ޗައިނާ ސަރުކާރުގެ ހިލޭ އެހީގެ ދަށުން މާލޭގެ ހުރިހާ މަގުތަކެއް ހަދައިދިނުމަށް ނިންމާފައިވާ ކަމަށް ރައީސް ޑރ. މުހައްމަދު މުޢިއްޒު އިއުލާންކުރައްވައިފިއެވެ.
ކުރިއަށް އޮތް ރައްޔޮތުންގެ މަޖިލީހުގެ އިންތިހާބުގައި ޕީއެންސީގެ ތާއީދާއެކު މައްޗައްގޯޅި މެދު ދާއިރާއަށް ވާދަކުރައްވާ އަހްމަދު ޟަމީރުގެ ކެމްޕެއިން ޖަގަހަ ހުޅުވުމަށް ބޭއްވި ޖަލްސާގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ މާލޭގެ މަގުތަކަކީ ހަދަން ޖެހިފައި އޮތް ތަނެއްް ކަމަށެވެ.
އަދި އެކަމަށްޓަކައި ބަޖެޓްވެސް ކަނޑައެޅިފައިވަނިކޮށް އެމަނިކުފާނު މާލޭގެ މޭޔަރ ކަމަށް އިންތިޚާބުވެވަޑައިގެންނެވުމާއިއެކު، ކުރީ ސަރުކާރުން ބަޖެޓް ހިފެހެއްޓި ކަން ރައީސް މުޢިއްޒު ފާހަގަކުރެއްވިއެވެ. އެކަން އެ ސަރުކާރުން ކުރީ އެމަނިކުފާނަށް އެންގެވުމަކާއި ވެސް ނުލައި ކަމަށް ރައީސް ވުދާޅުވިއެވެ.
މަގު ހެދުމުގެ މަޝްރޫއުވެސް (އެ ސަރުކާރުނަ) ކެންސަލް ކޮށްލީ. މާލޭ ރައްޔިތުންނަށް ކޮންމެ ގޮތެއް ވިޔަސް ވަރިހަމަ ކަމަށް ނިންމާފައި. މިއީ އެންމެނަށްވެސް އެނގޭ ކަމެއް
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
އެހެންކަމުން، މާލެއަށް ކަމެއް ކުރެވޭނީ މަޖިލީހަށް އެމްޑީޕީގެ މެޖޯރިޓީ ލިބިގެން ކަމަށް ބުނެ އެމްޑީޕީން ދައްކަނީ ހަގީގަތާ ހިލާފު ވާހަކަތަކެއް ކަމަށާ އެވާހަކަ ގަބޫލުކުރަން ނުޖެހޭ ކަމަށް ރައީސް ވިދާޅުވިއެވެ.
ކަންމިހެން ހުރި ނަމަވެސް މާލޭގެ މަގުތަކަކީ ދެވަނައަށް އެންމެ މުހިންމު ކަމެއް ދީގެން މި ސަރުކާރުން ކުރާ ކަމެއް ކަމަށް ބަލައިގެން އެކަން ކުރައްވާނެ ކަމަށް ރައީސް ވުދާޅުވިއެވެ.
"މާލޭގެ މަގުތައް ދެވަނަ މައްސަލައެއްގެ ގޮތުގައި ހައްލުކުރަން ޖެހޭ ކަމެއްގެ ގޮތުގައި ފަށަން ނިންމާފައި މިއޮތީ. ދެން ހަމަ ވަރަށް އުފަލާއެކީ ދަންނަވާލަން ބޭނުން ޗައިނާ ސަރުކާރުން ހިލޭ އެހީގައި މުޅި މާލެ ސިޓީގެ ހުރިހާ މަގެއް ހަދާ ގޮތަށް މިހާރު ހަމަޖެހިފަ އޮތީ،"
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
ރައީސް ވިދާޅުވީ އެގައުމުގެ ކަމާއިބެހޭ ޓީމު މިހާރުވަނީ ރާއްޖެ އައިސްފައި ކަމަށާއި މި ކަމާއި ގުޅުންހުރި ފަންނީ މަސައްކަތްތައް ނިމުމުން ޢަމަލީ މަސައްކަތް ފަށާނެ ކަމަށެވެ. އަދި މަގުތައް ހަދާ ނިމޭއިރު މަގުތަކުގައި ހުރި ހުރިހައި މައްސަލައެއް ހައްލުވާނެ ކަމަށް ވެސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
