ފެނަކައިގެ 25 ޕްރޮޖެކްޓެއްގެ މައްސަލަ އެންޓީ ކޮރަޕްޝަން ކޮމިޝަން (އޭސީސީ) އަށް ހުށައަޅާފައިވާ ކަމަށް ފެނަކައިގެ މެނޭޖިން ޑިރެކްޓަރ މުއާޒު މުހައްމަދު ރަޝީދު ވިދާޅުވެއްޖެއެވެ.
މުއާޒު އެކްސް ގައި ކުރެއްވި ޕޯސްޓެއްގައި ވިދާޅުވީ، ކުންފުންޏަށް ގެއްލުންވާގޮތަށް މާކެޓްގައި މި މަސައްކަތްތައް ކުރެވޭނެ އަގަށް ބެލުމެއްނެތި އެސެސްމެންޓެއްވެސް ނަހަދާ ، މަގާމުގެ ނާޖާއިޒު ފައިދާ ނަގައިގެން އިންހައުސްކޮށް ކޮށްފައިވާ 60 ކޮންސްޓްރަކްޝަން ޕްރޮޖެކްޓުގެ ތެރެއިން 25 ޕްރޮޖެކްޓުގެ މައްސަލަ އޭސީސީއަށް ހުށައަޅާފައިވާ ކަމަށެވެ.
"ކުންފުންޏަށް އިންތިހާއަށް ގެއްލުންވާގޮތަށް ބީއޯކިއުއެއް އަދި މާކެޓްގައި މިމަސައްކަތްތައް ކުރެވޭނެ އަގަށް ބެލުމެއްނެތި އަދި އެސެސްމެންޓެއްވެސް ނަހަދާ ، މަގާމުގެ ނާޖާއިޒު ފައިދާ ނަގާ، އިންހައުސްކޮށް ކޮށްފައިވާ 60 ކޮންސްޓްރަކްޝަން ޕްރޮޖެކްޓުގެ ތެރެއިން 25 ޕްރޮޖެކްޓުގެ މައްސަލަ އޭސީސީއަށް ވާނީ ހުށަހަޅާފައި."
މުއާޒް ވިދާޅުވިއެވެ.
މުއާޒް ވިދާޅުވީ، މި ޕްރޮޖެކްޓް ތަކުގެ ސަބަބުން ފެނަކައަށް އެތައް މިލިއަން ރުފިޔާގެ ގެއްލުން ވެފައިވާ ކަމަށާއި އެތައް ސަޕްލަޔަރުންނަށް ދޭންޖެހޭ ފައިސާ ނުދެވުމުގެ ސަބަބުން ކުންފުނި ވަރަށް ބޮޑަށް ދަރާފައިވާ ކަމަށެވެ.
މުއާޒް ވަނީ މިކަމުގައި ޒިންމާ ވާން ޖެހޭ ފަރާތްތަކުގެ މައްސަލަ ލަސްނުކޮށް ބަލާ ގާނޫނީ ފިޔަވަޅު އަޅަންޖެހޭ ކަމަށް ވެސް ވިދާޅުވެފައެވެ.
މީގެ ކުރިން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަތޮޅު ތެރެއަށް ކުރައްވަމުން ގެންދަވާ ދަތުރުފުޅުގައި ބ.ކެންދޫގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަ ދައްކަވަމުން މުއާޒް ވަނީ އޭނާ ފެނަކައާ ހަވާލުވީ 4.3 ބިލިއަން ރުފިޔާގެ ދަރަންޏާ އެކީ ކަމަށާއި އިން ހައުސްކޮށް ހިންގި ޕްރޮޖެކްޓްތަކުން ކުރީގެ ސަރުކާރުންނާއި މެނޭޖްމަންޓުން ވެފައި ވަނީ ވަރަށް ބޮޑު ހިޔާނާތެއް ކަމަށާއި، މިއީ ވަރަށް ބޮޑު އިހުމާލެއް ކަމަށް ވިދާޅުވެފައެވެ.
ރައީސް ޑރ.މުއިއްޒު އަތޮޅު ތެރެއަށް ކުރެއްވި ދަތުރުފުޅު ތަކުގައި ބައެއް ރަށްތަކުގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން އެމަނިކުފާނު ވެސް ވަނީ އެންމެ ހާލުގައި އޮތީ ފެނަކަ ކަން ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
