ދިވެހި ވިޔަފާރިވެރިން ޗައިނާގެ ޔުއާންއިން އިމްޕޯޓްކުރާ މުދަލަށް ދިވެހި ރުފިޔާއިން ފައިސާ ދެއްކޭނެ އިންތިޒާމް ވަރަށް އަވަހަށް ހަމަޖެހޭނެކަމަށް އިޤްތިސާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ.

ސައީދު މިހެން ވިދާޅުވީ، ރައީސުލްޖުމްހޫރިއްޔާ ލ އަތޮޅަށް ކުރައްވާ ދަތުރުފުޅުގެ ތެރެއިން ލ.މާވަށު ރައްޔިތުންނާއި ބައްދަލުކުރެއްވުމަށް ބޭއްވެވި ޖަލްސާގައި ވާހަކަދައްކަވަމުންނެވެ.

އެގޮތުން ސައީދު ވިދާޅުވީ، މިސަރުކާރުގެ އަމާޒަކީ މަދުވެގެން 2 އަހަރު ތެރޭގައި ޑޮލަރުގެ ރޭޓް ރަސްމީ ރޭޓަށް ބަދަލުކޮށް އެއަށްވުރެވެސް ދަށްކުރުމަށްކަމަށެވެ. އަދި މަޖިލީހުގެ މެޖޯރިޓީ ސަރުކާރަށް ލިބިއްޖެނަމަ އެކަން ނުކުރެވޭނެ ގޮތެއް ނެތް ކަމަށްވެސް އޭނާ ވިދާޅުވިއެވެ. 

މިއާއެކު ސައީދު ވިދާޅުވީ، ދިވެހިރާއްޖެއިން ޗައިނާއާއެކު 720 މިލިއަން އެމެރިކާ ޑޮލަރުގެ ވިޔަފާރި އަދި އިންޑިއާއާއެކު 780 މިލިއަން އެމެރިކާ ޑޮލަރުގެ ވިޔަފާރި ކުރާކަމަށެވެ. އަދި ރާއްޖެ އަކީ ވިޔަފާރީގެ ދާއިރާއިން ވަރަށް ހުޅުވާލެވިފައިވާ ގައުމެއް ކަމަށާ ސަރުކާރުގެ އަމާޒަކީ ބޭރުން ގެންނަ މުދަލަށް ދިވެހި ރުފިޔާއިން ފައިސާދެއްކޭނެ މަގު ފަހިވެގެމް ދިޔުން ކަމަށްވެސް ސައީދު ވިދާޅުވިއެވެ.

ސައީދު ވިދާޅުވި ގޮތުގައި އެކަން އެގޮތަށް ހަމަޖެހުމުން ޑޮލަރުގެ ކުރިމަތީގައި ދިވެހި ރުފިޔާގެ އަގު 30 ނުވަތަ 40 ފަސެންޓް ވަރުގަދަވެގެންދާނެއެވެ. އޭގެ ނަތީޖާއެއްގެ ގޮތުން ޑޮލަރުގެ ރޭޓް 15.42 އަކަށްވުރެ ވެސް ދަށަށް ދާނެ ކަމަށް ސަޢީދު ވިދާޅުވިއެވެ.