ފިޠުރު ޒަކާތުގެ ގޮތުގައި މިރަމަޟާން މަހު މާލެ ސިޓީއިން ބަލައިގަނެފައިވާ ގޮވާމުގެ ބާވަތްތައް ބެހުމުގެ މަސައްކަތް މިއަދު ފަށައިފިއެވެ.
ޒަކާތު ހައުސް އިން ވިދާޅުވިގޮތުގައި ގޮވާމުގެ ބާވަތްތަކުން ފިޠުރު ޒަކާތް ބެހުން ކުރިއަށްދަނީ އަމީނިއްޔާ ސްކޫލުގެ ހޯލުގައެވެ. މިތަކެތި ބެހުމަށް ހަމަޖެހިފައިވަނީ މާލެ ސިޓީގެ ފަޤީރުންނާއި މިސްކީނުންގެ ދަފްތަރުގައި ރަޖިސްޓްރީވެފައިވާ ފަރާތްތަކަށެވެ.
މިއަދާ މާދަމާވެސް ގޮވާމުގެ ބާވަތްތަކުން ޒަކާތް ބެހުމަށް ނިންމަވާފައިވާއިރު، މިއަދު ގޮވާމުގެ ބާވަތްތަކުން ޒަކާތް ބެހުން ކުރިއަށް ދާނީ ހެނދުނު 11:00 އިން ހަވީރު 16:00 އަށެވެ. އަދި މިރޭ 20:30 ން 22:30 އަށެވެ. މާދަމާ ގޮވާމުން ޒަކާތް ބެހުމަށް ހަމަޖެހިފައިވަނީ ހެނދުނު 11:00 އިން ހަވީރު 15:30 އަށެވެ. އަދި މާދަމާ ރޭ 20:30 ން 22:30 އަށެވެ.
ގޮވާމުގެ ބާވަތްތަކުން ފިޠުރު ޒަކާތް ދެއްކުމަށް ފުރުޞަތު ހުޅުވާލާފައިވަނީ މާރޗު މަހުގެ 31 ވަނަ ދުވަހުންފެށިގެން މިމަހުގެ 9 ވަނަ ދުވަހުގެ ނިޔަލަށެވެ.
ފިޠުރު ޒަކާތަކީ ރަމަޟާން މަހު ރޯދަ ހިފާ ނިމުމާއެކު، ޒަކާތް ޙައްޤުވާ މީހުންނަށް ދޭން ފަރުޟުކުރައްވާފައިވާ އެއްޗެކެވެ. ރަމަޟާން މަހުގެ ކޮންމެ ދުވަހަކުވެސް ފިޠުރު ޒަކާތް ނެރެވިދާނެއެވެ. ޢީދު ނަމާދަށްވުރެ ޒަކާތް ދެއްކުން ފަސްކުރުމަކީ ޙަރާމް ކަމެކެވެ.
Advertisement
This content is created and paid for by advertisers and does not involve Voice Journalists
