މިއަހަރުގެ ރަމަޟާން މަހުގެ ފުރަތަމަ 10 ދުވަހުގެ ނިޔަލަށް ފިޠުރު ޒަކާތުގެ ގޮތުގައި 1.5 މިލިއަން ރުފިޔާ ލިބިފައިވާކަމަށް އިސްލާމިކް މިނިސްޓްރީން ބުނެފިއެވެ.

މިނިސްޓްރީއިން ހާމަ ކުރި ތަފާސްހިސާބުތަކަށް ބަލާއިރު މި އަހަރުގެ ރަމަޟާން މަހުގެ ފުރަތަމަ 10 ދުވަހުގައި 1,599,113 (އެއްމިލިޔަން ފަސްލައްކަ ނުވަދިހަ ނުވަހާސް އެއްސަތޭކަ ތޭރަ ރުފިޔާ) ރުފިޔާ ލިބިފައިވެއެވެ.

ޒަކާތް ދައްކާފައިވާ ބާވަތްތަކުގެ ތަފާސްހިސާބަށް ބަލާއިރު އެންމެ ގިނަ މީހުން ޒަކާތް ދައްކާފައިވަނީ ހަނޑުލުގެ ބާވަތްތަކުންނެވެ.

އެގޮތުން 22،759 މީހުން އާދައިގެ ހަނޑުލުން ޒަކާތް ދައްކާފައިވާއިރު، އާދައިގެ ހަނޑުލުން ދައްކާފައިވާ ޒަކާތު ފައިސާގެ ޖުމުލަ އަދަދަކީ 273,108 ރުފިޔާއެވެ.

12426 މީހަކު ބާސްމަތީ ހަނޑުލުން ޒަކާތް ދައްކާފައިވާއިރު، މި ބާވަތުގެ ހަނޑުލުން ދައްކާފައިވާ ޒަކާތުގެ ޖުމުލަ އަގު 1،191،060 ރުފިޔާއަށް އަރައެވެ. މީގެ އިތުރުން ރަތް ހަނޑުލާއި ތައިލެންޑް ހުދު ހަނޑުލުންވެސް ޒަކާތް ދައްކާފައި ވެއެވެ.

މި އަހަރުގެ ރަމަޟާން މަހުގެ ފުރަތަމަ ދިހައެއްގައި ފުށުން, ފިޠުރު ޒަކާތް ދައްކާފައިވާ މީހުންގެ އަދަދަކީ 2306 މީހުންނެވެ. ފުށުން ދައްކާފައިވާ ފިޠުރު ޒަކާތުގެ އަގަކީ 48،605 ރުފިޔާއެވެ.

ފިޠުރު ޒަކާތަކީ ރަމަޟާންމަހު ރޯދަހިފައި ނިމުމުން, ޢީދު ނަމާދަށް މީހުން ނުކުތުމުގެ ކުރިން، ޒަކާތް ޙައްޤުވާ މީހުންނަށް ދޭން ފަރުޟުކުރައްވާފައިވާ އެއްޗެކެވެ. ރަމަޟާންމަހުގެ ކޮންމެ ދުވަހަކުވެސް ފިޠުރު ޒަކާތް ނެރެވިދާނެ ކަމަށް ޢިލްމުވެރިން ވިދާޅުވެއެވެ. ޢީދު ނަމާދަށްވުރެ ޒަކާތް ދެއްކުން ފަސްކުރުމަކީ ޙަރާމް ކަމެކެވެ.