މިދިޔަ އަހަރު އޮކްޓޫބަރު މަހުގެ 7 ވަނަ ދުވަހު ފެށިގެން ޣައްޒާގައި ހިނގަމުންދާ ގަތުލު އާއްމަށް 6 މަސްވި ފަހުން ހަނގުރާމަ ހުއްޓާލުމަށް ގޮވާލައި އދ އިން ރޭ ފާސްކުރި ގަރާރަށް އިސްރާއިލުން ޢަމަލުކުރުމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ގޮވާލައްވައިފިއެވެ. 

މީގެ ކުރިން މި ހަނގުރާމަ ހުއްޓާލުމަށް ގޮވާލާ އެއްވެސް ގަރާރެއް ފާސްނުކޮށް އޮތުމަށްފަހު، އދ ގެ ސަލާމަތީ މަޖިލީހުން ރޭގައި ފާސްކުރި މި ގަރާރުގައި ހަނގުރާމަ ހުއްޓާލުމުގެ އިތުރުން، ރަހީނު ކޮށްފައިވާ މީހުން އެއްވެސް ޝަރުތަކާއި ނުލައި ދޫކޮށްލުމަށް ވެސް ވަނީ ގޮވާލާފައެވެ.

މި މަޖިލީހުގެ ދާއިމީ ނޫން 10 މެމްބަރުން ހުށައެޅި މި ގަރާރުގައި މިހާރު ހިނގަމުންދާ ރަމަޟާން މަހުގައި ހަމަލާތައް ވަގުތުން ހުއްޓާލުމަށާއި ޣައްޒާއަށް ދެމުންދާ އެހީ މިހާރަށްވުރެ ބޮޑަށް ފުޅާކުރުމަށް ވެސް ވަނީ ގޮވާލާފައެވެ.

އެ ގަރާރު ފާސްކުރުމާއި ގުޅިގެން ރައީސް ޑރ. މުހައްމަދު މުއިއްޒު އެކްސްގައި ކުރެއްވި ޕޯސްޓެއްގައި ވަނީ މި ބަރަކާތްތެރި ރަމަޟާން މަހުގައި ސަލާމަތީ މަޖިލީހުން ފާސްކުރި އެ ގަރާރެއް ވޭހާވެސް އަވަހަށް ޢަމަލު ކުރުމަށް ގޮވާލަައްވަމުން އެފަދަ ގަރާރެއް ފާސްކުރުން މާބޮޑަށް ލަސް ވެސް ވެއްޖެ ކަމަށް ވިދާޅުވެފައެވެ.

ރައީސް އިތުރަށް ވިދާޅުވީ ހަމަލާތައް ހުއްޓުމަކަށް ގެނެވިދާނެ ކަމުގެ އުންމީދަކީ ވެސް މި ބަރަކާތްތެރި ރަމަޟާން މަހުގެ ހަގީގީ ރޫހު ޣައްޒާގެ ރައްޔިތުންނަަށް ގެނެސްދޭނެ ކަމެކެވެ.

ފަލަސްތީނުގައި ހިންގަމުންދާ ގަތުލު އާއްމު ހުއްޓާލާ ގަރާރު ފާސްކޮށްފައި ވަނީ އދ ގެ ސަލާމަތީ މަޖިލީހުގެ 15 މެމްބަރުންގެ ތެރެއިން 14 މެމްބަރުންގެ ވޯޓުންނެވެ. މި ގަރާރަށް ވޯޓް ދިނުމަށް ބައިވެރިވެފައި ނުވަނީ މީގެ ކުރިން ވެސް މި މައްސަލަ އާއި ގުޅިގެން ހުށައެޅި ހުރިހާ ގަރާރެއްގައި ވެސް ވީޓޯގެ ބާރު ބޭނުން ކުރަމުން އައި އެމެރިކާއިންނެވެ.

އެމެރިކާއިން އދ އަށް ކަނޑައަޅާފައި ހުންނަވާ ސަފީރު ލިންޑާ ތޯމަސް ގްރީންފީލްޑް ބުނީ ވޯޓްގައި ބައިވެރިނުވުމަށް ނިންމީ މި ގަރާރުގައިވާ ހުރިހާ ކަމަކަށް އެމެރިކާ އިން އެއްބަސް ނުވެވޭތީ ކަމަށެވެ. ނަމަވެސް އެމެރިކާއިން ވީޓޯގެ ބާރު ބޭނުންނުކުރާތީ، އިސްރާއީލުން ވަނީ އެމެރިކާ އަށް ފާޑުކިޔުންތައް އަމާޒުކޮށްފައެވެ.

ޔަހޫދީން ޣައްޒާއަށް ދެމުންގެންދާ ހަމަލާތަކަށް ގާތްގަނޑަކަށް ހަ މަސް ދުވަސްފަހުން މިފަދަ ގަރާރެއް ފާސްކުރެވުނުއިރު މިއީ ހަނގުރާމަ ހުއްޓައިލުމާ ދިމާއަށް އެޅުނު ވަރަށް މުހިންމު ފިޔަވަޅެއް ކަމަށާއި، މި ގަރާރު ތަންފީޒު ކުރަން ޖެހޭ ކަމަށް ބައިނަލްއަގުވާމީ ފަރާތްތަކުން އަންނަނީ ބުނަމުންނެވެ.

މިދިޔަ އަހަރުގެ އޮކްޓޯބަރު 7 ވަނަ ދުވަހުން ފެށިގެން ޔަހޫދީން ޣައްޒާއަށް ކެނޑިނޭޅި ދެމުންދާ ހަމަލާތަކުގެ ސަބަބުން ޣައްޒާގެ 2.3 މިލިއަން މީހުންގެ އާބާދީގެ ތެރެއިން 90 ޕަސެންޓު މީހުން އެކި ސަރަހައްދުތަކަށް ހިޖުރަކުރަން މަޖުބޫރުވެފައިވާއިރު، 32،000 އަށްވުރެ ގިނަ މީހުން ވަނީ ޝަހީދުވެފައެވެ.