ފުޓްބޯލް އެސޯސިއޭޝަން އޮފް މޯލްޑިވްސް, (އެފްއޭމް) އިން އަންނަ މަހުގެ ބޭއްވުމަށް މަސައްކަތްކުރަމުން އަންނަ އިންތިހާބު މަޑުޖައްސާލަން ދުނިޔޭގެ ފުޓުބޯޅައިގެ މައި އިދާރާ ފީފާއާއި އޭޝިޔާގެ ފުޓްބޯޅައިގެ މައި އިދާރާ އޭްއެފްސީއިން އެފްއޭމްއަށް އަންގައިފި އެވެ.
މިކަން ހާމަކުރެއްވީ އެފްއޭމްގެ އެކްޓިންގ ޖެނެރަލް ސެކެޓްރީ މުހައްމަދު ޖައިޝަން ސައީދު އެވެ.
ޖައިޝަން ނޫސްވެރިންނަށް ފޮނުއްވި މެސެޖެއްގައި ވިދާޅުވީ ފީފާ އަށް އެފްއޭއެމް އާއި ގުޅޭ ގިނަ ޝަކުވާތަކެއް ހުށަހަޅާފައިވާތީ، އެ އިދާރާ އާއި އޭއެފްސީގެ އެންގުމުގެ މަތިން، މިހާރު ކުރަމުން އަންނަ އެފްއޭއެމްގެ އިންތިހާބުގެ ކަންކަން މަޑުޖައްސާލަން ނިންމާފައިވާ ކަމަށެވެ.
އަދި ފީފާއާއި އޭފްސީ އިން ކުރިޔަށް ގެންދާ ތަހުގީގުތަކަށް އެފްއޭމްެއިން ދޭން ޖެހޭ ހުރިހާ އެއްބާރުލުމެއް ދޭނެކަމުގެ ޔަގީންކަން ޖައިޝަން ދެއްވި އެވެ.
އެފްއޭމްގެ އިންތިހާބު ބާއްވަން އެއިދާރާއިން ތާވަލުކޮށްފައިވަނީ އަންނަ މަހުގެ 20 ވަނަ ދުވަހަށެވެ. މިއީ އެފްއޭމްގެ އިންތިހާބު މަޑުޖައްސާލަން ފީފާއާއި އޭފްސީ އިން އެންގި ދެވަނަ ފަހަރެވެ. އެގޮތުން މީގެ ކުރިން، އެފްއޭއެމް އިން 31 ޖެނުއަރީގައި ބާއްވަން އުޅުނު އިންތިހާބުގެ ކަންކަން ވެސް ހުއްޓާލަން ޖެހުނީ، ފީފާ އާއި އޭއެފްސީން އެންގުމުންނެވެ.
އެ ފަހަރުގެ އިންތިހާބު ކެންސަލްކުރަން ޖެހުނީ، އެފްއޭއެމް އިން އުސޫލާ އެއްގޮތަށް، އިލެކްޓޯރަލް ކޮމިޓީތައް އައްޔަނުކޮށްފައި ނެތުމުންނެވެ. ފަހުން، އެފްއޭއެމް އިން އެކްސްޓްރާ އޯޑިނަރީ ކޮންގްރެސްއެއް ބާއްވައި، އިލެކްޓޯރަލް ކޮމިޓީތައް ފާސްކުރި އެވެ. ނަމަވެސް، އެ ކޮންގްރެސް ފީފާ އާއި އޭއެފްސީން ބަލައިގަތްކަން ކަށަވަރެއް ނޫންނެވެ.
Advertisement
This content is created and paid for by advertisers and does not involve Voice Journalists
