ރާއްޖެ އަށް އެހީތެރިވެދޭނެ ބައިވަރު މީހުން ތިބި ނަމަވެސް މި ސަރުކާރުން ގޮތް ދޫކުރަން ނޫޅޭކަމަށް ކުރީގެ ރައީސް އަދި އެމްޑީޕީގެ އެޑްވައިޒަރ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސް ޞާލިހު މިފަދައިން ވިދާޅުވީ، ކުރިއަށް އޮތް ރައްޔިތުންގެ މަޖިލީހުގެ އިންތިހާބަށް އެޕާޓީން ކުރަމުންދާ ކެމްޕޭން ގެ ތެރެއިން މާފަންނު އަވަށުގެ ހަތަރު ދާއިރާއަށް އެމްޑީޕީން ވާދަ ކުރާ ކެންޑިޑޭޓުންނަށް ތާއިދު ހޯދުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ.

މިގޮތުން ރައީސް ޞާލިހު ވިދާޅުވީ، މިވަގުތު ރާއްޖޭގެ މާލީ ހާލަތަށް ދިމާވެގެން އުޅޭ ދަތިކަމަކީ މީގެ ކުރިން ޕީޕީއެމުން ވެރިކަމުގައި އޮތް އިރު ޗައިނާއިން ނެގި ލޯނުތައްކަމަށާއި އެ އަދަދު އިންޑިއާއިން ނަގާފައިވާ ލޯނުތަކަށް ވުރެ މާ ބޮޑުކަމަށެވެ. އަދި ކުރިމަތިވެގެން އުޅެނީ އިންޑިއާގެ ލޯނުތަކުން ދިމާވެގެން އުޅޭ ކަމެއް ނޫން ކަމަށާއި ދަރަނި ރީސްޓްރަކްޗާކުރުމަށް އިންޑިއާއާ ވާހަކަ ދައްކަވަން ރައީސް މުއިއްޒު ބޭނުންވާ ވާހަކަ މީޑިއާތަކުން ފެނިވަޑައިގެންފައިވާކަމަށް ވެސް ރައީސް ޞާލިހު ވިދާޅުވިއެވެ.

ރާއްޖެ އަށް އެހީވެދޭނެ ބައިވަރު ގައުމުތައް އެބަހުރި ކަމަށާއި ބޯހަރުކަން ދޫކޮށްލުމަށްފަހު ވާހަކަދައްކަން ޖެހޭ ކަމަށް ރައީސް ޞާލިހު ވިދާޅުވިއެވެ.

ރައީސް ޞާލިހު ވިދާޅުވީ، އިންޑިއާ އަށް ދަރަނީގެ ގޮތުގައި ދައްކަން ޖެހެނީ 8 ބިލިއަން ރުފިޔާ ކަމަށާއި، މި ފައިސާ ދެއްކުމަށް 25 އަހަރު ލިބޭއިރު، ޗައިނާ އަށް ދަރަނީގެ ގޮތުގައި 18 ބިލިއަން ރުފިޔާ ދައްކަން ޖެހޭ ކަމަށެވެ.

މި ސަރުކާރުގެ ހާރިޖީ ސިޔާސަތަށް ފާޑު ވިދާޅުވަމުން ރައީސް ޞާލިހު ވަނީ ބޯހަރުކަން ދޫކޮށް، ގޮތް ދޫކޮށްފި ނަމަ މިހާރުވެސް ރާއްޖެއަށް ގިނަ ފައިދާތަކެއް ކުރާނެކަމަށާއި ކަންކަން އަދި މިދަނީ ހަމަ މަގުން ނޫންކަން ފާހަގަކުރައްވާ، މިސްރާބު ހަމަ މަގަށް އަޅުވަން ގިނަ މަސައްކަތްތަކެއް ކުރަން ޖެހޭކަމަށް ވިދާޅުވެފައެވެ.

އިންޑިޔާގެ ދަރަންޏަށްވުރެ ޗައިނާގެ ދަރަނި ބޮޑު ކަމަށާ، އިންޑިޔާގެ ދަރަންޏަކީ އެންމެ 8 ބިލިއަން ކަމަށް ޞާލިހު ވިދާޅުވެފައިވާއިރު، އިންޑިއާގެ އެގްޒިމް ބޭންކުން އެމަނިކުފާނުގެ ވެރިކަމުގައި ނަގާފައިވާ ލޯނުތަކުގެ އަދަދު އެކަނި 22 ބިލިއަން ރުފިޔާއަށް އަރައެވެ. އަދި އިންޑިއާއިން ނަގާފައިވާ ޖުމްލަ ދަރަނި 40 ބިލިއަން ރުފިޔާއަށް އަރައެވެ. 

މިކަން ހާމަކުރެއްވީ 18 ޖަނަވަރީ 2023 ވަނަ ދުވަހުގެ ރޭ ހަނިމާދޫ އެއާޕޯޓު މަޝްރޫޢު އިފުތިތާހުކުރުމަށް ބޭއްވި ޖަލްސާގައި އެމްޑީޕީގެ މިހާރުގެ ރައީސް އަދި ޚާރިޖީވަޒީރު ޝާހިދު ދެއްކެވި ވާހަކަފުޅުގައި އޭނާއެވެ. އެގޮތުން ޝާހިދު ވިދާޅުވެފައިވަނީ އިންޑިއާއިން 2.7 ބިލިއަން ޑޮލަރުގެ އެހީ ހަމަޖައްސާފައިވާ ކަމަށެވެ. އެއިން ހިލޭ އެހީގެ ގޮތުގައި ހަމަޖައްސާފައިވަނީ 173.7 މިލިއަން ޑޮލަރުކަމަށްވެސް ޝާހިދު ވިދާޅުވިއެވެ.

ޝާހިދުގެ ވާހަކަފުޅުން ސާފުވާ ގޮތުގައި ޖުމްލަ 2.7 ބިލިއަން ޑޮލަރު އިންޑިއާއިން ލިބުނުއިރު އެއިން ހިލޭ އެހީގެ ގޮތުގައި ލިބުނު 173.7 މިލިއަން ޑޮލަރު އުނިކުރުމުން އަންނަ 2.58 ބިލިއަން ޑޮލަރަކީ އިންޑިއާގެ ލޯނެވެ. އެއީ ދިވެހި ރުފިޔާއިން 39.8 ބިލިއަން ރުފިޔާއެވެ.