ޔަގީންވެގެންވާ މަރު އަހަރެމެންނާއި ބައްދަލު ކޮށްފުމަށްދާންދެން ހެޔޮ އަމަލު ކުރުމުގައި ދެމި ތިބުމަށް ޚުތުބާގައި ނަސޭހަތްތެރިވެއްޖެއެވެ. 

ރަމަޟާން މަހަށްފަހު ހެޔޮޢަމަލު ކުރުންމަތީ ދެމިތިބުމަށް ނަސޭހަތްތެރިވެ މިއަދު އިއްވި ޚުތުބާގައި ބުނީ، ރަމަޟާން މަސް އަހުރެމެންނާ އަލްވަދާޢު ކީ ނަމަވެސް ފުރިހަމަ މުއުމިނަކު، ދުވަހަކު ވެސް ހެޔޮޢަމަލު ކުރުމަކަށް އަލްވަދާޢެއް ނުކިޔާނެ ކަމަށެވެ.

ޚުތުބާގައި ބުނީ އަޅުކަން ކުރުމަކީ، ހަމައެކަނި ވަކި މޫސުމަކާ ގުޅިފައި އޮންނަންވާނޭ ކަމެއް ނޫން ކަމަށާ، އެހެނީ ރަމަޟާންމަހުގެ ވެރި الله އަކީ، އެހެނިހެން މަސްތަކުގެވެސް ވެރި الله  ކަމަށެވެ. އަދި މުއުމިނުންނަކީ، ވަކި މަހެއްގައި، ވަކި މޫސުމެއްގައި، اللهއަށް އަޅުކަން ކުރަން ޖެހޭ ބައެއްނޫން ކަމަށާ މުޅި ޙަޔާތުގައި ވެސް އަޅުކަން ކުރަންޖެހޭނެ ކަމަށެވެ.

“ބައެއް މޫސުންތަކުގައި އަޅުކަން ކުރުން ގިނަވެއެވެ. ރަމަޟާން މަހަކީ އެފަދަ މޫސުމެކެވެ. އެއީ އެ މޫސުމުގެ ބޭނުން ހެޔޮގޮތުގައި ހިފުމަށެވެ.” ހުކުރު ހުތުބާގައި ބުނެފައިވެއެވެ. 

ޚުތުބާގައި އިތުރަށް ބުނީ މުސްލިމަކު ހެޔޮ ޢަމަލެއް ކުރުމަށް ފަހު، އެންމެ މުހިންމުކަމަކީ، އެ ޢަމަލު ޤަބޫލުކުރައްވާތޯ ދެންނެވުމާއި، އެ ޢަމަލުކުރުންމަތީ ދެމިހުރުމުގެ ތައުފީޤަށް އެދި ދުޢާ ދެންނެވުން ކަމަށެވެ. އަދި ރަމަޟާން މަސް އަހަރެމެންނާ ވަކިވެގެން ދަނީ، ޝައްވާލު މަހުގެ ހަ ރޯދައިގެ ނިޢުމަތަށް މަގު ފަހިކޮށްދީފައި ކަމަށެވެ.

އެހެންކަމުން ޚުތުބާގައި ވަނީ ޝައްވާލުމަހުގެ ހަރޯދައަށް ރައްކާތެރިވެ، ހެޔޮޢަމަލު ކުރުންމަތީ ދެމިތިބުމަށް ތިޔަ އެންމެތަކުންނަށް ނަސޭހަތްތެރި ވެފައެވެ. އެހެނީ ހެޔޮ ޢަމަލުތަކަކީ ނުބައި ޢަމަލުތަކުގެ ކައްފާރާއެއް ކަންވެސް ޚުތުބާގައި ފާހަގަކޮށްފައި ވެއެވެ. 

ޚުތުބާގައި އިތުރަށް ބުނީ ކުރިން ކުރެވިފައިވާ ހެޔޮޢަމަލުތަކަކީ، ގިނަގުނަ ޢަމަލުތަކެއް ކަމުގައި، އަހަރެމެން ދެކިގެންނުވާނެ ކަމަށާ ކުރެވުނު ހެޔޮ ޢަމަލުތަކަށްޓަކާ ބޮޑާވެ، އެއީ މާގިނަ ހެޔޮ ޢަމަލުތަކެއް ކަމުގައި ދެކޭނަމަ، އެ ޢަމަލުތައް ބާޠިލުވެދާނެ ކަމަށެވެ. 

މިއާއެކު ޚުތުބާގައި ވަނީ ހެޔޮޢަމަލު ކުރުންމަތީ އަބަދާއި އަބަދު ދެމިތިބޭ، ދުނިޔެއާއި، އާޚިރަތުގައި، އަމާންކަން ލިބިގެންވާ ބަޔަކުކަމުގައި އަހަރެމެން ލެއްވުން އެދި ދުޢާ ކޮށްފައެވެ.