ރާއްޖެއާއި ތުރުކީއާ ދެމެދު ސޮއިކޮށްފައިވާ ވިޔަފާރީގެ އެއްބަސްވުމުގެ ދަށުން، އެ ގައުމާއެކު މިނިވަން ވިޔަފާރީގެ އެއްބަސްވުމެއް އެކުލަވާލުމުގެ މަސައްކަތް ސަރުކާރުން ފަށައިފި އެވެ.
އެކަން ހާމަކޮށް އިކޮނޮމިކް މިނިސްޓްރީން މިރޭ އެކްސް ގައި ކުރި ޕޯސްޓެއްގައި ބުނެފައިވާގޮތުން ރާއްޖެއާ ތުރުކީއާ ދެމެދު ޓްރޭޑް ނެގޯޝިއޭޝަންތައް ކުރިއަށްގެންދިއުމުގެ ފުރަތަމަ ބައްދަލުވުން މިއަދު އިކޮނޮމިކް މިނިސްޓްރީއާއި ކަމާގުޅުންހުރި އިތުރު އިދާރާތަކާއި އެކު ވަނީ ބޭއްވިފައެވެ.
މިއަދު ތުރުކިޔޭއާއި އެކު ބޭއްވި ބައްދަލުވުމުގެ ތެރެއިން- ފޮޓޯ/ އިކޮނަމިކް މިނިސްޓްރީ
އެ ބައްދަލުވުމުގެ ތަފްސީލް ހިއްސާކުރައްވަމުން އިކޮނަމިކް މިނިސްޓަރު މުހައްމަދު ސައީދު މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް ޑރ. މުހައްމަދު މުއިއްޒު ތުރުކީއަށް ކުރެއްވި ރަސްމީ ދަތުރުފުޅަށްފަހު ދެ ގައުމުގެ ދޭތެރޭ ވިޔަފާރީގެ ގުޅުން ވަރުގަދަ ކުރުމަށް ގިނަ މަސައްކަތްތަކެއް ކުރަމުން އަންނަ ކަމަށެވެ.
އެގޮތުން، މިހާރު ކުރިއަށްދަނީ ދެގައުމުން އެކަށައަޅާ ހާއްސަ ބައެއް މުދާ އެކުލެވޭ މިނިވަން ވިޔަފާރީގެ އެއްބަސްވުމެއް އެކުލަވާލުމުގެ މަސައްކަތް ކަމަށް މިނިސްޓަރު ވިދާޅުވި އެވެ.
ރައީސް ޑރ. މުޢިއްޒު ތުރުކީއަށް ކުރެއްވި ރަސްމީދަތުރުފުޅަށްފަހު ދެޤައުމުގެ ދޭތެރޭ ވިޔަފާރީގެ ގުޅުންވަރުގަދަ ކުރުމަށް ގިނަ މަސައްކަތްތަކެއް ދަނީކުރެވެމުން. އެގޮތުން މިހާރު ކުރިއަށްދަނީ ދެޤައުމުން އެކަށައަޅާ ހާއްސަ ބައެއް މުދާ އެކުލެވޭ މިނިވަން ވިޔަފާރީގެ އެއްބަސްވުމެއް އެކުލަވާލުމުގެ މަސައްކަތް
މިނިސްޓަރ ސަޢީދު
ރައީސުލްޖުމްހޫރިއްޔާ ތުރުކިޔޭއަށް ކުރެއްވި ރަސްމީ ދަތުރުފުޅުގައި އެ ގައުމާއިއެކު ވިޔަފާރީގެ އެއްބަސްވުމެއްގައި ސޮއިކުރުމުގެ އިތުރުން، އެ ގައުމުން ރާއްޖެއަށް ކާޑުގެ ބާވަތްތައް ގެންނަން ވެސް ވަނީ އެއްބަސްވެފަ އެވެ. އަދި މީގެ އިތުރުން ރާއްޖެއާއި ތުރުކީވިލާތުގެ މަސްވެރިންނާއި، މަހުގެ ބާވަތްތައް އުފައްދާ ކާރުހާނާތަކުގެ މެދުގައި ގުޅުން ބަދަހިކުރުމަށްވެސް މަޝްވަރާ ކުރެވިފައި ވާއިރު މަސްވެރިކަމުގެ އުފެއްދުންތަށް ތުރުކިޔޭއަށް އެކްސްޕޯޓް ކުރަން ވަރަށް އަވަހަށް ފެށޭނެ ކަމަށް ރައީސް މުޢިއްޒު ވިދާޅުވެފައިވެއެވެ.
Advertisement
This content is created and paid for by advertisers and does not involve Voice Journalists
