ރޯލްސް އަކީ ނުވަތަ އޮޅިފޮޅި އަކީ ދިވެހީން އެކި ގޮތް ގޮތަށް އެކި އެއްޗެހި ލައިގެން ތައްޔާރުކޮށް އުޅޭ އެއްޗެކެވެ. މިއަދު ވޮއިސްގެ ބަދިގެއިން މިގެނެސްދެނީ ކުކުޅާއި ޕާން ބޭނުން ކޮށްގެން ވަރަށް މީރުކޮށް ރޯލްސް ތައްޔާރު ކުރާނެ ގޮތެވެ. ކުކުޅުގެ ބަދަލުގައި ބޭނުން ނަމަ ދަޅުމަސް ވެސް ބޭނުން ކުރެވިދާނެއެވެ. މި ރެސިޕީވެސް ކިޔުންތެރިންނަށް ކަމުދާނެ ކަމަށް އުއްމީދު ކުރަމެވެ. 

6-7 ޕާން ފޮތި

500 ގްރާމް ބޯންލެސް ކުކުޅު ( ކުދިކޮށް ކިޔުބްކޮށް ކޮށާފައި)

1 ކެޕްސިކަމް ( ކަރުގަނޑު ނަގައި ކިޔުބްކޮށް ކޮށާފައި)

1 ފިޔާ (ކިޔުބްކޮށް ކޮށާފައި)

ގިތެޔޮ މިރުސް (ކުދިކޮށް ކޮށާފައި)

1 ސައި ސަމުސާ ލޮނުމެދު ޕޭސްޓް

1/2 ސައިސަމުސާ އިނގުރު ޕޭސްޓް

ހިކަނދިފަތް ( ކުދިކޮށް ކޮށާފައި)

1 ސައިސަމުސާ އޮއިސްޓަ ސޯސް

1 ސައި ސަމުސާ ސޯޔާ ސޯސް

3 މޭޒުމަތީ ސަމުސާ ފްރައިޑް ޗިކަން ޗިލީ ސޯސް

1 ސައި ސަމުސާ ތެޅި މިރުސް

2 މޭޒުމަތީ ސަމުސާ ތެޔޮ

ލޮނު

މޮޒެރެއްލާ ޗީޒް (ގާނާފައި) 

1 ޖޯޑް ފާރޮށި ކުނޑި

6 ބިސް

1) ފިޔާ، ލޮނުމެދު ޕޭސްޓް، އިނގުރު ޕޭސްޓް، ހިކަނދިފަތް އަދި ކެޕްސިކަމް ތެޔޮ ފޮދަކަށް އަޅައިގެން ރަނގަޅަށް ފްރައިކޮށްލާށެވެ. 

2) އޭގެ ތެރެއަށް ކުކުޅު ކޮޅު އަޅާލުމަށްފަހު، ސޯޔާ ސޯސް އަދި އޮއިސްޓަރ ސޯސް، ތެޅި މިރުސް އަޅާލައި ކުކުޅުކޮޅު ރަނގަޅަށް ރޯފިލައި ކުޑަކޮށް މުށިކުލަ އަރަންދެން ކައްކާލާށެވެ. ކެކުމުން ފްރައިޑް ޗިކަން ސޯސް އަޅައި އެކުލަވައިލުމަށްފަހު އުނދުން ނިއްވާލާށެވެ. 

3) ދެން ޕާން ފޮތިތަކުގެ ކައިރި ނެގުމަށްފަހު، ރޮށި ދަމާ އެތިން ރަނގަޅަށް ދަމާލާށެވެ. އަދި އޭގެ އެއް ސައިޑަށް ތެރެއަށް ކުކުޅު ކޮޅުން ގާތްގަނޑަކަށް ދެ މޭޒުމަތީ ސަމުސާ އެޅުމަށްފަހު، އޭގެ މައްޗަށް ގާނާފައިހުރި ޗީޒް ކޮޅެއް އަޅާލާފައި އޮޅާލާށެވެ. ޕާނުގެ ފަހު ތަންކޮޅު ފެން ފޮދަކުން ނުވަތަ ރޯބިސް ލައިގެން ތަތް ކޮށްލާށެވެ. 

4) ރޯލްތައް ތައްޔާރުކޮށް ނިމުމުން، ބިސް ތައް ތައްޓަކަށް އެޅުމަށްފަހު، ބިހުގެ ތެރެއަށް ރޯލް ލުމަށްފަހު، ރަނގަޅަށް ބިސް އުނގުޅާލުމަށްފަހު، ރޯލް ފާރޮށި ކުނޑީގެ ތެރެއަށްލައި ރަނގަޅަށް ފާރޮށި ކުނޑި އުނގުޅާލާށެވެ. 

5) ދެން ތަވައެެއްގެ ތެރޭގައި މަޑު ގިނީގައި ރޯލްސްތައް ތެލުލާލާށެވެ. ޗީޒީ ޗިކަން ބްރެޑް ރޯލްސް އެހުރީ ތައްޔާރުވެފައެވެ.