43 އަށްއަހަރަށް ވުރެ ގިނަ އަހަރު ދައުލަތަށް ހިދުމަތް ކުރެއްވި ބޭފުޅުންގެ ތެރެއިން ދައުލަތަށް ޚިދުމަތް ކުރުމުގެ އިނާމު ދީފައިނުވާ ބޭފުޅުންގެ ނަންތައް ޤައުމީ އިނާމާބެހޭ ކޮމިޓީއަށް ފޮނުއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވައިފިއެވެ.

ރައީސް އޮފީހުން ބުނީ، 45 އަހަރަށްވުރެ ދިގު މުއްދަތެއްގައި ދައުލަތަށް ޚިދުމަތް ކުރައްވައިފައިވާ ބޭފުޅުންގެ ތެރެއިން ވަޒީފާއިން ވަކިވެވަޑައިގެންފައިވާ ބޭފުޅުންނާއި، ވަޒީފާގައި ދެމިތިއްބެވި ބޭފުޅުންނަށް މިދިޔަ އަހަރު އިނާމު އަރުވާފައިވާކަމަށެވެ. އަދި މިފަދަ ފަރާތްތަކުގެ ކުށާއި ދަރަނީގެ ރެކޯޑާއި، އަދާކުރި ވަޒީފާތަކާއި، ވަޒީފާ އަދާކުރި ގޮތުގެ ތަފްޞީލު މަޢުލޫމާތު، އިނާމާބެހޭ ކޮމިޓީއަށް ފޮނުއްވައިގެން، އެ ކޮމިޓީން ބަލަންޖެހޭ ކަންތައްތައް ބެލުމަށްފަހު އިނާމު ދިނުމަށް ރައީސް ޑރ.މުއިއްޒު ނިންމަވާފައިވާކަމަށް ވެސް ރައީސް އޮފީހުން މައުލޫމާތު ދެއެވެ.

މިގޮތަށް ހަމަޖައްސަވާފައިވަނީ ދައުލަތަށް ދިގު މުއްދަތެއްގައި ޚިދުމަތްކޮށް، ވަޒީފާއިން ވަކިވެފައިވާ ގިނަ ފަރާތްތަކަށް، އެމީހުންގެ އަމިއްލަ ރެކޯޑްތައް ހޯދުމުގައި ދަތިތަކެއް ކުރިމަތިވުމާއި އެކު އޭރު ޚިދުމަތް ކުރި ބައެއް މުއައްސަސާތައް އުވާލާފައިވާތީ މައުލޫމާތު ހޯދުމުގައި ހުރި ދަތިތައް ހައްލު ކުރުމަށް ކަމަށް ވެސް ރައީސް އޮފީހުން ވަނީ ބުނެފައެވެ.

މި ބަދަލާއި އެކު 43 އަހަރަށް ވުރެ ގިނަ އަހަރު ދައުލަތަށް ހިދުމަތް ކުރެއްވި ބޭފުޅުންގެ ނަންތައް ދައުލަތަށް ޚިދުމަތް ކުރުމުގެ އިނާމަށް ނަން ހުށަހެޅުމަށް މިހާރު ހުޅުއްވައިލައްވައިފައިވާ ފުރުޞަތުގައި، ނަން ހުށަހަޅާކަން ނުޖެހޭނެއެވެ.

ރައީސް އޮފީހުން އިތުރަށް ބުނީ، މީގެ އިތުރުންވެސް 40 އަހަރާއި 42 އަހަރަށްވުރެ ދިގު މުއްދަތެއްގައި ދައުލަތަށް ޚިދުމަތް ކުރައްވައިފައިވާ ބޭފުޅުންގެ ރެކޯޑާއި މަޢުލޫމާތުވެސް ރައީސުލްޖުމްހޫރިއްޔާގެ އޮފީހުން ހޯއްދެވުމަށްފަހު، ކުރިއަށް އޮތް އަހަރުތަކުގައި، ޤައުމީ އިނާމާބެހޭ ކޮމިޓީއަށް ފޮނުއްވާ ގޮތަށް ވެސް ހަމަޖެހިފައިވާ ކަމަށެވެ.

ދައުލަތަށް ޚިދުމަތް ކުރުމުގެ އިނާމު މި އަހަރު ދެއްވުމަށް ހަމަޖައްސަވައިފައި ވަނީ، މިނިވަންދުވަހުގެ މުނާސަބަތުގައި ބާއްވަވާ ރަސްމީ ޖަލްސާގައެވެ.