އެހެން މީހުންނަށާއި ކުދިންނަށް ގަނާކޮށް ނުވަތަ ބުލީކޮށް އަނިޔާކުރާއިރު، ގިޔާމަތްދުވަހުން ތިމާގެ ގުނަވަންތައް އެކަމަށް ހެކިވާނެކަން ވިސްނަންޖެހޭ ކަމަށް އައްޝެއިޚް އިބްރާހިމް މެންކު ވިދާޅުވެއްޖެއެވެ. 

ދާރިސް ޓީވީން ގެނެސްދޭ “ވިތް އިބްރާހިމް މެންކް” ޕްރޮގްރާމްގައި، ގަނާ ކުރާ ފަރާތްތަކަށް ދޭނެ މެސެޖެކާއި ގުޅެޭގޮތުން ކުރެވުނު ސުވާލަށް ޖަވާބު ދެއްވަމުން ޝެއިޚް އިބްރާހިމް މެންކު ވިދާޅުވީ، ޤިޔާމަތް ދުވަހުން އެމީހެއް ކުޅަ އަމަލުތަކަށް ހެކިވާނޭ އެމީހެއްގެ ގުނަވަންތައް ކަން މާތް الله ސުބުހާނަހޫ ވަހީ ކުރައްވާފައިވާ ކަމަށެވެ. އަދި އެދުވަހުން އެއްވެސް މީހަކަށް ދޮގު ނުހެދޭނެ ކަމަށްވެސް ވިދާޅުވިއެވެ. 

މީގެ އިތުރުން، ޝެއިޚް އިބްރާހިމް މެންކު ވިދާޅުވީ، ގަނާ ކުރާ މީހާވެސް އުއްމީދު ކަނޑާލައިގެން ނުވާނެ ކަމަށެވެ. އަދި އޭނާއަށް އެ ކުރެވުނު އަމަލާއިމެދު ހިތާމަކޮށް، އަނިޔާ ލިބުނު މީހާގެ ކިބައިން މާޢާފަށް އެދި، މާތް الله ސުބުހާނަހޫ ވަތަޢާލާގެ ހަޟުރަތުގައިވެސް އެ ފާފަ ފުއްސަވައި އެމީހަކަށް އަފޫ ކޮށްދެއްވުމަށް އެދި ދުޢާ ކުރަންވާނެ ކަމަށް ވިދާޅުވިއެވެ. 

ޝެއިހް އިބްރާހީމް މެންކު ވިދާޅުވި ގޮތުގައި އިސްލާމް ދީނުގެ ރީތި ކަމާއި ފުރިހަމަ ކަން އެކަމުން އެނގިގެންދާ ކަމަށެވެ. މި ދީނުގައި، އަނިޔާ ކުރާ މީހާއަށްވެސް، ތައުބާވެ، ތިމާގެ ދިރިއުޅުން އިސްލާހުކޮށް، ރަނގަޅު މުސްލިމަކަށްވެ، މުޖުތަމަޢުއަށް ޚިދުމަތް ކުރުމުގެ ފުރުސަތު ވަނީ ފަހިކޮށްދީފައިވާ ކަމަން ޝެއިޚް ފާހަގަކުރެއްވިއެވެ. 

އެހެންކަމުން، ވަގުތު ފާއިތުވުމުގެ ކުރިން އިސްލާހުވެ ހެޔޮ މަގަށް ރުޖޫއުވުމަށް ޝެއިޚްވަނީ ނަޞޭހަތްތެރިވެފައެވެ.