ވިލިމާލޭގައި މިހާރު ކުރިއަށްދާ "އޮބިއަން ޓީއެފްޓީ 11 ވަނަ ރަމަޟާން ފުޓްސަލް ޗެލެންޖު 2024" ގައި ބުދަދުވަހުގެ ރޭ ކުޅެވުނު ފުރަތަަމަ މެޗުގައި ގުރޫޕް ސީގެ ގޯޓު އެސްސީ އާއި ބޫޗީސް ވާދަކުރި މެޗު ފަސޭހަކަމާއި އެކު 10-1 ގެ ތަފާތުބޮޑު ނަތީޖާއަކުން މޮޅުވެ، ބާކީ އެއް މެޗު އޮއްވައި ގޯޓުން މުބާރާތްގެ ދެވަނަ ބުރުގެ ޖާގައެއް ކަށަވަރުކޮށްފިއެވެ.

މުބާރާތުގައި ގޯޓުން ކުޅުނު ފުރަތަަމަ މެޗުގައި އެނާރްކީ އެފްޓީ އަތުން 4-2 ގެ ނަތީޖާއަކުން ގޯޓު އެސްސީ މޮޅުވެފައިވާއިރު، މިމެޗުން ބަލިވި ބޫޗީސް މުބާރާތުގައި ކުޅުނު ފުރަތަަމަ މެޗުގައި އެލްކިއު ސްޕޯޓްސް ކުލަބު އަތުން ވަނީ 8-5 ގެ ނަތީޖާއަކުން ބަލިވެފަ އެވެ.

ވިލިމާލޭ ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފުގައި ގޯޓު އެސްސީ ހަތަރު ލަނޑު ކާމިޔާބުކުރިއިރު މެޗުގެ ދެވަަނަ ހާފުގައި އެޓީމުން ވަނީ އިތުރު ހަ ލަނޑު ކާމިޔާބުކޮށްފަ އެވެ. އަދި މިމެޗުގައި ބޫޗީސްގެ ހަމައެކަނި ލަނޑު ދެވަނަ ހާފުގައިި ކަމިޔާބުކޮށްދިނީ އެޓީމުގެ ހަސަން އެވެ.

މީގެ އިތުރުން މިމެޗުގައި ގޯޓުގެ އަހުމަދު އައިހަން، މުހައްމަދު ނަބީލް، އިބްރާހިމް އިމްރާން އަދި އިބްރާހިމް އިމްރާހް ގެ އިތުރުން އަހުމަދު ފިރާޝް މިއިން ކޮންމެ ކުޅުންތެރިއެއް ވަނީ ދެލަނޑު ކާމިޔާބުކޮށްފައެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ގޯޓު އެސްސީ ގެ އިބްރާހިމް އިމްރާހް އެވެ.

މިމެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ވެސް މޮޅުވެ 6 ޕޮއިންޓާއެކު ގޯޓު އެސްސީ ވަނީ ބާކީ އެއް މެޗު އޮއްވައި މުބާރާތްގެ ދެވަނަ ބުރުން ޖާގައެއް ކަށަވަރުކޮށްފައެވެ. އަދި މިމެޗުން ބަލިވި ބޫޗީސް މުބާރާތުގައި ކުޅުނު ދެމެޗުން ވެސް ބަލިވެފައިވާ އިރު ބާކީ އެއް މެޗު އޮއްވައި އެޓީމު ވަނީ މުބާރާތުން ކަޓާފައެވެ.

ޗެންޕިއަން ޓީމަށް 50,000 އަދި ރަނަރަޕް ޓީމަށް 30,000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު 32 ޓީމަކުން ބައިވެރިވެފައިވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 32 ޓީމު 8 ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު މުބާރާތުގެ ދެވަނަ ބުރަށް ހޮވޭގޮތަށެވެ.

މިމުބާރާތުގެ މެއިން ސްޕޮންސަރ އަކީ އޮބިއަން އެވެ. އަދި މުބާރާތުގެ މީޑިއާ ޕާޓްނަރަކަށް ހަމަޖައްސާފައި ވަނީ ވޮއިސް އެވެ.