މާލެ ސަރަހައްދުގައި ކަރަންޓް ބޭނުން ކުރާ މިންވަރު 100 މެގަ ވޮޓަށްވުރެ މަތިވެ، ކަރަންޓް ބޭނުން ކުރުމުގައި ސަމާލުވާން ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ އެދިވަޑައިގެންފިއެވެ. 

ފަހުމީ މިއަދު އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި އެކުންފުނީގެ ތަފާސް ހިސާބުތަކުން ދައްކާގޮތުން އެވްރެޖް މަހެއްގައި ގްރޭޓާމާލެ ސަރަޙައްދުގައި 94 މެގަވޮޓާއި ހަމައަށް ކަރަންޓު ބޭނުން ކުރާ އިރު، މި ދުވަސްވަރު 104.7 މެގަވޮޓާއި ހަމައަށް ދަނީ ކަރަންޓު ބޭނުން ކުރަމުންނެވެ.

އެހެންކަމުން ކަރަންޓަށް ކުރަންޖެހޭ ހޭދަ ވީހާވެސް ކުޑަ ކުރުމަށް، ކޮންމެހެން ބޭނުންވާ މިންވަރަށް ކަރަންޓު ބޭނުން ކުރެއްވުމަށާއި، މި ދުވަސްވަރު ކަރަންޓު އިޤުތިޞާދު ކުރެއްވުމަށް ޚާއްސަ ސަމާލުކަމެއް ދެއްވުމަށް އެމްޑީވަނީ އިލްތިމާސް ކުރައްވާފައެވެ.

Advertisement

ކޮންމެ އަހަރަކު ވެސް ރޯދަމަހާއި ދިމާކޮށް ކަރަންޓް ބޭނުންކުރާ މިންވަރު އިތުރުވާއިރު، މި އަހަރާއި ފާއިތުވެދިޔަ ގާތްގަޑަކަށް ދެ އަހަރުވެސް ރޯދަމަސް ދިމާވެފައިވަނީ ރާއްޖެއަށް އެންމެ ހޫނު ދުވަސް ވަރާއި ކަމުން ކަރަންޓް ލޯޑް ބޮޑުވެ، ކަރަންޓުން އިސްރާފު ނުކުރުމަށް ސްޓެލްކޯއިން ތަކުރާރުކޮށް އިލްތިމާސްކުރެއެވެ.