ގިރާވަރުފަޅުގެ ލޭންޑްޔޫސް ޕްލޭނަށް ބަދަލު ގެނެސް، ގިރާވަރު ފަޅުން ދޫކޮށްފައިވާ ބައެއް ގޯތި ގުޅީފަޅަށް ބަދަލުކުރަން ނިންމައިފިއެވެ.

ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާއިން އިން، މިއަދު ކުރި އިޢުލާނުގައިވަނީ، ކުރީ ސަރުކާރުން ބިންވެރިޔާ ސްކީމްގެ ދަށުން ގިރާވަރުފަޅުން ދޫކޮށްފައިވާ 1،347 ގޯތި ގުޅީފަޅަށް ބަދަލު ކުރަން ނިންމަވާފައިވާކަމަށެވެ.

ވުޒާރާ އިން ވިދާޅުވިގޮތުގައި، ގިރާވަރުފަޅުން ގޯތި ދޫކޮށްފައިވަނީ އެސަރަޙައްދަށް ކޮންމެހެން ބޭނުންވާ މުހިއްމު ޚިދުމަތްތަކަށް އެކަށީގެންވާ ވަރަށް ބިން އެކަށައެޅުމެއް ނެތިއެވެ. ގިރާވަރުފަޅުން ދޫކޮށްފައިވާ ބައެއް ގޯތި ގުޅީ ފަޅަށް ބަދަލުކުރީ، ކޮންމެހެން ބޭނުންވާ ޚިދުމަތްތައް ހިމެނޭހެން ގިރާވަރުފަޅުގެ ލޭންޑް ޔޫސް ޕްލޭނަށް ބަދަލުގެނައުމުން, ގިރާވަރުފަޅުން ބިން ދޫކޮށްފައިވާ އަދަދަށް ގޯތި ނުނެގޭތީއެވެ.

ގުޅީފަޅުގެ ލޭންޑް ޔޫސް ޕްލޭން ވުޒާރާގެ ވެބްސައިޓްގައާއި ހިޔާވަހި ޕޯޓަލްގައި ވަނީ އާއްމުކޮށްފައެވެ.

މިގޮތުން ގިރާވަރުފަޅުން ގުޅީފަޅަށް ބަދަލުކުރުމަށް ހަމަޖެހިފައިވާ ގޯތީގެ އަދަދާއި ބޮޑުމިނުގެ ތަފްޞީލު:

1250 އަކަފޫޓުގެ 193 ގޯތި

1650 އަކަފޫޓުގެ 663 ގޯތި

2050 އަކަފޫޓުގެ 487 ގޯތި

2450 އަކަފޫޓުގެ 4 ގޯތި

ގިރާވަރުފަޅުން، ގުޅީފަޅަށް ބަދަލުކުރަން ހަމަޖެހިފައިވާ މިންތަކުގެ ގޯތި ލިބިފައިވާ ފަރާތްތަކުން މާދަމާ ހެނދުނު 9:00 އިން 14 އޭޕްރީލް ވަނަ ދުވަހުގެ 23:00 ގެ ނިޔަލަށް ހިޔާވަހި ޕޯޓަލް ލިންކް މެދުވެރިކޮށް ގުޅީފަޅަށް ގޯތި ބަދަލުކުރުމަށް ހުށަހެޅުމުގެ ފުރުސަތު ހުޅުވާލާ ކަމަށް ވުޒާރާއިން ވަނީ ވިދާޅުވެފައެވެ.

ބަދަލުކުރަން ހަމަޖެހިފައިވާ އަދަދަށްވުރެ ބަދަލުވާން ހުށަހަޅާ ފަރާތްތަކުގެ އަދަދު އިތުރުވާނަމަ ގުޅީފަޅުން ގޯތި ލިބޭ ފަރާތްތައް ކަނޑައަޅާނީ ގުރުއަތުންކަމަށާއި، ގުރުއަތު ނެގުން އޮންނާނެ ތާރީޚެއް ފަހުން ޢާންމުކޮށް އިއުލާން ކުރާނެ ކަމަށްވެސް ވުޒާރާއިން ވިދާޅުވެފައި ވެއެވެ.