އަންހެން ކުއްޖަކު ގުރޫމް ކޮށްގެން އޭނާ ގެސްޓްހައުސް އަކަށް ގެންގޮސް ރޭޕްކުރި މައްސަލައިގައި ދައުލަތުން ދައުވާ އުފުލާފައި ވަނިކޮށް މިނިވަން ކޮށްފައިވާ އަނީސް ހިލްމީ އަލުން ބަންދު ކުރަން ހައިކޯޓުން އަމުރު ކޮށްފިއެވެ.

ހއ. ބާރަށު، ސިލްސިލާގެ އަނީސް ފުރަތަމަ، މީގެ ތިން އަހަރު ކުރިން ހައްޔަރު ކުރީ މާލޭގެ ގެސްޓްހައުސްއެއްގައި 11 އަހަރުގެ އަންހެން ކުއްޖަކު ރޭޕް ކުރި މައްސަލައިގައެވެ. އޭރު އޭނާ ބަންދުކުރީ ޝަރީއަތް ނިމެންދެނެވެ.

އޭނާގެ މައްޗަށް ދައުލަތުން އުފުލާފައި ވަނީ، ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްދުގައި އަތްލުމުގެ ކުށުގެ ދައުވާއާއި ކުޑަކުއްޖަކަށް ޖިންސީ ގޯނާކުރުމަށްޓަކައި އެކުއްޖާ ގްރޫމްކުރުމުގެ ކުށުގެ ދައުވާގެ އިތުރުން އެމައްސަލައާއި ގުޅިގެން އަނީސްގެ މޮބައިލް ފޯނު އެނަލައިޒް ކުރުމުން އޮރިޔާން މަންޒަރު ދައްކުވައިދޭ ފޮޓޯއާއި ވީޑިއޯ ފެނިފައިވާތީ އޮރިޔާންކާޑު ގެންގުޅުމުގެ ދައުވާއެވެ.

އޭގެ ތެރެއިން އޮރިޔާން ކާޑު ގެންގުޅުމުގެ ކުށުގެ ދައުވާ ސާބިތުވާކަމަށް ކަނޑައަޅައި 01 މަހާއި 06 ދުވަހުގެ މުއްދަތަށް ޖަލަށްލުމަށް 29 މާރިޗު 2023 ގައި ޙުކުމް ކޮށްފައިވާއިރު އެ ހުކުމް ތަންފީޒުކޮށް ވަނީ ނިމިފައެވެ.

ދައުލަތުން ކުރި ދައުވާތަކުގެ ތެރޭގައި ބުނެފައިވަނީ އަނީސް ހިލްމީ އެކުއްޖާއަށް ފޯނެއް ގަނެދޭނެކަމަށް ބުނެ، އެކުއްޖާ ގޮވައިގެން ފިހާރައަށް ގޮސް، އެކުއްޖާއަށް ދަޅަކާއި، ބޮޑީ ސްޕްރޭ ފުޅިއެއް ގަނެދީފައިވާ ކަމަށެވެ. އެއީ ކުއްޖާ ގްރޫމް ކުރުމަށް އޭނާ ކޮށްފައިވާ އަމަލުތަކެއްކަމަށް ދައުވާގައި ބުނެފައިވެއެވެ.

އަނީސް ޝަރީއަތް ނިންމެންދެން ބަންދުކޮށްފައި ވަނިކޮށް ކުރިމިނަލް ކޯޓުން އަމުރުކޮށްގެން އޭނާ ދޫކޮށްގައިވަނީ ފާއިތުވި ފެބްރުއަރީމަހުގެ 21 ވަނަ ދުވަހުއެވެ.

ކްރިމިނަލް ކޯޓުގެ އެ ނިންމުން ޕީޖީ އޮފީހުން ހައިކޯޓުގައި އިސްތިއުނާފް ކޮށްފައިވާއިރު، ހައިކޯޓުން ބުނީ ޝަރީއަތް ނިމެންދެން ބަންދުކޮށްފައި ހުރި މީހަކު ބަންދުން ދޫކޮށްލާ އަމުރެއްގައި ޝަރީއަތް ނިމެންދެން ބަންދުކޮށްފައި ހުރި މީހާގެ ހާލަތު ބަދަލުވީ ސަބަބު ކޯޓުން ބަޔާންކޮށްފައި އޮންނަން ވާނެ ކަމަށާ، އެކަން އަނީސް ދޫކޮށްލި އަމުރުގައި ނެތް ކަމަށެވެ. 

އެހެން ކަމުން އެ ކޯޓުން އިއްޔެ ވަނީ އަނީސް ރިމާންޑު ޖަލެއްގައި ބަންދުކުރަން އަމުރުކޮށްފައެވެ. އަދި ހަތް ދުވަހުގެ ތެރޭގައި އެ ކޯޓުން ކަނޑައެޅި އުސޫލުތަކުގެ މަތިން އޭނާގެ ބަންދާ މެދު ގޮތެއް ކަނޑައެޅުމަށް އަމުރުކޮށް، ކްރިމިނަލް ކޯޓުގެ އަމުރު ބާތިލުކޮށްފަ އެވެ.