ރޯދަ ވީއްލާ ގަޑިއަށް ތަފާތު ވައްތަރުގެ މަސްހުނި ހެދުމަކީ ވަރަށް ގިނަ ގޭގޭގައި އޮންނަ ސަގާފަތެކެވެ. އެހެންކަމުން، ވޮއިސްގެ ބަދިގެއިން މި ގެނެސްދެނީ ވަރަށް މީރުކޮށް ކިޔުކަންބާ މަސްހުނި ތައްޔާރު ކޮށްލާނެ ގޮތެވެ. ކިޔުންތެރިންނަށް ކަމުދާނެ ކަމަށް އުއްމީދު ކުރަމެވެ. 

3 ބޮޑު ކިޔުކަންބާ (އާވިން ރަނގަޅަށް މަޑުކޮށްފައި) 

1 ދަޅު މަސް 

3/4 ޖޯޑު ހުނި

1 ބޮޑު ފިޔާ ( ތުނިކޮށް ކޮށާފައި)

1/2 ސައި ސަމުސާ ލޮނުމެދު ޕޭސްޓް

1/3 ސައިސަމުސާ އިނގުރު ޕޭސްޓް

ހިކަނދިފަތް ( ކުދިކޮށް ކޮށާފައި)

1 ލުނބޮލުގެ ހުތް

1 ގިތެޔޮ މިރުސް ( ތުނިކޮށް ކޮށާފައި)

1/2 ސައި ސަމުސާ މުގުރި އަސޭމިރުސް

1/3 ސައި ސަމުސާ ދިރި

1 މޭޒުމަތީ ސަމުސާ ރިހާކުރު

ލޮނު

1) ތައްޓެއްގެ ތެރޭގައި ފިޔާ، ލޮނުމެދު، ގިތެޔޮ މިރުސް، ލޮނު އަދި އިނގުރު ރަނގަޅަށް މޮޑެލާށެވެ. ދެން ލުނބޯ ހުތާއި ހިކަނދިފަތްވެސް އެއަށްއަޅާފައި މޮޑެލާށެވެ. 

2) ދެން ހުނި ކޮޅު އަޅަލުމަށްފަހު ދިރި އަދި އަސޭމިރުސް އަޅައިގެން ރަނގަޅަށް މޮޑެލާށެވެ. 

3) އެއަށްފަހު އޭގެ ތެރެއަށް ރިހާކުރު އަޅައިގެން މޮޑެލުމަށްފަހު މަސްދަޅު އަޅާފައިވެސް މަސްހުނިގަނޑު މޮޑެލާށެވެ. 

4) ފަހު ކަމަކަށް ކިޔުކަންބާތައް ވަކި ތައްޓެއްގައި ރަނގަޅަށް މޮޑެލައި ހިމުންކޮށްލުމަށްފަހު މަސްހުނި ގަނޑަށް އަޅައި އެކުލަވައިލުމަށްފަހު ލޮނު ހެޔޮވަރު ކޮށްލާށެވެ. 

ކިޔުކަންބާ މަސްހުންޏަކީ ބަތްޕެނާއި، ރޮށްޓާއި އެކު ކާލަން ވަރަށް މީރު އެއްޗެކެވެ.