ރޯދަ ވީއްލަން ތެލުލައިގެން ތައްޔާރު ކޮށްފައި ހުންނަ ތަކެތި ކެއުމަށް ފިހެފައި ހުންނަ ތަކެތި ކެއުމަކީ ހަށްޓަށް ފަސޭހަވާނެ ގޮތެކެވެ. އެހެންކަމުން މިއަދު ވޮއިސްގެ ބަދިގެއިން މި ގެނެސްދެނީ ފިހެގެން ތައްޔާރުކޮށްލާނެ އެއްޗެކެވެ. 

10 ގ ގެ 3 ބަޓަރ ޕޯޝަން

2 ލާހި ފުށް

ލޮނު

2 ދަޅު މަސް

1 ބޮޑު ފިޔާ (ތުނި ކޮށް ކޮށާފައި)

3 ލޮނުމެދު ( ގާނާފައި)

1 ހިކަނދިފަތް (ކުދިކޮށް ކޮށާފައި)

1 މޭޒުމަތީ ސަމުސާ ޓޮމާޓޯ ޕޭސްޓް

3 މޭޒުމަތީ ސަމުސާ ފުރައިޑު ޗިކަން ޗިލީ ސޯސް

1 ސައި ސަމުސާ ސޯޔާ ސޯސް

1 ސައި ސަމްސާ ތެޅި މިރުސް

މޮޒެރެއްލާ ޗީޒު

1 ބިސް

ގިތެޔޮ މިރުސް (ތުނިކޮށް ކޮށާފައި)

ނޫޑްލްސް ސޫޕް ޕެކެޓު/ ލޮނު

1) ފުށް ގަނޑު ތައްޔާރު ކޮށްލުމަށް ފުށާއި، ބަޓަރ ޕޯޝަނާއި ލޮނާ އެއްކޮށްލުމަށްފަހު، ހޫނުފެން އަޅައިގެން ރަނގަޅަށް ފުށްގަނޑު މޮޑެލާށެވެ.

2) މަސްގަނޑު ތައްޔާރު ކޮށްލުމަށް ފިޔާ، ލޮނުމެދު އަދި ހިކަނދިފަތް މަސްދަޅުގެ ތެޔޮފޮދުތެރޭގައި ކުޑަކޮށް މުށިކުލައަރަންދެން ކައްކާލާށެވެ. 

3) އެއަށްފަހު ޓޮމާޓޯ ޕޭސްޓު، ސޯޔާ ސޯސް، ޗިކަން ސޯސް، ލޮނު އަދި ގިތެޔޮ މިރުސް އަޅާލުމަށްފަހު ކުޑަ ފެންފޮދެއްވެސް އަޅައިގެން ދެ މިނެޓު ވަންދެން ކައްކާލާށެވެ. 

4) ޕޭސްޓު ގަނޑު ރަނގަޅަށް ކެކުމުން މަސްދަޅު އަޅައި އެއްކޮށްލުމަށްފަހު އިތުރު ދެމިނެޓު ވަރުވަންދެން ކައްކާލާށެވެ.

5) ދެން، މޮޑެފައިވާ ފުށްގަނޑުން ފަސް ފުށްގުޅަ ހަދާލުމަށްފަހު ފުށްގުޅަ މާ ތުނި ނުވާ ވަރަށް ދަމާލުމަށްފަހު ހަތަރު ފަޅިއަށް ފަޅާލާށެވެ. 

6) ދެން އޭގެ މެދު ތެރެއަށް ރަނގަޅަށް މަސް އެޅުމަށްފަހު، މަސް ގަނޑު  މަށްޗަށް ގާނާފައި ހުރި މޮޒެރެއްލާ ޗީޒް އަޅާލާށެވެ. ދެން ދެ އަރިމަތިން މެދަށްވާގޮތަށް ފަށްޖަހާލާށެވެ. 

7) ދެން، އަނެއް ފުށްގުޅަވެސް ކުރިން ފުށްގުޅައެކޭ އެއްވަރަށް ފަތުރާ ލުމަށްފަހު މަސްގަނޑު މަތީގައި ބޭއްވުމަށްފަހު ޕައިގެ ވަށައިގެން ބަންދުކޮށްލާށެވެ. 

8) އެއަށްފަހު އުލެއް ނުވަތަ ޓޫތު ޕިކެއް ޕައިގެ އެކި ތަންތަނަށް ހަރާލުމަށްފަހު މަތީގައި ރޯ ބިސްކޮޅެއް އުނގުޅާލާށެވެ. 

9) ދެން އަވަން 180 ޑިގްރީ ސެލްސިއަސް އަށް ބެހެއްޓުމަށް ފަހު ގާތްގަނޑަކަށް 30 މިނެޓު ވަންދެން ޕައިގެ މަތި ރަނގަޅަށް މުށިކުލަ ވަންދެން ފިހެލާށެވެ.