އުމްރާގެ އަޅުކަމަށް ފުރާ މީހުން ކުރިއާލައި އެއާޕޯޓަށް ގޮސް ފުރިހަމަ ކުރަންޖެހޭ އެންމެހާ މަރުހަލާތައް ފުރިހަމަ ކުރުމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން އެދިއްޖެއެވެ.

އެމްއޭސީއެލްއިން މިއަދު އެކްސްގައި ކުރި ޕޯސްޓެއްގައި ބުނެފައިވަނީ އެކުންފުންޏަކީ ޕަސިންޖަރުންނަށާއި އާއިލާތަކަށް ފަސޭހަކަމާއެކު ދަތުރުކުރުމުގެ ތަޖުރިބާ ހޯދައިދިނުމަށްޓަކައި ކުރެވެން ހުރި ހުރިހާ މަސައްކަތެއް ކުރަމުންދާ ބައެއްކަމަށެވެ. އަދި އުމްރާގެ އަޅުކަމަށް ފުރުމުގެ ކަންކަން ވީހާވެސް ފަސޭހަކަމާއެކު ކުރިއަށް ގެންދެވޭނެ އިންތިޒާމުތައް ހަމަޖެއްސުމަށް މަސައްކަތް ކުރަމުންދާކަމަށް އެކުންފުނިން ވަނީ ބުނެފައެވެ. 

މިހާރު ދިމާވާ އެންމެ ބޮޑު ދަތިކަމަކީ ޕަސިންޖަރުންގެ އަދަދު އިތުރުވުންކަން ފާހަގަކުރައްވައި އެމްއޭސީއެލްއިން ބުނީ، މިކަމުގެ ސަބަބުން ތޮއްޖެހުން އިތުރުވެ، ދަތުރުވެރިން އެއާޕޯޓުގައި ހޭދަކުރާ ވަގުތުތައް އިތުރުވުމަކީ އެކަށީގެންވާ ކަމެއް ކަމަށެވެ.

އެހެންކަމުން، ފަސިންޖަރުން ކުރިން ތައްޔާރުވެ، ޗެކިން ކުރުމަށް އަވަހަށް އައުމަށް ވަނީ އިލްތިމާސްކޮށްފައެވެ. އަދި އުމްރާގެ އަޅުކަމަށް ފުރަން އަންނަ އެކިއެކި ފަރާތްތަކަށް އެހީވުމަށްޓަކައި އެއާޕޯޓުގެ މުވައްޒަފުން އަބަދުވެސް ތިބޭނެކަމަށް ވަނީ ބުނެފައެވެ.

އަހަރުގައި އުމްރާގެ އަޅުކަމަށް ދިވެހިން ފުރާ ދުވަސްވަރަކީ އެންމެ ބާރުބޮޑު އެއް ދުވަސްވަރެވެ. އެގޮތުން މި އަހަރުގެ ރަމަޟާންމަހުގައި ދިވެހިންގެ އެތައް ސަތޭކަ ބަޔަކު މިހާރުވެސް މައްކާގަައި އުމްރާގެ އަޅުކަން އަދާކުރަމުން އެބަދެއެވެ.