ރޭ އަޅުކަން ކުރުމަށްޓަކައި ރޭގައި މައްކާގެ މަސްޖިދުލް ހަރަމަށް 2.5 މިލިއަން މީހުން އެއްވެއްޖެއެވެ.
މަސްޖިދުލް ހަރަމްގެ އިމާމް އބްދުލްރަހްމާން އަލް ސުދައިސް އިއްވި ޚާއްސަ ދުއާއަކުން ނިންމާލައިފައިވާއިރު، 27 ވިލޭރޭގެ ރޭ އަޅުކަމަށް ރޭގައި އެއްވި އުމްރާވެރިންނާއި އެހެން ފަރާތްތަކުގެ ސަބަބުން މައްކާގެ ހަރަމްފުޅާއި އަޅުކަން ކުރުމަށް ސައުދީ ސަރުކާރުން ފުޅާ ކުރި ބަޔާއި އެކު އެ ސަރަހައްދުގެ މަގުތައް ވެސް ވަނީ ފުރާލާފައެވެ.
މިދިޔަ އަހަރުގެ ރަމަޟާން މަހުވެސް މިފަދައިން އެތައް މިލިއަން ބަޔަކު ރޭ އަޅުކަން ކުރުމަށްޓަކައި މަސްޖިދުލް ޙަރަމަށް އެއްވެފައިވާކަން ފާހަގަކޮށްލެވެއެވެ. މިގޮތުން މިދިޔަ އަހަރުގެ ރަމަޟާން މަހުގެ 29 ވަނަ ވިލޭރޭ 2.5 މިލިއަނަށް ވުރެ ގިނަ މީހުން ވަނީ ރޭ އަޅުކަން ކުރުމަށްޓަކައި އެއްވެފައެވެ.
ސައުދީގެ ކަމާ ބެހޭ ފަރާތްތަކުން ވަނީ ރަމަޟާން މަހުގެ މަތިވެރި މައްސަރުގެ އަޅުކަންތައް ގިނަ ފަރާތްތަކަކަށް މަސްޖިދުލް ހަރަމްގައި ކުރެވޭނެ އިންތިޒާމް ހަމަޖައްސާފައިއެވެ. މިގޮތުން އެކި ބަސްބަހަށް ތަރުޖަމާ ކޮށްފައި ހުރި ގުރުއާން ގެ ކޮޕީ ތައް މަސްޖިދުލް ހަރަމްގައި ބަހައްޓާފައިވާއިރު، މިސްކިތުގެ ސާފު ތާހިރު ކަމަށާއި، ވައި ދައުރު ވުމަށް ވެސް އެ އިދާރާ ތަކުން ވަނީ ވަރަށް ބޮޑު ސަމާލު ކަމެއް ދީފައެވެ.
ހަމަ އެއާއި އެކު، މަސްޖިދުލް ހަރަމް ގެ އެތެރޭގައި މީހުންނަށް ހަރަކާތްތެރިވުން ފަސޭހަ ކޮށްދިނުމަށް ޓަކައި، ސައުދީ ސަރުކާރުން ވަނީ 5000 ގޮލްފް ކާޓް ވެސް ބޭނުންކުރަން ފަށާފައެވެ.
Advertisement
This content is created and paid for by advertisers and does not involve Voice Journalists
