ހިޔާ ފުލެޓްގެ މެއިލް ބޮކްސްތަކަށް ނަޞާރާ ދީނުގެ ލިޔުން ތަކެއް އެޅި މައްސަލާގައި ދެ ފަތުރުވެރިން ފުލުހުންގެ ބެލުމުގެ ދަށަށް ގެންގޮސްފިއެވެ. 

ހިޔާ ފުލެޓްގެ މެއިލް ބޮކްސް ތަކަކަށް ބައިބަލްގެ ދިވެހި ތަރުޖަމާ އާއި، ޖީޒަސް ގެ ދިވެހި ބަހަށް ތަރުޖަމާ ކޮށްފައިވާ ފިލްމުގެ ލިންކުގެ އިތުރުން ނަޞާރާ ދީނާއި ގުޅެ އެކި މައުލޫމާތު ލިބޭ ލިންކު ތަކެއް ލިޔެފައިވާ ކާޑު ތަކެއް ދެ އަންހެނުން އެޅި މައްސަލައެއް މިއަދު ވަނީ ފެންމަތިވެފައެވެ. 

އެކަމާއި ގުޅިގެން ގިނަ ބައެއް ކަންބޮޑުވުންތައް ފާޅުކުރަމުންދަނިކޮށް، ދާދި ދެންމެ އަކު ފުލުހުންގެ މީޑިއާ އޮފިޝަލް ވިދާޅުވީ، ހިޔާ ފުލެޓްގެ މެއިލް ބޮކްސް ތަކަށް ދިވެހި ރާއްޖޭގެ ދީނީ އެއްބައިވަންތަކަން ހިމާޔަތްކުރުމުގެ ގާނޫނާ ޚިލާފް ލިޔުންތަކެއް އެޅި މައްސަލާގައި ދެ އަންހެނަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. 

އެދެމީހުންނަކީވެސް ޖަރުމަނު ވިލާތަށް ނިސްބަތްވާ ދެމީހުން ކަމަށާ އެމީހުން ރާއްޖެ އައިސްފައި ވަނީ ޓޫރިސްޓް ވިސާގައި ކަމަށްވެސް އޮފިޝަލް ވިދާޅުވިއެވެ. 

މީގެ އިތުރުން ފުލުހުންގެ މީޑިއާ އޮފިޝަލް ވިދާޅުވީ އެ މައްސަލަ އާއި ގުޅިގެން ބަލަންޖެހޭ ކަންކަން ފުލުހުން ބަލަމުން އަންނަ ކަމަށެވެ.