ވިލިމާލޭގައި މިހާރު ކުރިއަށްދާ "އޮބިއަން ޓީއެފްޓީ 11 ވަނަ ރަމަޟާން ފުޓްސަލް ޗެލެންޖު 2024" ގައި ހޯމަ ދުވަހުގެ ރޭ ކުޅެވުނު ފުރަތަަމަ މެޗުގައި ގުރޫޕް ސީގެ ބޫޗީސް އާއި އެނާރްކީ އެފްޓީ ވާދަކުރި މެޗު 8-4 ގެ ނަތީޖާއަކުން ކާމިޔާބުކޮށް އެނާރްކީ އެފްޓީން މުބާރާތް ނިންމާލީ މޮޅަކާއެކު އެވެ.

މުބާރާތުގައި އެނާރްކީ އެފްޓީން ކުޅުނު ފުރަތަމަ މެޗުގައި ގޯޓު އެސްސީ އަތުން 4-2 ގެ ނަތީޖާއަކުން ބަލިވިއިރު، ދެވަނަ މެޗުގައި އެލްކިއު ސްޕޯޓްސް ކުލަބު އަތުން އެޓީމު ބަލިވީ 6-2 ގެ ނަތީޖާއަކުންނެވެ. އަދި މިމެޗުން ބަލިވި ބޫޗީސް މުބާރާތުގައި ކުޅުނު ފުރަތަަމަ މެޗުގައި 8-5 ގެ ނަތީޖާއަކުން އެލްކިއު ސްޕޯޓްސް ކުލަބު އަތުން ބަލިވިއިރު، ދެވަނަ މެޗުގައި ގޯޓު އެސްސީ އަތުން އެޓީމު ބަލިވީ 10-1 ގެ ތަފާތުބޮޑު ނަތީޖާއަކުންނެވެ.

ވިލިމާލޭ ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފުގައި އެނާރްކީ އެފްޓީން ހަތަރު ލަނޑުގެ ލީޑެއް ނެގިއިރު، މެޗުގެ ދެވަަނަ ހާފުގައި ދެޓީމުގެ ފަރާތުން ވަނީ ވަރަށް ވާދަވެރި ކުޅުމެއް ފެނިގެން ގޮސްފައެވެ. އެގޮތުން މިހާފުގައި ދެޓީމުން ކުރެ ކޮންމެ ޓީމަކުން ވަނީ ހަތަރު ލަނޑު ކާމިޔާބުކޮށްފައެވެ.

Advertisement

މިއާއެކު މެޗުގެ ކުޅުން ނިމިގެންދިޔައީ 8-4 ގެ ނަތީޖާއަކުން އެނާރްކީ އެފްޓީ ކުރީގައި އޮވެގެންނެވެ. އަދި މިމެޗުގައި އެޓީމުގެ އިސްމާއިލް މިމްރާހް ތިން ލަނޑު ކާމިޔާބުކޮށް ހެޓްރިކް ހެދި އިރު، އެޓީމުގެ އަބްދުﷲ ފިޒާން އަބްދުލް ޤަފޫރު ވަނީ ދެ ލަނޑު ކާމިޔާބުކޮށްފައެވެ.

މީގެ އިތުރުން އެޓީމުގެ މުހައްމަދު ނާބިތު ހުސެއިން، އާލިމް މުހައްމަދު އަދި ޔާޒީ ނާޒިމް މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ. އަދި މިމެޗުގައި ބޫޗީސްގެ ރިލްވާން ޝަރީފް ދެލަނޑު ކާމިޔާބު ކުރި އިރު، އެޓީމުގެ މުހައްމަދު ރަޝީދު އަދި ހަސަން މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ އެނާރްކީ އެފްޓީގެ އިސްމާއިލް މިމްރާހް އެވެ.

މިމެޗުން ލިބުނު ތިން ޕޮއިންޓާއެކު ގުރޫޕް ސްޓޭޖުގައި ކުޅުނު ތިން މެޗުން އެނާރްކީ އެފްޓީއަށް ތިން ޕޮއިންޓް ލިބިފައިވާއިރު އެޓީމުން މުބާރާތް ނިންމާލީ ގުރޫޕް ސީގެ ތިންވަނައިގައި އޮވެއެވެ. އަދި މިމެޗުން ބަލިވި ބޫޗީސް ކުޅުނު ތިން މެޗުން ވެސް ބަލިވެ މުބާރާތް ނިންމާލީ ގުރޫޕްގެ ފުލުގައި އޮވެއެވެ.

ޗެންޕިއަން ޓީމަށް 50,000 އަދި ރަނަރަޕް ޓީމަށް 30,000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު 32 ޓީމަކުން ބައިވެރިވެފައިވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 32 ޓީމު 8 ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު މުބާރާތުގެ ދެވަނަ ބުރަށް ހޮވޭގޮތަށެވެ.

މިމުބާރާތުގެ މެއިން ސްޕޮންސަރ އަކީ އޮބިއަން އެވެ. އަދި މުބާރާތުގެ މީޑިއާ ޕާޓްނަރަކަށް ހަމަޖައްސާފައި ވަނީ ވޮއިސް އެވެ.