ޕީޕަލްސް ނެޝަނަލް ފްރަންޓް (ޕީއެންއެފް) އުފެއްދުމަށް ރޭ ގިޔާޒުއްދީން ސްކޫލުގައި ބާއްވަން އުޅުނު ޖަލްސާއަށް އެސްއޯ ފުލުހުން ގޮސް ހުރަސް އެޅީ އެ މަނިކުފާނުގެ އެންގެވުމާ ހިލާފަށް ކަމަށާއި އެކަމުގައި އަޅަން ޖެހުނު ކޮންމެ ފިޔަވަޅެއް އަޅުއްވާނެ ކަމަށް ރައީސް ޑރ. މުހައްމަދު މުހައްމަދު މުއިއްޒު ވިދާޅުވެއްޖެއެވެ.
މުލިއާގޭގައި މިއަދު އާންމުންނާ އީދު ސަލާމްކުރެއްވުމަށްފަހު ނޫސްވެރިންނާ ވާހަކަދައްކަވަމުން ރައީސް ވިދާޅުވީ ސިޔާސީ ހަރަކާތްތައް ހުއްޓުވުމަށް އެސްއޯ ފުލުހުން ނުފޮނުވުމަށް ފުލުހުންނަށް ވަރަށް ސާފުކޮށް އިރުޝާދުދެއްވާފައިވާނެ ކަމަށެވެ.
"ދެން އަޅުގަނޑު ދަންނަވާފައިވާނީ އެއްވެސް ގޮތަކަށް ފެންނަން ބޭނުމެއް ނޫނޭ ކުރީގައި ފެނުނު ގޮތަށް ފުލުހުން ގޮސް ރައްޔިތުންނަށް އަނިޔާކޮށް، ރައްޔިތުން ހިފަައި ހައްޔަރުކޮށް [ހަދާކަަށް]. އެއްވެސް ސަބަބެއް ނެތި ކުރީގައި ފެނިފައި ހުރި ޚިޔާލެއް ފާޅުކޮށްލާއިރަށް އެއްވެލާއިރަށް ރައްޔިތުން ހައްޔަރުކޮށް ޕިކަޕަކަށް އަރުވައިގެން ގެންދާތަން އެއްވެސް ގޮތަކަށް ފެންނާކަށް ބޭނުންނުވެއާ [ފުލުހުންނަށް ދެންނެވިން]،"
ރައީސް ވިދާޅުވިއެވެ.
ރައީސް ވިދާޅުވީ ކުރީގައި ރާއްޖޭން ފެނުނު ގޮތަށް ސިޔާސީ ބަދަލު ހިފުމުގެ ރޫހެއް ނުގެންގުޅުއްވާނެ ކަމަށާއި ސިޔާސީ ހިޔާލު ފާޅު ކޮށްގެން މީހަކަށް ދޭނެ އަދަބެއް ނޯންނާނެ ކަމަށާއި ފުލުހަށް ނުގެންދާނެ ކަމަށާއި އެކަންކަން މި ގައުމަކު ނުހިނގާނެ ކަމަށް އެ މަނިކުފާނު ގެންދެވީ ކަށަވަރުކޮށް ދެއްވަމުން ކަމަށެވެ.
"ރޭގައި ހިނގި ކަންތަކުގައި އަޅުގަނޑު ވަރަށް ހިތާމަ ކުރަން ވަރަށް ފަހުން އަޅުގަނޑު ފުލުހާ ބައްދަލު ކުރި އިރު، އެރޭ ހުރިހާ ފުލުހުންނަށް ވެސް ދެންނެވިން އޭގެ ކުރިން ވެސް ސީޕީއަށް ވެސް އަދި އިސްވެރިންނާ ހޯމް މިނިސްޓަަރަށް ވެސް އަޅުގަނޑު ދީފައި އޮންނާނެ އިރުޝާދަކީ ސިޔާއީ ގޮތުން ވަކި މީހަކަށް ގޯނާއެއް އުނދަގުލެއް ކުރާކަށް އަޅުގަނޑުގެ ފަރާތަލުން ނާންނާނޭ އެއްވެސް އިރުޝާދެއް އަދި ސަރުކާރުގެ އެއްވެސް ލެވެލަކުން ވެސް ނުދާނޭ ގޮސްފިއްޔާ އަޅުގަނޑު އިސްވެ ފިޔަވަޅު އަޅާނަމޭ. މަސައްކަތް ކުރާށޭ ކުރީގައި ވެދިޔަތަން ދޫކޮށްލާފައި ފްރީކޮށް ޕްރޮފެޝަނަލްކޮށް، އެއީއޭ އަޅުގަނޑުގެންގުޅޭ ސިޔާސަތަކީ"
ރައީސް ވިދާޅުވި އެވެ.
ރައީސް މުއިއްޒު ވިދާޅުވީ ދާދި ފަހުން ކޫއްޑޫގައި މަސްވެރިންނަށް އެ ފަރާތްތަކުތެ ފައިސާ ނުލިބި، ހިތްހަމަ ނުޖެހިގެން ދެތިން ދުވަހަށް މުޒާހަރާ ކުރި ކަމަށާއި އެ މުޒާހަރާތަކުގައި ތަކެތި ހަލާކު ކޮށްފާނެ ފަދަ ބިރާ ހަމައަށް ދިޔައިރުވެސް އަދި އެތެރެއިން ޕްރެޝަރުތައް އާއިރު ވެސް އެ މަނިކުފާނު ހިފެހެއްޓެވީ އެސްސޯ ފުލުހުން ނުފޮނުވާ ކަމަށާއި އެއީ އެ އެމަނިކުފާނު ގަބޫލުފުޅު ކުރައްވާ ކަމެއް ނޫން ކަމަށެވެ.
އެ މަނިކުފާނު ވިދާޅުވީ، އެ މައްސަލައިގެ ތަހުގީގު ރިޕޯޓް މިއަދު އިރުއޮއްސުމުގެ ކުރިން ތައްޔާރުކޮށް ފޮނުއްވުމަށް އަންގަވާފައިވާނެ ކަމަށާއި އެ ރިޕޯޓަށް ބެއްލެވުމަށްފަހު ފިޔަވަޅު އަޅަން ޖެހުނު ކޮންމެ ބަޔަކަށް ފިޔަވަޅު އަޅުއްވާނެ ކަމަށެވެ.
"މިއަދު އިންވެސްޓިގޭޝަން ރިޕޯޓް ހޯދާފައި އެކަން ކުރި ބަޔަކަށް އަޅަންޖެހޭ ފިޔަވަޅު އަޅާނަން ފުލުހުންގެ މުއަައްސަަސާއަށް އަނބުރާ އިތުބާރު ގެންނަން ބޭނުންވޭ، އަޅުގަނޑުގެ ސަރުކާރަށް އިތުބާރު އޮންނަން ބޭނުންވޭ".
ރައީސް ވިދާޅުވިއެވެ.
ރޭ ހިނގި ކަންކަމާ ގުޅިގެން ފުލުހުންގެ ތަރުޖަމާނު އަހުމަދު ޝިޕާން އެކްސްގައި ރޭ ކުރެއްވި ޕޯސްޓެއްގައި ވިދާޅުވީ އެ ޖަލްސާއަށް އެ އިދާރާ އިން ހުރަސް އެޅީ އެ ސްކޫލުގައި ބޭއްވުމަށް މަސައްކަތް ކުރަމުންދިޔައީ ހުއްދަ ދެވިފައިނުވާ އެއްވުމެއް ކަމަށް އެ ސްކޫލުގެ ފަރާތުން އެޑިއުކޭޝަން މިނިސްޓްރީއަށް އެންގުމުން، އެކަން ތަންފީޒު ކުރުމަށް، މިނިސްޓްރީގެ ފަރާތުން ފުލުހުންގެ އެހީތެރިކަމަށް އެދުމުން ކަމަށެވެ.
Advertisement
This content is created and paid for by advertisers and does not involve Voice Journalists
