އައިޔޫއެމްގައި މަސައްކަތް ކުރައްވާ ފަލަސްޠީނުގެ ޕްރޮފެސަރެއް ކަމަށްވާ ޑރ. ހަސަން އަލް ކުރްދީގެ އާއިލާ ޣައްޒާއިން މިސްރަށް ނެރުމަށް ކުރަންޖެހޭ ހުރިހާ ޚަރަދެއް ކުރުމަށް އިންޓަނޭޝަނަލް އެއިޑް ކެންޕެއިން، އައިއޭސީން ނިންމައިފިއެވެ. 

ގާޒާއަށް ދެމުންދާ ހަމަލާތަކުން ސަލާމަތްވި އާއިލާ ރާއްޖެ ގެންނަން މަސައްކަތް ކުރަމުންދާ ކަމަށް ޕްރޮފެސަރު ޑރ ހަސަން ކުރްދީ މީސްމީޑިއާ އާއި ބައެއް އޮންލައިން ނޫސް ތަކަަށްވެސް ވަނީ މިއަދު މައުލޫމާތު ދެއްވާފައެވެ. 

އެގޮތުން ޕްރޮފެސަރު، ޑރ. ހަސަން އަލް ކުރުދީ ބުނެފައިވާގޮތުން ގާޒާގެ ރަފަހްގައި އޭނާގެ ދެ އަންހެން ދަރިންނާއި ދެ ފިރިހެން ދަރިންގެ އިތުރުން އާއިލާއެއްވެސް ދަނީ ދިރިއުޅެމުންނެވެ. އަދި އެ އާއިލާ އެ ތަނުން ސަލާމަތްކުރަން ބޮލަކަށް 5،000-10،000 ޑޮލަރު ދައްކަންޖެހޭ ކަމަށް މައުލޫމާތު ދެއެވެ. އެހާ ގިނަ ފައިސާ ދެއްކުމުގެ ތަނަވަސްކަން ފްރޮފެސަރ ޑރ ކުރްދީގެ ނެތްކަންވެސް އޭނާ ފާހަގަކުރިއެވެ. 

ޕްރޮފެސަރު، ޑރ. ހަސަން އަލް ކުރުދީ 

އެކަމާއި ގުޅިގެން އައިއޭސީން މިއަދު ކުރި ޕޯސްޓެއްގައި ބުނީ ޑރ.ކުރްދީގެ އާއިލާ ޣައްޒާއިން މިސްރަށް ނެރުމަށް ކުރަން ޖެހޭ މަސައްކަތް އައިއޭސީން ކުރަމުންދާ ކަމަށެވެ. 

މިކަމާއި ގުޅޭ އިތުރު މައުލޫމާތު ވޮއިސް އަށް ދެއްވަމުން އައިއޭސީން ބުނީ، ޕްރޮފެސަރ ގެ އާއިލާ އެންމެން ޣައްޒާއިން ނެރުމަށް 28،000 އެމެރިކާ ޑޮލަރު ބޭނުންވާ ކަމަށެވެ. އެ ޚަރަދުގެ އިތުރުން އެ އާއިލާ މިސްރުން ރާއްޖެ ގެނައުމަށް ދަތުރުކުރާ ފްލައިޓްގެ ޓިކެޓްވެސް އައިއޭސީން ސްޕޮންސަރ ކޮށްދޭކަން ފާހަގަކޮށްފައިވެއެވެ. 

އައިއޭސީން މިހެން ބުނެފައިވާއިރު، އެކަމާއި ގުޅޭގޮތުން ‘ވޮއިސް’ އަށް މައުލޫމާތު ދެމުން ޑރ ކުރްދީ ބުނީ އައިއޭސީން އޭނާގެ އާއިލާ ރާއްޖެ ގެނައުމަށް ކުރަންޖެހޭ ޚަރަދު ކުރުމަށް އެއްބަސް ވެފައިވާ ކަމަށެވެ. އަދި އަންނަ ހަފްތާ ފެށޭއިރު އެކަމަށް ބޭނުންވާ ހުރިހާ ފައިސާ ދޭނެކަމުގެ ޔަގީންކަންވެސް އައިއޭސީން ދީފައިވާ ކަމަށް ބުނެފައިއެވެ. 

“އަންނަ ހަފްތާ ފެށޭއިރު އެމީހުން (އައިއޭސީން) މިސްރަށް އައިސް އެ ފައިސާ ހަވާލު ކުރާނެ ކަމަށް އެމީހުންވަނީ ވައުދުވެފައި. އައިއޭސީން ވަނީ އަހަރެންގެ އާއިލާއަށް ކާބޯތަކެތިވެސް ފޯރުކޮށްދީފައި. އެމީހުންނަކީ ވަރަށް އެހީތެރިވާ ބައެއް.” ވޮއިސް އަށް މައުލޫމާތު ދެއްވަމުން ޑރ ކުރްދީ ބުންޏެވެ. 

މީގެ އިތުރުން ކުރްދީ ވަނީ އައިއޭސީގެ އެހީތެރިކަމާއި އެކު މި ފިތުރު ޢީދުގެ ކުރިން އޭނާގެ އާއިލާ މިސްރަށް ގެނެވޭނެ ކަމަށް އުއްމީދު ކުރާ ކަމަށްވެސް ބުނެފައެވެ. 

ކުރްދީގެ އާއިލާއަށް ފޯރުކޮށްދެވުނު އެހީ

އައިއޭސީން ބުނެފައިވާ ގޮތުން، އޮކްޓޯބަރ 7 ގެ ފަހުން, ޖެނުއަރީ މަހުގައި ދިވެއްސަކަށް ނިސްބަތްވާ އާއިލާއެއްގެ 7 މެމްބަރުންވެސް އެ ޖަމިއްޔާގެ ޚަރަދުގައި ވަނީ މިސްރަށް ގެންދެވިފައެވެ.

އެފަދަ މައުލޫމާތުތައް އައިއޭސީން ވަގުތުން ވަގުތަށް އާއްމުނުކުރާ ސަބަބަކީ , ބައެއް މައުލޫމާތުތަކަކީ ވަރަށް ބޮޑަށް ޒާތީ ދިރިއުޅުމާއި, ޢިއްޒަތާއި ކަރާމާތާ ގުޅުން ހުރި ކަންކަން ކަމުގައި ވާތީ ކަމަށްވެސް ބުނެފައިވެއެވެ. 

އައިއޭސީން ވަނީ ޣައްޒާއަށް އެހީވުމުގައި ދިވެހިން ދެމުންދާ އެއްބާރުލުމަށް ޝުކުރު އަދާކޮށްފައެވެ.