ޕިރިނީ އަކީ ވަރަށް ގިނަ ބާވަތް ތަކުން ތައްޔާރު ކޮށްލެވޭ ވަރަށް މީރު ފޮނި އެއްކެވެ. ބަރަބޮލުންނާއި، ރަވައިންނާއި ފާރޮށިންވެސް ޕިރިނީ ތައްޔާރުކޮށްލެވިދާނެ އެވެ. މިއަދު ވޮއިސް ގެ ބަދިގެއިން މި ގެނެސްދެނީ ކެރެޓުން ޕިރިނީ ތައްޔާރު ކުރާނެ ގޮތެވެ. 

3 ބޮޑު ކެރެޓް (ހިމުންކޮށް ގާނާފައި) 

1 ދަޅު ގެރިކިރު

2 މޭޒުމަތީ ސަމުސާ ކަސްޓަޑް ޕައުޑަރ

1/2 ސައި ސަމުސާ ވެނީލާ އެސެންސް

1/3 ޖޯޑު ކަނަމަދު (ކުދި ކޮށް ކޮށާފައި/ ބޮޑެތިކޮށް މުގުރާފައި) 

1/2 ޖޯޑު ފެން

1) ތެއްޔަކަށް ގާނާފައި ހުރި ކެރެޓް އެޅުމަށްފަހު، މަތި ޖަހައިގެން މަޑު ގިނީގައި ކައްކައި ކެރެޓް މަޑު ކޮށްލާށެވެ. ދޭތެރެ ދޭތެރެއިން ކެރެޓް ކޮޅު ހަލުވާލަން ވާނެއެވެ. ކެރެޓް މަޑުވުމުން ކެރެޓްގެ ކުލަ ތަންކޮޅެއް ގަދަ ކުލައަކަށް ބަދަލުވާނެ އެވެ. ކެރެޓް މަޑު ކުރާނީ ފެން ނާޅައެވެ. 

2) ކެރެޓް މަޑު ވުމުން ގެރިކިރު ދަޅު އެއްކޮށް އަޅާލުމަށްފަހު ރަނގަޅަށް ހަލުވާލާށެވެ. 

3) ދެން ގެރިކިރު ހުސްކުރި ދަޅަށް 1/2 ޖޯޑު ފެން އެޅުމަށްފަހު، އޭގެ ތެރެއަށް ކަސްޓަޑް ޕައުޑަރ އަޅައި ގިރާލާފައި ކަސްޓަރޑްވެސް ޕިރިނީގެ ތެރެއަށް އަޅާލާށެވެ. ހުރިހާ ތަކެތި ރަނގަޅަށް ހަލުވަމުންދާށެވެ.

4) ޕިރިނީ ކޮޅު އޮލަ ވުމުން ވެނީލާ އެސެންސް އަދި ކަނަމަދު އަޅައި އެކުލަވާލުމަށް އުނދުން ނިއްވާލާށެވެ. 

5) ދެން ޓްރޭ އަކަށް ޕިރިނީ އަޅާފައި އޭގެ މައްޗަށް ގާނިޝް ކޮށްލަން ކަނަމަދު ކޮޅެއް އަޅާލާށެވެ.