހުން އުފުލުން ކަމަށްވީ ނަމަވެސް ރާއްޖޭގައި މިހާރު އެއާ އެމްބިއުލެންސް ގެ ޚިދުމަތް ރާއްޖެ އަށް ތައާރަފްކޮށް، ސީއެންބިއުލަންސް އެއްގެ ގޮތުގައި މަތިންދާބޯޓަކާއި ސީޕްލޭނެއް ތައާރަފްކޮށްފި ކަމަށެވެ. 

އެއާ އެމްބިއުލަންސް ގެ ހިދުމަތް ތައާރަފް ކުރުމުގެ އިތުރުން، އަމިއްލަ ހެލިކޮޕްޓަރެއް ހޯދުމަށް މި ސަރުކާރުން ނިންމާފައިވާއިރު، ބަލި މީހުން ހެލިކޮޕްޓަރުގައި އުފުލަން އިންޑިއާ ސިފައިން ތިބެން ނުޖެހޭ ކަމަށާއި އެ ވާހަކަ އިންޑިއާ ސަރުކާރުގައި ދަންނަވަން ރައީސް މުއިއްޒުގެ ސަރުކާރަށް ކެރޭނެތޯ ރައީސް ޔާމީން ވަނީ ސުވާލު އުފައްދަވާފައެވެ.

ރައީސް ޔާމީން ވަނީ ޔުނިފޯމް ބަދަލުކޮށްގެން މިތަނުގައި މަދަނީ މީހުންގެ ގޮތުގައި އައިސް އިންޑިއާ ސިފައިން އުޅެން ނުޖެހޭ ކަމަށާއި، ހެލިކޮޕްޓަރު އޮޕަރޭޓް ކުރުމަށް ރާއްޖޭގައި ތިބި އިންޑިއާ ސިފައިންނަށް ދިގު ތާރީހުތައް ނުދީ ވަގުތުން އެ މީހުން ފޮނުވާލުމަށް ވެސް ސަރުކާރަށް ގޮވާލައްވާފައެވެ.