ސްޓެލްކޯގެ ޓްރާސްފޯމަރުތަކުން ވައްކަންކުރުން ބޮޑުވެ, އެ ކުންފުނީގެ ފަރާތުން އެ މައްސަލަ ކަމާބެހޭ ފަރާތައް ހުށަހަޅައިފިއެވެ.
މިކަމާ ގުޅޭގޮތުން ސްޓެލްކޯގެ މެނޭޖިން ޑިރެކްޓަރ ހުސައިން ފަހުމީ ރޭ އެކްސްގައި ކުރެއްވި ޕޯސްޓުގައި ވިދާޅުވީ، އެ ކުންފުނީގެ ސަބްސްޓޭޝަންތަކުގެ ތަޅުތައް ހަލާކޮށް، އެތަންތަނަށް ވަދެ ޓްރާންސްފޯމަރުތައް ނިއްވާލައިގެން އެ ޓްރާންސްފޯމަރުތަކުގެ އެކި ބައިތައް ވަގަށް ނަގަމުންދާކަން ފާހަގަ ކުރެވިފައިވާ ކަމަށެވެ. އަދި މި މައްސަލަ ވަރަށް ބޮޑުވެ އެކަން މިހާރު ކަމާބެހޭ ފަރާތްތަކަށް ހުށަހަޅާފައި ވާނެކަމަށް އެ ޕޯސްޓުގައި ފަހުމީ ވަނީ ވިދާޅުވެފައެވެ.
އަދި ހުޅުމާލޭގެ އެކި ސަރަހައްދުތަކުން ބުރާސްފަތި ދުވަހުގެ ރޭ ފަތިހާއި ރޭގައި ކަރަންޓު ކެނޑެން މެދުވެރިވ ސަބަބަކީވެސް ޓްރާންސްފޯމަރުތަކުން ވައްކަން ކުރުން ކަމަށް ފަހުމީ ވަނީ ވިދާޅުވެފައެވެ. އެގޮތުން ފަހުމީ ރޭ އެކްސްގައި ކުރި އެހެން ޕޯސްޓެއްގައި ވިދާޅުވެފައިވަނީ، ހުޅުމާލޭގެ ދެވަނަ ފިޔަވަހީގައި ހުންނަ ހަސަން އާދަމް މިސްކިތުގައި ތަރާވީސް ނަމާދު ކުރިއަށްދަނިކޮށް އެ މިސްކިތުން ކަރަންޓުގެ ޚިދުމަތް ރޭގައި މެދުކެނޑިގެން ދިޔައީވެސް އެ މިސްކިތް ކައިރީގައި ހުރި ޓްރާންސްފޯމަރުގެ ދޮރުތައް ހަލާކުކޮށްލައިގެން ބަޔަކު ވަދެ އޭގެ ބައިތައް ވަގަށް ނަގަން މަސައްކަތް ކުރުމުން ކަމަށެވެ.
މިއީ މިކަން ކުރާ ފަރާތްތަކަށްވެސް ބޮޑު ނުރައްކަލަކަށް ވާއިރު، މިއީ ކަރަންޓުގެ އަސާސީ ޚިދުމަތް 24 ގަޑިއިރު މެދުނުކެނޑި ދޭން މި ކުންފުނިން ކުރަމުންގެންދާ މަސައްކަތަށްވެސް އެޅޭ ހުރަހެއް. މިފަދަ ކަންކަން ކުރަމުންގެންދާ ފަރާތްތައް ހުއްޓުވައި އެފަރާތްތަކަށް ފިޔަވަޅު އަޅައިދީ، އަދި ވަގަށް ނަގައިގެން ވިއްކާ މިދަފަ ތަކެތި ގަންނަ ފަރާތްތަކަށްވެސް ފިޔަވަޅުއަޅައިދިނުމަށް ކަމާއި ބެހޭ ފަރާތްތަކަށް އިލްތިމާސް ކުރަން.
ސްޓެލްކޯގެ މެނޭޖިން ޑިރެކްޓަރ ހުސައިން ފަހުމީ
Advertisement
This content is created and paid for by advertisers and does not involve Voice Journalists
