ވިލިމާލޭގައި މިހާރު ކުރިއަށްދާ "އޮބިއަން ޓީއެފްޓީ 11 ވަނަ ރަމަޟާން ފުޓްސަލް ޗެލެންޖު 2024" ގައި ބުދަދުވަހުގެ ރޭ ކުޅެވުނު ދެވަނަ މެޗުގައި ގުރޫޕް ޑީގެ ލެޖެންޑްސް އާއި ބަދަވީސް ވާދަކުރި މެޗު ފަސޭހަކަމާއި އެކު 11-0 ގެ ތަފާތުބޮޑު ނަތީޖާއަކުން ކާމިޔާބުކޮށް ބަދަވީސް އިން މުބާރާތްގެ ދެވަނަ ބުރުގެ އުންމީދު ދަމަހައްޓައިފި އެވެ.

މުބާރާތުގައި ކުޅުނު ފުރަތަަމަ މެޗުގައި ގުޖުރާތު އަތުން 1-0 ގެ ނަތީޖާއަކުން ބަދަވީސް ބަލިވެފައިވާ އިރު، ލެޖެންޑްސްގެ ފުރަތަަމަ މެޗުގައި އެޓީމު ވަނީ 6-0 ގެ ނަތީޖާއަކުން ސްޓާލިއަންސް އަތުން ބަލިވެފައެވެ.

ވިލިމާލޭ ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފުގައި ބަދަވީސް އިން ހަތަރު ލަނޑު ކާމިޔާބުކުރިއިރު މެޗުގެ ދެވަަނަ ހާފުގައި އެޓީމުން ވަނީ އިތުރު 7 ލަނޑު ކާމިޔާބުކޮށްފައެވެ. 

Advertisement

މިމެޗުގައި ބަދަވީސްގެ ޝަނާން ރަޝާދު ތިން ލަނޑު ކާމިޔާބުކޮށް ހެޓްރިކް ހެދި އިރު، އެޓީމުގެ އަރީން އަބްދުﷲ އިބްރާހިމް އަދި އިބްރާހިމް އައިހަމް ޝަރީފު މިއިން ކޮންމެ ކުޅުންތެރިއެއް ވަނީ ދެލަނޑު ކާމިޔާބުކޮށްފައެވެ. އަދި އެޓީމުގެ މުހައްމަދު ޝާއިން، އަހުމަދު ރައުލް އައްސަދު އަދި ޔޫސުފު ޝާއިފްގެ އިތުރުން މޫސާ އަޒީމް ހަސަން މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ. 

މިމެޗުގެ މޭން އޮފް ދަ މެޗަކަށް ހޮވުނީ ބަދަވީސްގެ ޝަނާން ރަޝާދު އެވެ.

މިމެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ބަދަވީސް އަށް ތިން ޕޮއިންޓް ލިބިފައިވާއިރު، މިމެޗުން ބަލިވި ލެޖެންޑްސް އިން މުބާރާތުގައި ކުޅުނު ދެމެޗުން ވެސް ބަލިވެފައިވާ އިރު، މުބާރާތުގައި އިތުރަށް ކުރިއަށް ދިއުމުގެ އަމިއްލަ ބާރު އެޓީމަށް މިހާރު ވަނީ ގެއްލިފަ އެވެ.

ޗެންޕިއަން ޓީމަށް 50,000 އަދި ރަނަރަޕް ޓީމަށް 30,000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު 32 ޓީމަކުން ބައިވެރިވެފައިވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 32 ޓީމު 8 ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު މުބާރާތުގެ ދެވަނަ ބުރަށް ހޮވޭގޮތަށެވެ.

މިމުބާރާތުގެ މެއިން ސްޕޮންސަރ އަކީ އޮބިއަން އެވެ. އަދި މުބާރާތުގެ މީޑިއާ ޕާޓްނަރަކަށް ހަމަޖައްސާފައި ވަނީ ވޮއިސް އެވެ.